Pô čih mkra hdră Ama Zứt (Hdră mđung asăp blŭ klei Bahnar) yăl dliê kơ klei “jing hđeh 7 thŭn” jăk snăk. Anăn jing gưl tal êlâo mâo Pô čih mkra klei mmuiñ Linh Nga Niê Kđăm (hlăk anăn jing K’iăng khua knơ̆ng bruă) nao bi tuôm hŏng phung hmư̆ asăp ti ƀuôn Kơjêng, să Ayun, kdriêk Mang Yang, čar Gia Lai.

Hruê anăn, ƀuôn dôk mkŏ mjing knăm ngă Yang. Hlue si klei bhiăn mnuih Bahnar, grăp blư̆ mkŏ mjing knăm ngă Yang snăn mâo lu klei kăm, amâo drông tue ôh. Ƀiădah myun mơh, hlăk anăn knŏng jing knăm mnuih ƀuôn sang mơ̆ng kbưi nao čhưn, anăn Ama Zứt mâo klei găl dưi iêô đĭ hlăm sang roong. Leh klei kkuh čhưn anăn hưn kơ pô snăn mnuih ƀuôn sang thâo mtam, anăn jing Ama Zứt- pô khăng blŭ hlăm radio klei blŭ Bahnar.

 Grăp čô bi êmuh leh anăn bi mni kơ Hdră mđung asăp blŭ klei Bahnar mơ̆ng Sang mđung asăp blŭ Việt Nam jăk snăk! Amâo djŏ knŏng dŭm anăn ôh, mnuih ƀuôn sang lŏ thâo Pô čih mkra hdră Ama Zứt jing anak A ti ƀuôn riêng gah, Thâo snăn anăn pô sang lač: “Ih jing anạ čô hlăm sang! Leh lač ñu ktrâo kngan phă čô hlăm brô 7 thŭn lŏ lač: “Ama ih adih”. Ama Zứt bi kngăr dlăng kơ hđeh. Pô sang lač: “Anăn ñŭ msĕ hŏng anăn ama ih”. Truh tinei snăn Ama Zứt hdơr klei bhiăn mnuih Bahnar: Msĕ snăn snăn jing ayŏng adei, dua čô ƀiădah jing sa. Ñu mă kiê kngan kkuh kơ ama điêt. Leh anăn mơ̆ng anăn, grăp čô bi mă kiê kngan mơak mñai. Hnêč mmông găl, Pô čih mkra klei mmuiñ Linh Nga Niê Kdăm hŏng Ama Zứt mjing hruê yuôm bhăn ngă yang drông tuê ti ƀuôn jing klei bi kƀĭn bi tuôm hŏng phung hmư̆ asăp jăk siam. Lŏ hdơr kơ ai tiê hlăk anăn, Pô čih mkra hdră Ama Zứt brei thâo:

 “Hŏng klei bi tuôm hŏng phung hmư̆ asăp amâodah nao čih kơ hdră mđung asăp blŭ mnuih djuê ƀiă Lăn Dap Kngư, klei mơak anăn jing pô dưi ngă bruă klam mơ̆ng sa čô pô čih mkra hdră, pô mblang, pô ktuê răk. Leh anăn mơ̆ng dŭm blư̆ bi tuôm amâodah ngă bruă čih klei mrâo anăn pô hriăm lu mơ̆ng phung hmư̆ Asăp, kơ hdră mblang si ngă čiăng djŏ hŏng ênhiang blŭ djuê ana pô,   si răk čiăng djŏ msĕ si djuê ana pô. Leh mơ̆ng dŭm blư̆ bi tuôm snăn pô hưn kơ hdră êlan mơ̆ng Đảng, Hdră bhiăn mơ̆ng Knŭk kna hŏng mnuih ƀuôn sang ênưih thâo săng leh anăn hlue ngă”.

Sa blư̆ mkăn, Ama Zứt “nao atăt” Khua knơ̆ng bruă Uông Ngọc Dậu nao mă bruă ti ƀuôn Tươh KơTu, să G’Lar, kdriêk Đak Đoa, čar Gia Lai, čiăng ksiêm hriăm kơ Nơn (djuê ana Bahnar) rông 7 čô hđeh dleh dlan. Dôk êmuh snăn sa čô êkei mŭt hlăm lam êmuh: Ih Ama Zứt djŏ mơ̆? Klei êmuh ngă kơ Khua Knơ̆ng bruă Uông Ngọc Dậu leh anăn Ama Zứt bi kngăr snăk. Ƀuh snăn, Nơn hưn anăn jing êdei êkei bum ală khăng hmư̆ Hdră mđung asăp blŭ klei Bahnar mơ̆ng Sang mđung asăp blŭ Việt Nam leh anăn tuč lu klei yăl dliê đưm mơ̆ng asăp Ama Zứt yăl dliê. Amâo lŏ dôk guôn ôh, pô bum ală anăn mgưt asăp Ama Zứt lông yăl dliê klei yăl dliê đưm mrâo mđung hruê kăm êlâo. Klei yăl dliê ngă kơ grăp čô hlăm êpul ƀlĕ êa ală, pap kơ klei gơ̆ bum ală leh anăn mgei ai tiê kyua mâo pô hmư̆ asăp hŏng jih ai tiê snăn.

Amai Lơ Mu K’Yến (Khua Hdră mđung asăp blŭ klei K’Ho) yăl dliê klei ktưn hưn hlăk gưl tal êlâo dưi nao hlăm Klei bi lông mđung asăp kluôm ala tal XV, hŏng klei čih “Phung êdam êra K’ho mbruă mphŭn čô̆ kơ bruă mkŏ mkra krĭng ƀuôn sang mrâo”. Mơ̆ng anăn, ñu mâo thiăm ai ktang, hur har nao ti ƀuôn sang lu hĭn. Grăp blư̆ wĭt hŏng ƀuôn santg K’Ho taih kbưi ti čar Lâm Đồng čiăng duah ênhiang mmuiñ djuê ana amâodah ngă bruă čih klei mrâo, hmư̆ asăp blŭ mnuih ƀuôn sang thâo mtam Lơ Mu K’Yến. Sô̆ ală mă kiê kngan, mnuih ƀuôn sang yăl dloê klei pô hmư̆ hlăm Radio hŏng klei K’Ho, mbŏ thiăm boh blŭ djuê ana pô, ñu lŏ mgei ai tiê, mpŭ leh anăn khăp hĭn kơ bruă pô. Pô čih mkra hdră Lơ Mu K’Yến brei thâo:

 “Kâo mơak snăk grăp blư̆ wĭt ti ƀuôn sang leh anăn ƀuh myun tơdah lŏ dưi bi tuôm hŏng phung thâo hră mơar mnuih K’ho pô, phung thâo êlam kơ klei hdĭp duh mkra ala ƀuôn mnuih K’Ho. Boh nik mơ̆ng digơ̆ pô thâo săng hĭn kơ dhar kreh đưm mnuih K’Ho. Kyua anăn kâo mâo klei thâo yuôm bhăn mă bruă kơ mnuih ƀuôn sang hmư̆ Asăp hŏng hdră mđung ƀrư̆ jăk hĭn. Kâo pô ăt mgei ai tiê srăng gĭr jih ai tiê ngă djŏ klei čiăng phung hmư̆ Asăp klei K’Ho ti lăn Dap Kngư amâodah ti ala tač êngao dưi hmư̆ klei hâo hưn hŏng klei K’Ho hlăm internet ăt msĕ mơh radio. Kâo bi mni leh anăn mơak snăk”.

Ăt mơ̆ng dŭm gưl nao snăn, phung čih mkra hdră, phung ktuê răk mơ̆ng Adŭ bruă klei blŭ djuê ƀiă- Anôk bruă dôk jưh Lăn Dap Kngư mâo lu klei pah mni gưl ala čar leh anăn gưl čar. Klă klơ̆ng, thŭn 2022, mâo klei pah mni êa kông hŏng kdrêč “Mơ̆ng klei bhiăn djuê ana truh kơ hdră bhiăn”. Anăn jing klei yăl dliê mnuih Jrai “Hgao klei tăm oah”, gĭr lui klei kthŭl mluk suôt ama mơ̆ng sang tơdah amĭ djiê, bi êdah klei huĭ mpŭ kơ amĭ ama pô. Thŭn 2018, Adŭ bruă djuê ana ăt mâo Klei pah mni êa kông hlăm Klei pah mni mđung asăp kluôm ala hŏng akŏ “Klei jăk siam dhar kreh Lăn Dap Kngư”. Leh anăn truh thŭn 2020, Adŭ bruă djuê ana lŏ dơ̆ng mâo klei pah mni êa Kông hlăm Klei pah mni hdră mđung asăp tal XV hŏng klei čih “Phung êdam êra K’Ho mbruă mphŭn čô kơ bruă mkŏ mkra krĭng ƀuôn sang mrâo”./.