Hruê kăm êgao, Knơ̆ng bruă pui kmlă Dak Lak bi hgŭm hŏng adŭ bruă kahan ksiêm gang mkhư̆, truih mdjiê klei pui ƀơ̆ng leh anăn đru dŏng -kahan ksiêm čar Dak Lak mkŏ mjing 2 adŭ hâo hưn, mtô mblang leh anăn bi hriăm bruă gang mkhư̆ truih mdjiê klei pui ƀơ̆ng kơ êbeh 530 čô knuă druh, phung mă bruă pui kmlă. Pui kmlă Dak Lak ară anei kriê dlăng 17 hdră bruă hlăm anôk bruă huĭ pui ƀơ̆ng, mtuh; êngao anăn lŏ mâo 14 anôk bruă gĭt gai mkra mjing mơ̆ng dŭm bruă pui kmlă alŭ wăl.

Hlăm wưng êgao, bruă gang mkhư̆ truih mdjiê klei pui ƀơ̆ng mâo dhar bruă mđing dlăng, jao mnuih, prăk bi liê ngă bi jăk. Hlăm gưl mtô mjuăt mrâo êgao, phung mă bruă pui kmlă Dak Lak hmư̆ phung knuă druh kahan ksiêm gang mkhư̆ klei pui ƀơ̆ng čar Dak lak hâo hưn kơ boh klei mtuh, pui ƀơ̆ng, hră mơar hdră bhiăn djŏ tuôm kơ bruă anei. Mtô skiêm dlăng klei huĭ ba klei mtuh, ba yua kdrăp truih mdjiê klei pui ƀơ̆ng, hdră đuĕ mơ̆ng anôk pui ƀơ̆ng, hdră đru phung mâo klei truh. Mbĭt anăn, hriăm truih mdjiê klei pui ƀơ̆ng, đru dŏng hlăm boh klei mâo klei pui ƀơ̆ng ti Knơ̆ng bruă leh anăn hjiê Ea Tam.