Pioh anôk kơ bruă rŭ mkra knơ̆ng kdơ̆ng êa akŏ krông Pač, mơ̆ng akŏ thŭn truh kơ ară anei, anôk bruă pui kmlă Ea Kar (Đăk Lăk) hlăk bi mguôp kjăp hŏng êpul bruă kiă kriê klei mbĕ mđuĕ mnuih ƀuôn sang, nao dôk kơ anôk mrâo ti să Cư San (kdriêk M’Đrắk) kơ anôk mkŏ mkra ala ƀuôn mrâo mrô 2, hlăm să Cư Bông (huyện Ea Kar).

Tui si hdră, mơ̆ng akŏ mlan 2 truh jih mlan 4/2023, srăng mâo truh 488 gŏ êsei nao mbĕ dôk kơ anôk dôk mrâo, kbiă đuĕ mơ̆ng anôk rŭ mkra knơ̆ng kdơ̆ng êa akŏ krông Pač, wĭt kơ să Cư Bông. Anôk bruă pui kmlă Ea Kar mâo mkŏ mjing dua êpul đru hlăm klei mbĕ mnuih ƀuôn sang. Êpul 1 đru hlăm bruă pui kmlă ti Čư San.

Êpul 2 đru kơ bruă pui kmlă ti Cư Bông kñăm čiăng pral đru kơ mnuih ƀuôn sang hơĭt klei hdĭp mda. Truh akŏ mlan 3, dưi đru bi ênŭm 46 gŏ êsei dôk kơ anôk mrâo rŭ mdơ̆ng pưk sang, hơĭt klei hdĭp mda./.