Êpul hgŭm bruă mniê dŭm boh să, wăl krah bi ksiêm yap dŭm gŏ sang mnuih djuê ƀiă mâo klei čiăng čan prăk, đru klei kơ lăn dôk, lăn pla mjing, bi mlih bruă ngă, lehanăn mâo hdră đru bi djŏ hŏng klei bhiăn mtrŭn. Truh ară anei, êpul hgŭm bruă mniê kdriêk ăt jưh knang kơ knơ̆ng prăk đru ba bruă yang ƀuôn, brei kơ phung mniê ƀun mâo čan prăk pioh duah ƀơ̆ng , hŏng ênoh brei čan jih jang truh 150 gŏ sang. Ka Hương – K’iăng khua êpul hgŭm bruă mniê kdriêk  Di Linh, čar Lâm Đồng brei thâo:

 “Di Linh jing alŭ wăl mâo lu mnuih djuê ƀiă hdĭp mda, hlăm anăn gŏ sang ƀun dôk lu, lu jing dŭm amai adei mniê mnuih djuê ƀiă. Êpul hgŭm bruă mniê kdriêk mâo leh lu hdră kñăm čiăng bi hrŏ ênoh gŏ sang ƀunhŏng mnuih djuê ƀiă, brei di gơ̆ dưi čan prăk, lehanăn êpul hgŭm bruă mniê msĕ mơh mkŏ mjing keh kyua amai adei mniê ƀun ƀin, mơ̆ng phung amai adei mniê bi mkrum sa čô 10 êbâo prăk, lehanăn ênoh mâo ară anei đĭ leh truh 1 êklai prăk. Mơ̆ng keh anei, amai adei mâo đru prăk pioh kơ bruă duh ƀơ̆ng, msir klei dleh dlan”./.