Khua gĭt gai Phŭn bruă kahan ksiêm drông leh anăn gĭt gai êpul pak mni, mđĭ ai Êpul mă bruă ti Tač êdeh phiơr Nội Bài. Leh lu hruê ngă bruă đru dŏng mnuih hlăm kăm sang dlưh, êpul mă bruă đru dŏng mơ̆ng Phŭn bruă kahan ksiêm Turky bi leh jăk bruă klam dưi jao; bi hgŭm hŏng êpul đru dŏng dŭm ala čar dŏng mtlaih sa čô mnuih hdĭp mơ̆ng kăm dlưh rai, ba 14 asei atâo ti tač jao kơ anôk bruă mdrao mgŭn alŭ wăl, ba giăm 2 ton kdrăp mdrao mgŭn mơ̆ng Phŭn bruă kahan ksiêm Việt Nam kơ anôk bruă gĭt gai ala čar Turki leh anăn kơ Knơ̆ng bruă mdrao mgŭn ƀuôn prŏng Adiyaman.  

Gưl anei Khua phŭn bruă kahan ksiêm mđup brei hră pah mni kơ 24 čô knuă druh, lĭng kahan kyua mâo leh klei êdah êdi hlăm gưl hlue ngă bruă klam đru dŏng kơ klei mgei lăn ti Turky./.