Hluê Anôk bruă sang čư̆ êa čar Dak Nông, bruă mă – ba yua boxit ti čar dưi ngă 17 thŭn leh ƀiădah truh ară anei knŏng dưi mkra alumin, ka mâo ksueh lehanăn dŭm mta mnơ̆ng mơ̆ng ksueh. Bruă duh bi liê, mkra dŭm hdră bruă lehanăn akâo hdră mtrŭn ksiêm dlăng, duh bi liê dŭm hdră anei ti alŭ wăl čar hlăk gun kpăk djŏ tuôm kơ bruă čuăl mkă. Khua knŭk kna gĭt gai dŭm Phŭn, dhar bruă djŏ tuôm đru kčĕ, ruh mtlaih klei dleh dlan ƀiădah truh kơ ară anei ka dưi msir mghaih mơh.

Hluê si Hồ Văn Mười, Khua Anôk bruă sang čư̆ êa čar Dak Nông, boxit brei dưi dlăng jing sa mta mnơ̆ng hlăm gŭ lăn mdê hjăn lehanăn mâo hdră ngă bruă djŏ guôp. Dak Nông dôk čiăng klei bi hgŭm kjăp mơ̆ng dŭm knơ̆ng, dhar bruă čiăng mkra mlih Hdră bhiăn mnơ̆ng gŭ lăn ti Klei bi kƀĭn Anôk bruă kƀĭn ala anăp truh. Blŭ ti knăm anei, Trương Thanh Hoài, Kơiăng khua Phŭn bruă tuh tia mnia mblei brei thâo, hŏng dŭm klei dleh dlan, gun kpăk, čar akâo kơ Phŭn bruă tuh tia mnia mblei čih pioh lehanăn bi hgŭm hŏng dŭm anôk bruă đru kčĕ kơ Knŭk kna, Anôk bruă kƀĭn ala hnưm ruh mtlaih čiăn kơ čar dưi pŏk ngă bruă klam duh mkra – ala ƀuôn./.