Mâo 2 čô anak dôk hriăm sang hră gưl hđeh điêt knŭk kna, grăp mlan gŏ sang amai Nguyễn Ngọc Quỳnh ti kdriêk Nam Đàn, čar Nghệ An bi liê hlăm brô 4 êklăk prăk tăk hriăm hră lehanăn prăk huă yang hruê kơ phung anak. Jih dua ung mô̆ ñu mă bruă mưn sơaĭ, hnư hrui wĭt amâo hơĭt kyua anăn grăp mlan ñu bi liê nanao prăk kơ phung anak hriăm hră. Kyua anăn, leh mâo klei hưn phung hđeh hriăm gưl hđeh điêt, gưl sa, gưl dua lehanăn gưl tlâo knŭk kna amâo lŏ guôn tla prăk tăk hriăm hră dơ̆ng mơ̆ng thŭn hriăm ti anăp, amai ƀuh mơak êdi kyua srăng dưl dul ƀiă sa kdrêč bi liê kơ klei hriăm hră mơ̆ng dua čô anak:

Msĕ si gŏ sang hmei dua ung mô̆ mă bruă mưn sơaĭ lehanăn mâo dua čô anak, anăp anei amâo lŏ tla prăk tăk hriăm hră ung mô̆ hmei dul mơh sa kdrêč bi liê kơ gŏ sang, kyua anăn kâo mơak êdi hlăk mâo hdră mtrŭn mrâo anei.

Hơ̆k mơak ăt jing klei mâo mbĭt mơ̆ng lu phung amĭ ama hŏng klei bi mklă mơ̆ng hdră mtrŭn lui prăk tăk hriăm hră kơ phung hđeh gưl điêt lehanăn phung hđeh gưl sa truh kơ gưl tlâo knŭk kna mơ̆ng Phŭn bruă kđi čar. Amai Nguyễn Thị Hương ti ƀuôn hgŭm Đồng Tâm, alŭ Hai Bà Trưng, Hà Nội brei thâo:

Sang kâo mâo 2 čô anak, 1 čô hriăm gưl dua, 1 čô hriăm adŭ 10. Mŭt hlăm thŭn hriăm ti anăp amâo lŏ tla prăk tăk hriăm kâo mơak êdi. Khădah prăk hriăm hră phung anak hlăm sa mlan gơ̆ amâo lu ôh, ƀiădah hŏng ênoh bi liê ti Hà Nội lu, gŏ sang hmei hlăk dôk sang mưn mơh kyua anăn mâo sa mtrŭn anei ăt đru mơh gŏ sang kâo dưi mkiêt mkriêm sa ênoh bi liê.

Bi amai Ngô Thị Mai ti kdriêk Thạch Thất, Hà Nội brei thâo:

Kâo mơak êdi. Dưi dul ƀiă sa ênoh hlăm 1 thŭn hriăm gơ̆ jing sa ênoh lu mơh, čiăng kơ gŏ sang kâo dưi mkiêt mkriêm lehanăn bi liê kơ bruă mkăn. Hnư hrui wĭt ti krĭng ƀuôn sang msĕ si hmei anei gơ̆ ƀiă, kyua anăn hŏng ênoh prăk anei srăng lu, jing yuôm bhăn êdi.

 Mbĭt hŏng bruă lui jih prăk tăk hriăm hră gưl hđeh điêt, gưl sa, gưl dua lehanăn gưl tlâo knŭk kna, phung hđeh hriăm ti dŭm sang hră êngao knŭk kna ăt dưi đru mdul sa kdrêč prăk hriăm hră hluê si klei kčah mtrŭn mơ̆ng hdră bhiăn; ênoh bi kpleh plah wah sang hră knŭk kna êngao knŭk kna phung amĭ ama srăng tla. Hluê si Trần Văn Nghĩa ti čar Hà Nam, hdră mtrŭn anei srăng đru rơ̆ng klei mtăp mđơr plah wah phung hđeh hriăm ti sang hră knŭk kna lehanăn êngao knŭk kna.

Phung hđeh hriăm sang hră êngao knŭk kna srăng dưi đru sa kdrêč prăk tăk hriăm kâo ƀuh anei jing klei mơak êdi. Kyua boh sĭt, gơ̆ srăng đru mdul prăk bi liê amâo djŏ knŏng kơ kâo ƀiădah wăt kơ phung amĭ ama mâo phung anak hriăm ti sang hră êngao knŭk kna, tal dua kâo ƀuh klei anei ăt rơ̆ng klei mtăp mđơr hĭn plah wah phung hđeh hriăm sang hră êngao knŭk kna lehanăn sang hră knŭk kna.

Hluê si klei ksiêm yap mơ̆ng Phŭn bruă Sang hră mơar mtô bi hriăm, hdră mtrŭn anei srăng ba wĭt boh tŭ dưn kơ hlăm brô 23,2 êklăk čô hđeh mơ̆ng gưl hđeh điêt, gưl sa, gưl dua lehanăn gưl tlâo (ka yap ôh phung hđeh hriăm ti dŭm anôk mjuăt bi hriăm bruă lehanăn mtô mjuăt nanao), srăng đru dul klei ktrŏ ngăn prăk kơ gŏ sang, jing hdră mtrŭn jăk găl mơ̆ng Đảng, Knŭk kna hlăm bruă mtô bi hriăm, djŏ guôp hŏng hdră êlan đĭ kyar mơ̆ng dŭm ala čar đĭ kyar./.