Leh dŭm mmông dôk ngă bruă hlăm adŭ bruă sang să Ea Tul, đảng viên Y Dũng Hwing lŏ klam bruă kiă kriê klei êđăp ênang ti ƀuôn Tu, lehanăn dlăng kriê 8 sào boh durian gŏ sang ñu pla. Mbruă hlăm djăp mta bruă, jih ai tiê hgŭm hlăm bruă yang ƀuôn jih jang bruă ñu ngă mâo čih pioh, mâo pah mni ti “hrue jih jang mnuih ƀuôn sang răng mgang klei êđăp ênang să Êa Tul thŭn 2023” mrâo mkŏ mjing hrue kăm êlâo. Đảng viên Y Dũng Hwing lač:

Jing đảng viên, kâo ngă bruă hlăm ƀuôn čiăng kơ klei hdĭp đĭ kyar, kâo gĭr jih ai tiê hlăm bruă knuă, dăp mmông ngă bruă sang pô lehanăn bruă knŭk kna. Kâo pla boh durian mâo 8 sào mơ̆ng thŭn 2017, thŭn anei čhĭ yuôm năng ai kâo srăng mâo ba wĭt êbeh mơh kơ 1 êklai prăk. Jing khua bruă Đảng ƀuôn, kâo ngă klei bi hmô hŏng mnuih ƀuôn sang, kâo iêo mthưr mnuih ƀuôn sang bi mkrum prăk mkŏ dưm camera pioh răng mgang klei êđăp ênang, êjai hlăm yan hrui êmiêt boh mnga. Mơ̆ng anăn mnuih ƀuôn sang bi mkrum mâo mkŏ dưm leh truh 9 camera răng mgang klei êđăp ênang hlăm buôn Tu. Ară anei hlăm ƀuôn amâo lŏ mâo klei tlĕ dăp msĕ hŏng êlâo ôh.

Ăt kyua čiăng kơ mnuih ƀuôn sang hơĭt klei hdĭp mda ti Ea Tul, đảng viên, Khua mduôn Y- Đhĕ Ayŭn ti ƀuôn Phơng mâo nanao klei kreh kruiñ, thâo gĭr mâo klei bi hmô djăp bruă. Ñu brei thâo, lăn ala mbha leh kơ anak aneh ară ung mô̆ ñu knŏng adôk mă 2 ha lăn kphê, tiu, lehanăn boh durian, grăp thŭn ñu mâo ba wĭt hlăm brô 400 êklăk prăk. Mbĭt hŏng klei thâo duh ƀơ̆ng ñu lŏ kčĕ đru, hâo hưn kơ mnuih ƀuôn sang kreh kriăng bi mă bruă, rŭ mdơ̆ng ƀuôn sang pô đĭ kyar:

Đảng viên jing mnuih ba êlan êlâo, ngă klei bi hmô čiăng kơ jih jang mnuih tui hlue. Mnuih mâo k’hưm jing hlăm găp djuê, wăt găp djuê bi gĭr ktĭr ngă bruă knuă, kơ klei hdĭp pô ară anei. Mơ̆ng leh kâo jing knuă druh hlŏng truh kơ kâo leh wĭt mdei snăn kâo gĭr nanao čiăng mđĭ kyar klei hdĭp mda gŏ sang pô lehanăn đru mnuih ƀuôn sang, lehanăn găp djuê tui hlue pô, gĭr mtă mtăn kơ mnuih ƀuôn sang tui gưt klei bhiăn knŭk kna, hdră êlan mơ̆ng Đảng, bi răng kriê klei êđăp ênang hlăm ƀuôn sang, ngă djŏ hŏng klei bhiăn knŭk kna.

  Ea Tul jing sa hlăm 5 boh să tal êlâo truh kơ anôk kčah mkŏ mkra krĭng ƀuôn sang mrâo ti čar Daklak mơ̆ng thŭn 2016. Ară anei kluôm să mâo êbeh 2.870 gŏ êsei hŏng 12.800 čô mnuih, hlăm anăn mnuih ƀuôn sang Êđê truh 97%. Hnơ̆ng ênoh gŏ êsei ƀun hlăm să knŏng adôk 3,12%, jing ƀiă hĭn hlăm kdriêk Čư̆ M’gar. Bruă Đảng să Ea Tul ară anei mâo 222 čô đảng viên bi mguôp hlăm 18 êpul bruă đảng nah gŭ, hlăm anăn mâo 137 čô đảng viên Êđê, truh giăm 62%, jing lu hĭn hlăm čar Daklak. Y Uốt Ayŭn – Khua bruă Đảng să Ea Tul, brei thâo, dŭm thŭn êgao, phung đảng viên mâo sơăi klei thâo bi hmô hlăm klei duh ƀơ̆ng, thâo răng kriê klei êđăp ênang hlăm ƀuôn sang. Hlăm anăn êdah êdi jing Y Đhĕ Ayŭn lehanăn Y Dũng Hwing, mjing leh ai bi ktưn hlăm klei thâo khăp kơ lăn čar ti ƀuôn sang pô:

Ama Chen tuôm ngă knuă druh să leh, leh woĭt hŏng ƀuôn sang, ăt kreh kriăng ngă bruă knuă, jing mnuih mâo k’hưm hlăm ƀuôn, ngă bruă êjai lehanăn mtrŭt mjhar mnuih ƀuôn sang êjai gĭr ktĭr mă bruă, klei hdĭp jăk siam, amâo mâo klei ngă soh hŏng klei bhiăn knŭk kna ôh. Tal dua jing Y-Dũng Hwing jing knuă druh ngă bruă hdră bhiăn knŭk kna sa, jing mnuih pral kdal, lehanăn thâo săng Y- Dũng pla boh durian, sa thŭn mâo ba wĭt mơ̆ng 200 – 300 êklăk prăk. Mnuih ƀuôn sang bi tui hriăm hdră mă bruă mơ̆ng Y-Dũng, lehanăn să ruah leh ñu jing khua bruă Đảng să, ñu mâo nanao klei thâo bi hmô, mơ̆ng anăn mnuih ƀuôn sang bi tui ngă.

Hŏng dŭm boh tŭ dưn leh mâo hlăm bruă knuă, hlăm klei duh ƀơ̆ng mbruă, wăt hlăm bruă yang ƀuôn, phung đảng viên Y Dũng Hwing, Y Đhĕ Ayŭn mâo leh lu blư̆ dŭm gưl bruă Đảng dŭm dhar bruă brei klei pah mni. Boh nik, hrue jih jang mnuih ƀuôn sang bi răng mgang klei êđăp ênang thŭn 2023 ti să Ea Tul mâo wăt k’iăng khua knŭk kna Trần Lưu Quang nao bi kƀĭn mbĭt, snăn ti anăn Y Dũng Hwing, Y Dhĕ Ayŭn mâo mă klei pah mni. Jih jang klei mđĭ ai anăn lŏ mtrŭ kơ lu phung đảng viên mnuih djuê ƀiă msĕ hŏng Y Dũng lehanăn Y Đhĕ lŏ dơ̆ng ktưn hĭn, mkŏ mjing klei hdĭp gŏ sang pô đĭ kyar, ƀuôn sang ƀrư̆ hrue prŏng sah./.