Alŭ R’Chai 3, să Phú Hội, kdriêk Đức Trọng, čar Lâm Đồng mâo 305 gŏ êsei, hŏng 5 djuê ana ayŏng adei jing Yuăn, K’Ho, Khmer, Tày, Nùng hdĭp mbĭt mbla, hlăm anăn mnuih K’ho jing lu hĭn. Hlăm alŭ mâo 4 klei đăo anăn jing: Klei mrâo mrang jăk; klei đăo Yơng; Cao Đài; lehanăn Đăo Khop.

Phung ƀuôn sang djăp djuê ana hdĭp hlăm alŭ anei kreh kruiñ duh ƀơ̆ng, thâo bi đru hlăm klei hdĭp. Leh găn klei ruă tưp Covid 19, jih jang djăp djuê ana, klei đăo ti anei jih ai tiê duh ƀơ̆ng, mă bruă knuă hrăm mbĭt rŭ mdơ̆ng ƀuôn sang pô đĭ kyar kluôm ênŭm. Thŭn 2022, ênoh mâo ba wĭt tĭng grăp čô mnuih jing 58 êklăk prăk. Jih alŭ adôk 2 gŏ êsei ƀun. Ka Să Ha Nhiếu, khua hlăm bruă mặt trận čar Lâm Đồng, jing mnuih mâo k’hưm hlăm alŭ R’Chai 3, să Phú Hội, kdriêk Đức Trọng yăl dliê: “Kâo mơak kyua ară anei jih jang mnuih hlăm alŭ thâo tui hriăm leh mơ̆ng ayŏng adei Yuăn, bi mlih hdră êlan duh ƀơ̆ng, klei duh mkra pla mjing. Phung ƀuôn sang kơ anei thâo pla leh djăp mta mnơ̆ng mâo ba wĭt klei tŭ dưn prŏng msĕ si: Amrêč; lagim; trŏng msăm, djam mtam, boh ksu, lehanăn kphê... Hlăm alŭ ară mâo leh mơ̆ng 30 – 40% gŏ êsei thâo pla Lagim, kâo ƀuh anei jing klei bi mlih klă mngač leh êdi hlăm klei pla mjing"”

Dă Sar jing să krĭng taih kbưi hlăm kdriêk Lạc Dương, čar Lâm Đồng, jing sa hlăm dŭm boh să krĭng mnuih djuê ƀiă pral bi leh ênoh čuăn mkŏ mkra krĭng ƀuôn sang mrâo. Kluôm să mâo 7.832 gŏ êsei, hŏng êbeh 31.200 čô mnuih; hlăm anăn mnuih djuê ƀiă giăm 70% ênoh mnuih. Hlăm dŭm thŭn êgao, kyua mlih pla mơ̆ng dŭm đang kphê leh khua, bi pla ana rông hluăt mrai- nga bruă rông hluăt mrai, lehanăn pla mjing djam mtam, phung ƀuôn sang dưi mâo leh ênoh ba wĭt hơĭt. Cil Ha Ổn (djuê ana K’Ho) ti alŭ mrô 3, să Dă Sar, kdriêk Lạc Dương, čar Lâm Đồng brei thâo: Lu phung ƀuôn sang kơnei hdĭp jing phung đăo kơ Klei Mrâo Mrang Jăk sơăi, lehanăn mâo leh bruă sang čư̆ êa mjing djăp klei găl mâo mdơ̆ng leh dua boh sang kkuh mpŭ kjăp siam prŏng êhai. Kyua klei hdĭp mda duh ƀơ̆ng đĭ kyar, snăn jih jang phung đăo kơ anei mâo leh klei găl drông mơak Noel hŏng klei h’uh mđao jăk mơak: “Thŭn anei kâo mâo klei čiăng lač jăk kơ bruă sang čư̆ êa dưi mkhư̆ leh klei ruă tưp Covid 19, êbeh kơ dŭm mlan hŏng anei leh, kyuanăn hlăm wưng Noel anei, amâodah hlăm dŭm klei bi kuôl ung mô̆ ƀuh jing êđăp ênang leh. Čiăng kơ Noel mơak hĭn, hmei lŏ iêo êpul tông čing nao bi mguôp mbĭt”.

Liêng Jrang K’Sáu – Khua êpul hgŭm ƀĭng ngă lŏ hma să Dă Sar, kdriêk Lạc Dương brei thâo: Hlăm bruă mkŏ mkra krĭng ƀuôn sang mrâo, mbĭt hŏng bruă klam mơ̆ng jih jang dŭm êpul bruă, phung khua kiă kriê klei đăo hlăm alŭ wăl mâo mtrŭt mjhar leh phung ƀuôn sang bi hgŭm kjăp. Lu gŏ êsei duh myơr leh đa đa lăn, đa hrue ai mă bruă. Mơ̆ng anăn, ƀô̆ mta krĭng ƀuôn sang pô mâo leh klei bi mlih êdi. Liêng Jrang K’Sáu – Khua êpul hgŭm ƀĭng ngă lŏ hma să Dă Sar lač: Jih jang phung đăo kơnei, amâo mâo djŏ hlue gưt klei bhiăn mơ̆ng Đảng, knŭk kna ƀiădah lŏ hdĭp djŏ hŏng klei bhiăn Sang Aê Diê, hdĭp jăk, đăo djŏ. “Phung khua kiă kriê klei đăo, jing phung ba êlan êlâo nanao, ngă klei bi hmô hlăm bruă hlue gưt klei bhiăn knŭk kna, jih ai tiê hgŭm hlăm djăp bruă mtrŭt mjhar, nao anôk bi kƀĭn bruă sang čư̆ êa alŭ wăl, mkŏ mjing klei mtrŭt mjhar phung ƀuôn sang jing phung đăo hlue gưt jăk klei bhiăn knŭk kna”.

Knŏng adôk mă ƀiă hruê đuič jih yơh thŭn anei, drei čhuang mŭt hlăm thŭn 2023, sa yan Noel mrâo srăng lŏ truh. Hlăm dŭm leh êgao, phung khua kiă kriê čar Lâm Đồng, lehanăn djăp alŭ wăl hlăm čar bi nao čuă, hơêč hmưi kơ yan Noel hŏng dŭm boh Sang Aê Diê, mâo čih pioh bi myuôm dŭm klei đru mguôp yuôm bhăn mơ̆ng phung khua kiă kriê klei đăo, phung đăo hlăm alŭ wăl ktuh êyuh duh mkra, mđĭ kyar klei hdĭp mda. Phung khua kiă kriê čar Lâm Đồng lač, bruă sang čư̆ êa djăp gưl mâo klei sa ai nanao, mjing djăp klei găl čiăng kơ djăp mta klei đăo dưi ngă bruă, djŏ hŏng klei jih jang phung đăo čiăng hlăm klei kkuh mpŭ. Lehanăn čang hmăng mơh kơ jih jang phung khua kiă kriê, jing phung Per, Khua Pô Mtô, phung djă bruă hlăm Sang Aê Diê bi êdah nanao ai tiê thâo mpŭ kơ Aê Diê, thâo khăp kơ lăn čar, mtrŭt mjhar jih jang phung đăo gĭr ktir duh ƀơ̆ng, mđĭ kyar klei hdĭp mda, nao hlăm klei bi mguôp jih jang djuê ana./.