Tơdah wưng êlâo dih, lu knuă druh, lĭng kahan răng mgang knông lăn mâo mnuih ƀuôn sang iêô jing phung nai hơô ao mtah, snăn ară anei jing ama kơ lu phung hđeh anak rông kđông kahan răng mgang knông lăn leh anăn đru kơ lu hđeh mâo klei hdĭp dleh dlan dưi nao sang hră.

        Leh djiê ama, amĭ lui pưk sang snăn adei A Ứng, djuê ana Gia Rai, sang ti ƀuôn Grập, să knông lăn Mô Rai, kdriêk Sa Thầy, čar Kon Tum mâo knuă druh, lĭng kahan kđông răng mgang knông lăn Mo Rai iêo ba mjing anak rông. Găl leh 4 thŭn êgao, ară anei A Ứng dôk hriăm adŭ 7 lehanăn mưng leh hŏng klei hdĭp lĭng kahan hlăm kđông. A Ứng ăt tui ngă jih 11 klei bhiăn hlăm sa hrue, lehanăn 3 klei bhiăn hlăm sa hrue kăm kdrưh nik hŏng sa čô lĭng kahan. Dơ̆ng mơ̆ng sa čô hđeh hêñ mlâo ŏ guam, leh mâo kahan răng mgang knông lăn mjuăt bi hriăm, ară anei ñu jhŏng kmlăn leh:

 “Grăp hrue mâo phung lĭng kahan mđing uêñ kơ gơ̆, knă êsei mkra djam. Leh huă ƀơ̆ng nao hriăm hră. Mmông wăn gơ̆ kih sang, đru phung lĭng kahan bruă hdjul. Gơ̆ khăp hriăm hĭn jing klei hriăm Toán, gơ̆ hmăng hmưi êdei anăp srwang ngă kahan răng mgang knông lăn msĕ hŏng di amiêt dôk kiă kriê răng mgang knông lăn ară anei mơh”.

        Jing khua kiă kriê kđông răng mgang knông lăn Mo Rai jao mbha bruă grăp hrue kăp nao atăt lehanăn drông amuôn nao sang hră mơar, Trung úy Hoàng Như Thanh, Khua sa êpul kahan hiu suang brei thâo: A Ứng mâo klei thâo mĭn, mâo klei kreh kruiñ, thâo gĭr. Čiăng bi leh jăk bruă msĕ si sa čô ama, Trung úy Hoàng Như Thanh lŏ ksiêm hriăm kơ bruă rông ba anak aneh:

 “Kâo mrâo ruĕ hriăm ti thŭn 23, ka tuôm klam ngă bruă mơ̆ng sa čô ama ôh, snăn ăt gĭr hŏng gơ̆. Kâo lŏ tui hriăm kơ hdră mjuăt bi hriăm phung hđeh. Tui ksiêm hlăm grăp gưl thŭn, thâo hdră mjuăt bi hriăm, lehanăn lŏ mâo phung ƀĭng kahan hlăm êpul bi đru mtô bi hriăm pô tui mơh”.

Truh kơ ară anei mâo leh 14 boh kđông kahan răng mgang knông lăn čar   Kon Tum rông ba mâo 15 čô hđeh. Digơ̆ jing anak êrĭt sơăi, lĕ hlăm klei hdĭp knap mñai, ƀiădah mâo ai tiê thâo čiăng kpưn đĭ. Tui ngă hdră atăt adei nao sang hră, phung knuă druh kahan răng mgang knông lăn mâo čung ba truh 75 čô hđeh, grăp mlan đru kơ digơ̆ 500.000 prăk.

Mbĭt hŏng bruă atăt adei nao sang hră lehanăn rông ba jing anak rông kơ kđông, hlăm dŭm thŭn êgao, kahan răng mgang knông lăn čar Kon Tum lŏ đru lu phung hđeh hriăm hră ti 13 să knông lăn čar, lŏ dơ̆ng bi lar klei hmăng hmưi mâo nao sang hră mơ̆ng klei phung kahan răng mgang knông lăn đru. Y Ly, djuê ana B’râu, dôk ti ƀuôn Đăk Mế, să Pờ Y, kdriêk Ngọc Hồi, brei thâo tơdah amâo mâo ôh klei kđông kahan răng mgang knông lăn mơ̆ng ƀăng jang knông lăn Bờ Y, anak mniê ñu Y Uyên ară anei hlăk dôk hriăm adŭ 8 năng ai amâo lŏ dưi hriăm hră mơar ôh:

 “Phung kahan đru prăk kơ gơ̆ mâo prăk hriăm hră mơar, bi prăk huă ƀơ̆ng braih huă mâo lĭng kahan mđup brei. Gŏ sang hmei klă sĭt hdơr knga êdi kơ lĭng kahan. Hmei gĭr mtă kơ anak nao sang hră mơar bi tŭ jing, đăm bi ênguôt ôh ai tiê phung lĭng kahan đru leh”.

Mơ̆ng klei mđing uêñ đru ba, mâo klei phung lĭng kahan mđĭ ai, phung hđeh jing anak rông mơ̆ng kđông kahan răng mgang knông lăn čar Kon Tum, lehanăn phung hđeh dôk hlăm hdră đru atăt adei nao sang hră, amâodah dŭm gŏ sang tuôm hŏng klei dleh dlan bi gĭr sơăi hriăm hră mơar. Hlăm dăl dŭm thŭn êgao hŏng bruă klam răng mgang knông lăn 292km bi knông hŏng dua boh lăn čar jing Lao lehanăn Campuchia, êpul kahan răng mgang knông lăn Kon Tum lŏ đru mguôp yuôm bhăn hlăm bruă mjut mjing anak mnuih ti knông lăn ala čar pô./.