Knăm sa ai leh anăn bi lar boh tŭ hdruôm hră “Ktang phĭt, gĭt ktưn bi kdơ̆ng hŏng klei ƀơ̆ng ngăn, klei amâo mâo jăk, đru mkŏ mjing Đảng leh anăn knŭk kna drei ƀrư̆ hruê ƀrư̆ ênuah ênô, kjăp ktang” mơ̆ng Khua gĭt gai Đảng Nguyễn Phú Trọng hlăm dŭm gưl bruă đoàn, hđeh êdam êra hlăm Êpul dŭm anôk bruă gưl dlông, tlam mbruê 13/3, Êpul khua kiă kriê anôk bruă Đoàn mkŏ mjing klei kƀĭn “Phung mda asei dŭm anôk bruă gưl dlông ktang phĭt gang mkhư̆ klei ƀơ̆ng ngăn, klei amâo mâo jăk”.

Hlăm klei kƀĭn, k’iăng khua kiă kriê anôk bruă bi hriăm bruă kđi čar ala čar Hồ Chí Minh Lê Văn Sơn lač klă, anei jing klei kƀĭn trông kreh knhâo bi êdah klei uêñ mĭn mơ̆ng Phung mda asei Dŭm anôk bruă gưl dlông hŏng bruă gang mkhư̆ klei ƀơ̆ng ngăn, klei amâo mâo jăk. Dŭm ksiêm êmuh hlăm klei kƀĭn kñăm kơ dŭm boh klei msĕ: thâo kral klei ƀơ̆ng ngăn, klei amâo mâo jăk, lŏ dơ̆ng mñă klă klei gĭr ktưn gang mkhư̆, bi kdơ̆ng hŏng klei ƀơ̆ng ngăn mơ̆ng Đảng leh anăn knŭk kna mtrŭt mjhar, hluê ngă hŏng sa hdră amâo mâo dưi mklăk. Bi klă dŭm klei đru mguôp mơ̆ng phung mda asei dŭm anôk bruă gưl dlông hlăm bruă gang mkhư̆ klei ƀơ̆ng ngăn, klei amâo mâo jăk hlăm wưng êgao. Hluê anăn ba mdah dŭm hdră êlan, bruă klam kñăm bi lar hĭn klei gĭr mơ̆ng phung mda asei dŭm anôk bruă gưl dlông “Lač amâo mâo hŏng klei ƀơ̆ng ngăn, klei amâo mâo jăk”.