Hŏng bruă klam mơ̆ng sa čô mniê djă akŏ, amai Rơ Châm B’Yich, să Ia Krái, kdriêk Ia Grai, siă suor nanao hŏng bruă êdam êra, lehanăn thâo ba akŏ nanao hlăm klei hur har jih ai tiê. Ñu mkŏ mjing leh êpul “ba anăp mtah klei thâo khăp” bi đru hŏng phung dôk hlăm klei dleh dlan, mđup mnơ̆ng kơ dŭm gŏ sang ƀun, đru phung hđeh hriăm hră mâo klei hdĭp dleh dlan dưi lŏ nao sang hră mơar.

Hŏng dŭm klei gĭr amâo mâo mdei, amai Rơ Châm B’Yich mâo mă leh lu klei pah mni mơ̆ng djăp gưl. Ñu yăl dliê:

 “Kâo mâo klei čiăng duh myơr, mơ̆ng anăn kâo tui duah klei hriăm êmuh, ya mta jing klei jăk klei djŏ mơ̆ng riêng gah. Amĭ kkiêng hlăm sa gŏ sang mâo knhuah gru cách mạng, snăn thâo săng kơ klei yuôm bhăn kơ klei tui hriăm lehanăn hlue ngă knhuah mngač Hồ Chí Minh. Truh thŭn 2024 kâo mâo klei myun dưi tŭ mă klei pah mni hrue 15/10, kâo mơak êdi. Kâo mĭn čiăng mă bruă brei mâo ai tiê thâo duh myơr đuič, kâo amâo mĭn ôh kơ klei čiăng pah mni. Kâo lač jăk kơ phung khua êmua prŏng, lehanăn ti alŭ wăl mâo leh klei mđĭ ai. Asei mlei kâo pô anăp anei srăng gĭr hĭn hlăm djăp mta bruă ngă”.

Thŭn hriăm leh êgao, Nguyễn Hà Bảo Khanh, hđeh hriăm hră adŭ 12C1, sang hră gưl 3 truăn kơ klei mjhuăt bi hriăm Hùng Vương, ƀuôn prŏng Pleiku, knŏng ñu jing hđeh hriăm hră mơ̆ng čar Gia Lai mâo bruă êdam êra gưl dlông Cộng sản Hồ Chí Minh mđup brei anăn knăl “Hđeh hriăm hră mâo 3 klei jăk” ti hnơ̆ng gưl dlông. Amâo mâo djŏ knŏng thâo hriăm hră, ñu lŏ hur har bi mguôp hlăm bruă êdam êra. Ñu nao hgŭm lehanăn mâo mă lu klei pah mni hlăm dŭm klei bi lông, lehanăn mâo mă nanao klei pah mni gưl čar lehanăn gưl dlông, wăt hlăm bruă ksiêm duah klei kreh knhâo, klei rŭ mjing bruă knuă, lehanăn bruă mkra robot. Nguyễn Hà Bảo Khanh lač: 

 “Hlăm jih jang klei bi lông snăn mâo ba wĭt lu klei tŭ dưn kơ phung hđeh hriăm hră, amâo mâo djŏ knŏng kơ klei hơĭt kjăp hlăm dia tiê, tinăn lŏ dưi ƀuh klei mrâo mrang nanao. Leh bi tuôm hŏng phung nao bi lông mbĭt, tinăn pô lŏ mâo lu klei bi hriăm. Lehanăn jing myun hĭn leh kâo mâo mă anăn knăl hđeh hriăm hră mâo 3 klei jăk ti gưl dlông, lehanăn kâo bi mĭn anei srăng jing boh kdrŭt prŏng kơ kâo gĭr hĭn hriăm mjuăt hlăm djăp mta”.

Tui si amai Hồ Thị Giang Thảo, Khua bruă êdam êra čar Gia Lai, phung êdam êra hlăm čar ngă leh lehanăn hlăk lŏ mđĭ hĭn klei thâo ba anăp, amâo mâo mdei hlăm klei hriăm mjuăt, ngă bruă knuă hŏng klei knhêč, mđrăm mbĭt bi rŭ mdơ̆ng ƀuôn sang čar Gia Lai pô ƀrư̆ hrue ƀrư̆ jăk siam mdrŏng sah:

 “Hmei lŏ dơ̆ng ngă djăp hdră mă bruă, ciăng hlue ngă asăp mtrŭn mrô  05 mơ̆ng phŭn bruă kđi čarm, kơ klei hriăm mjuăt knhuah mngač Hồ Chí Minh. Hyuă kjăp klei Đảng hŏng bruă mjuăt bi hriăm knhuah cách mạng, klei dôk dơ̆ng ƀơ̆ng huă dhar kreh hlăm dŭm gưl hđeh mrâo, nao mđrĭng hŏng klei pah mni, bi lar dŭm klei thâo bi hmô jăk, klei yăl dliê jăk mơ̆ng êpul êdam êra. Mbĭt hŏng anăn lŏ dơ̆ng bi lar lehanăn hlue ngă bruă ba anăp hlăm 3 klei bi mguôp čiăng kơ phung mda asei Gia Lai srăng lŏ dơ̆ng bi mguôp nanao mbĭt hŏng dŭm bruă mơ̆ng sang čư̆ êa mkŏ mjing, mtrŭt mjhar êdam êra đru bi mkŏ mkra krĭng ƀuôn sang mrâo, ƀuôn prŏng dhar kreh./.”