Ênoh đĭ kyar hnơ̆ng brei čan mơ̆ng Knơ̆ng prăk đru ba ala ƀuôn kdriêk kah knar grăp thŭn mâo 12%. Kluôm kdriêk mâo 4 êpul mă bruă (hlăm anăn mâo Êpul hgŭm phung mniê). Truh ară anei, mâo leh êbeh 11 êbâo čô, hŏng ênoh brei čan hrăm brô 550 êklai prăk. Jing alŭ wăl mâo ênoh mnuih djuê ƀiă êbeh 70% kdriêk Krông Pa mđing kơ gŏ êsei mnuih djuê ƀiă tơdah dưi čan prăk mnga hdjul mơ̆ng Knơ̆ng prăk đru ba ala ƀuôn čiăng mđĭ kyar bruă duh mkra. Ksor H’ Druin –Khua Êpul hgŭm phung mniê să Čư̆ Drăng, kdriêk Krông Pa brei thâo, alŭ wăl ăt mrâo hưn mdah gru hmô “Ƀuôn phung mniê bi hmô “kñăm mjing klei găl kơ amai adei hlăm êpul bi trông klei thâo hlăm bruă mkra mjing, yua prăk čan tŭ dưn.

 “Čiăng kơ phung amai adei yua prăk čan mơ̆ng knơ̆ng prăk đru ba ala ƀuôn djŏ, snăn hmei ăt mkŏ mjing hiu hưn mtô mblang, ktrâo lač kơ phung amai adei mniê thâo săng. Leh čan prăk snăn pô bi liê hlăm bruă mkra mjing čiăng bi mlih klei hdĭp mda. Mrâo êgao, kâo ăt đru phung amai adei čan prăk, mơ̆ng ênoh čan anei lu gŏ êsei ăt bi liê hlăm bruă pla mjing, rông mnơ̆ng. Truh wưng ară anei snăn lu gŏ êsei yua leh tŭ dưn ênoh prăk brei čan mơ̆ng knơ̆ng prăk đru ba ala ƀuôn čiăng mđĭ kyar gŏ sang”.