Wăt tơdah wăl lăn 3 ha ti să Gào, ƀuôn prŏng Pleiku, mơ̆ng Lê Sỹ Đại (dôk ti Hà Tĩnh) dôk hlăm klei čuăl mkă lăn mnia blei, hdră bruă, ƀiădah pô lăn rŭ mdơ̆ng leh soh hdră bhiăn sa anôk hdră bruă mâo 4 boh sang kyâo, 4 boh pưk 6 kiêng leh anăn giăm pluh boh sang kjăp hŏng êlan bê tông … Hdră rŭ mdơ̆ng mphŭn mơ̆ng thŭn 2020 leh anăn truh ară anei, Knơ̆ng bruă sang čư̆ êa să Gào mkŏ mjing leh 2 hdră mtrŭn bi kmhal mbt hŏng hdră mbŏ mgô̆ klei kơ rŭ wĭt lăn ala. Khădah snăn, leh grăp blư̆ mă hră mtrŭn bi kmhal, Đại lŏ dơ̆ng mkŏ mjing thiăm.  Mrâo anei, Dương Xuân Hồng, K’iăng Khua Knơ̆ng bruă sang čư̆ êa să Gào brei thâo mơĭt hră kơ Knơ̆ng bruă sang čư̆ êa ƀuôn prŏng Pleiku, kčĕ mă mgô̆.

“Hlăm hdră bi kmhal, Knơ̆ng bruă sang čư̆ êa să ăt ngă leh hră mơar, bi kmhal, kčĕ kơ Knơ̆ng bruă sang čư̆ êa ƀuôn prŏng bi mklă bi kmhal. Dŭm blư̆ Knơ̆ng bruă sang čư̆ êa iêô nao mă bruă, ƀiădah pô lăn duah klei amâo dôk ti alŭ wăl, anăn amâo dưi bi tuôm ôh, nao ti sang kăn tuôm rei, mmông nao ksiêm dlăng amâo mâo mnuih mă bruă ôh, mâo bi tuôm hŏng pô sang ôh.”

Msĕ snăn mơh, ti alŭ 5, ƀuôn hgŭm Thắng Lợi, ƀuôn prŏng Pleiku, Vũ Trung Anh leh anăn dŭm gŏ êsei riêng gah ăt rŭ mdơ̆ng sa hdră bruă ti lăn lŏ hma. Tinei, hdră bruă ngă soh mâo ênhă giăm 300m2 mâo lu sang dôh, mnư̆ mnang.  Mrâo anei, hlue si klei hưn mơ̆ng mnuih ƀuôn sang, Knơ̆ng bruă sang čư̆ êa ƀuôn prŏng Pleiku ƀuh ti krĭng lăn lŏ hma tuê êlan Tô Vĩnh Diện (ƀuôn hgŭm Hoa Lư). Nguyễn Văn Tùng, Khua knơ̆ng bruă sang čư̆ êa ƀuôn hgŭm Thắng Lợi brei thâo, mâo lu mta phŭn ba kơ bruă amâo hmao thâo ƀuh, bi ƀuh snăn dleh dưi msir mgaih bi jih dŭm hdră bruă ngă soh.

Hlăm anăn, mâo mta phŭn ngă ngơi mang kơ klei dưi phung knuă druh nah gŭ leh anăn dŭm mta phŭn mkăn mơ̆ng klei mnuih ƀuôn sang čŏng ngă soh:

“Wưng amâo êbeh 1 hruê mơ̆ng leh ngă hră mơar. ƀiădah brei nao snăn mta kčah adôk ti hnơ̆ng ka klă klơ̆ng, bi gưl dlông lŏ mơĭt hră mơar snăn hnuileh. Sa čô ngă soh, ƀiădah pô ngă lu blư̆, dleh kơ ƀuôn hgŭm, hlăk êjai bruă lu, knuă druh nao bi tuôm dleh, hdră bhiăn bi mlih nanao. Klei mĭn mnuih ƀuôn sang dôk čang guôn, lŏ mâo 1 kdrêč bi kdơ̆ng, diñu hlue si klei mĭn đưm, diñu lač hdră bruă anei, hdră bruă dih čiăng bi msĕ.”

 Hlue si klei hưn mdah mơ̆ng Knơ̆ng bruă sang čư̆ êa ƀuôn prŏng Pleiku, mơ̆ng hruê 1/1/2020 truh 31/8/2022, ti alŭ wăl mâo 84 klei ngă soh kơ lăn ala - mkŏ mjing klei bi kmhal, leh anăn mgô̆ kơrŭ wĭt boh klei êlâo anăn. Ƀiădah truh ară anei, knŏng mâo 42 klei dưi msir mgaih. Mai Văn Hoàn, Khua adŭ bruă ngăn dŏ wăl hdĭp mda ƀuôn prŏng Pleiku brei thâo:

“Tinei, bruă kriê dlăng mơ̆ng bruă sang čư̆ êa alŭ wăl.  Dŭm să, ƀuoin hgŭm arăng thâo jih leh, đa đa amâo mđing dlăng ôh.

Mrâo anei, arăng mĭn ngă hdră bruă điêt đuč, ƀiădah leh anăn ƀuh jing prŏng. Hlăk anăn hgao klei dưi, ba ti ƀuôn prŏng, Knơ̆ng bruă sang čư̆ êa ƀuôn prŏng jao bruă klam kơ Knơ̆ng bruă sang čư̆ êa să ƀuôn hgŭm, arăng amâo mđing ôh kơ bruă anei.”

        Hlăm klei bi kƀĭn tal 9, Êpul gơ̆ng bruă ƀuôn sang čar Gia Lai gưl XII (wưng 2021-2026) mrâo êgao, êmuh kơ klei ngă soh rŭ mdơ̆ng hdră bruă soh hŏng hdră bhiăn ti lăn lŏ hma, đa đa phung bi ala lač kơ klei mĭn: Lu hdră bruă prŏng, dưi rŭ mdơ̆ng hlăm wưng sui, ƀiădah bruă thâo ƀuh amâo hmao, msir mgaih amâo jih. Leh hdră bruă bi leh, mgô̆ ruh srăng ngă luič liê kơ klei găl ala ƀuôn, Wĭt lač kơ klei anei, Lương Thanh Bình-  K’iăng Khua Knơ̆ng bruă ngăn dŏ leh anăn wăl hdĭp mda Gia Lai brei thâo:

“Kơ bruă kriê dlăng keh lăn anei ti dŭm alŭ wăl, bruă klam lu jing mơ̆ng Knơ̆ng bruă sang čư̆ êa dŭm alŭ wăl. Kơ bruă klam mơ̆ng dhar bruă, čiăng ƀư̆ mkra dŭm klei êdu kƀah, mkhư̆ mrâo lač, Knơ̆ng bruă ngăn dŏ wăl hdĭp mda kčĕ kơ Knơ̆ng bruă sang čư̆ êa čar. Hlue anăn, Knơ̆ng bruă sang čư̆ êa čar gĭt gai dŭm dhar bruă djŏ tuôm leh anăn dŭm alŭ wăl, mđĭ ktang bruă hâo hưn mtô mblang, leh anăn gĭr msir mgaih dŭm klei ngă soh.”

 Kñăm mđĭ ktang bruă kriê dlăng leh anăn ƀư̆ mkra klei ngă soh kơ lăn ala, krah thŭn 2022, Knơ̆ng bruă sang čư̆ êa ƀuôn prŏng Pleiku mkŏ mjing leh êpul ksiêm dlăng kơ bruă rŭ mdơ̆ng, lăn ala ti dŭm să, ƀuôn hgŭm mâo lu hdră bruă ngă soh, ngă mnuih ƀuôn sang ngêñ bêñ. Mĭn tĭng, truh thŭn 2023, ƀuôn prŏng srăng hưn klă klơ̆ng kơ boh tŭ msir mgaih dŭm hdră bruă rŭ mdơ̆ng soh hdră bhiăn leh anăn bi kmhal phung khua gĭt gai să kƀah ksiêm dlăng, ngă mâo boh klei anei leh anăn sui./.