Klei hriê čuă hŏng boh tŭ mâo lu klei bi hmô, boh nik jing bi hdơr 50 thŭn hruê mkŏ mjing klei mjĕ giăm plah wah 2 ala čar (1973-2023). Hluê si klei mĭn tĭng, aguah mgi 4/4, ti Hà Nội, pô mâo ênŭm klei dưi srăng myơr mnga ti knưng bi hdơr phung djiê êngiă, mdưm kwang mnga leh anăn nao čuă msat khua gĭt gai Hồ Chí Minh.

Leh kơnăn, Khua lăn čar Võ Văn Thưởng srăng gĭt gai mmông tŭ drông  leh anăn blŭ hrăm hŏng pô mâo ênŭm klei dưi ti sang bruă Khua lăn čar. Ăt hlăm hruê, Pô mâo ênŭm klei dưi Australia David Hurley srăng mâo klei bi tuôm hŏng Khua knŭk kna Phạm Minh Chính, Khua bruă kƀĭn ala Vương Đình Huệ. Hluê si pô bi ala Australia, klei hriê čuă mơ̆ng pô mâo ênŭm klei dưi srăng đru bi kjăp 2 ala čar hlăm djăp gưl bruă, bi kjăp klei đăo knang plah wah 2 ala čar, jing klei êdah êdi hlăm thŭn bi hdơr yuôm bhăn anei.