Aguah anei 17/3 ti Hà Nội, pŏk leh knăm mơak bruă klei mrâo kluôm ala thŭn 2023. Knăm mơak bruă klei mrâo mkŏ mjing hlăm 3 hrue mơ̆ng hrue 17/3 - 19/3 hŏng akŏ “Bi mguôp – thơ̆ng kơ bruă – kreh dhar - Mbruă”. Knăm mơak bruă klei mrâo kluôm ala thŭn anei mâo 87 knưng rang mdah mơ̆ng 63 Êpul hgŭm bruă klei mrâo čar, ƀuôn prŏng, 60 anôk bruă klei mrâo gưl dlông, lehanăn alŭ wăl, hlăm anăn lŏ mâo dŭm bruă čuăn mơ̆ng dŭm anôk bruă msĕ si: Sang mđung asăp blŭ Việt Nam, bruă klei mrâo Nhân Dân; Sang mđung rup Việt Nam, Thông tấn xã Việt Nam, Phŭn bruă hâo hưn... lehanăn wăt dŭm anôk bruă jing sang hră mtô bi hriăm kơ bruă klei mrâo, mâo rang mdah djăp mta kdrăp yua kơ bruă klei mrâo ênuk mrâo mrang.

Êdeh êdi hlăm knăm mơak bruă klei mrâo thŭn anei mâo klei bi trông kơ bruă mđĭ kyar bruă klei mrâo, klei bi trông kơ dŭm klei mrâo jing kdlưn hĭn hlăm kluôm ala, mâo mđung leh hlăm hdra mđung asăp Việt Nam; Klei bi trông A.I lehanăn bruă kiă kriê sang čih mkra hră klei mrâo, bi trông kơ bruă mjuăt bi hriăm bruă klei mrâo tui si klei čiăng kơ bruă. Mơ̆ng anăn mnuih ngă bruă klei mrâo hlăm kluôm ala lehăn lu mnuih mkăn mâo klei găl čiăng bi hriăm êmuh, mâo ksiêm dlăng jih jang djăp mta bruă klei mrâo jing jăk hĭn, lehanăn đru mđĭ kyar bruă klei mrâo bi jăk./.