Phŭn bruă Sang hră m’ar mtô bi hriăm mñă srăng rơ̆ng mkăp djăp hdruôm hră kơ thŭn hriăm mrâo. Mbĭt anăn, bruă hluê ngă Hdră mtrŭn mlih mrâo hdră mtô, hdruôm hră hriăm ăt mâo Dhar bruă gĭt gai Anôk bruă kbĭn ala mđing lehanăn mtă kơ Phŭn bruă Sang hră m’ar mtô bi hriăm čih, kđăm mkra djăp ênŭm hdruôm hră hriăm mơ̆ng adŭ 1 truh kơ adŭ 12.

K’iăng Phŭn bruă sang hră mtô bi hriăm Hoàng Minh Sơn brei thâo, hlăm wưng êgao mâo lu klei rŭng răng kơ bruă kƀah hdruôm hră mtô bi hriăm adŭ 4, adŭ 8 leh anăn adŭ 11. Mta phŭn jing kyua dŭm alŭ wăl thŭn anei ruah hdruôm hră êmưt, sa kdrêč kyua bruă bi mklă mơ̆ng dŭm alŭ wăl. Khădah snăn truh ară anei, dŭm alŭ wăl bi mklă leh djăp ênŭm. Khua gĭt gai Phŭn bruă sang hră mtô bi hriăm mâo leh lu blư̆ mă bruă hŏng khua gĭt gai kđăm mkra mtô bi hriăm Việt Nam čiăng ruh mgaih klei dleh dlan, pral kđăm mkra hdruôm hră leh anăn bi leh kđăm mkra hdruôm hră dŭm thŭn êlâo:Hjăn hŏng hdruôm hră mtô adŭ 4, adŭ 8 leh anăn adŭ 11 -jing hdruôm hră mrâo, ară anei mkŏ mjing bi lông kđăm mkra leh anăn kđăm mkra leh hlăm brô 80%. Adôk hlăm brô 20% mơ̆ng tur knơ̆ng dŭm alŭ wăl hưn djăp ênŭm čiăng kơ phung kđăm mkra bruă mtô bi hriăm Việt Nam mâo hdră kčah mkŏ mjing. Leh anăn lŏ dơ̆ng kđăm mkra bi leh čiăng hmao kơ thŭn hriăm mrâo, djăp hdruôm hră mtô kơ dŭm adŭ 4, 8, 11. Snăn bi leh djăp hdruôm hră mtô bi hriăm.

Hŏng bruă čih mkra hdruôm hră mtô bi hriăm, hdră êlan ala ƀuôn, kđăm mkra hdruôm hră mtô bi hriăm jing hdră êlan prŏng dưi kčah hlăm Hdră mtrŭn mrô 88 thŭn 2014 mơ̆ng Bruă kƀĭn ala. Bruă kƀĭn ala gưl 14 ăt mâo Hdră mtrŭn mrô 122 anăn jing tơdah hlue ngă čih mkra hdruôm hră mtô bi hriăm hlue si hdră ala ƀuôn tơdah mâo sa klei hriăm klă klơ̆ng bi leh ƀiă êdi sa hdruôm hră dưi bi mklă snăn amâo dưi pŏk ngă klei čih mkra hdruôm hră mtô bi hriăm yua prăk knŭk kna ôh klei hriăm anăn. Ară anei jih jang klei hriăm mâo sơăi hdruôm hră mtô bi hriăm. K’iăng Khua phŭn bruă Hoàng Minh Sơn hâo hưn: “Tal anei jih jang dŭm adŭ dưi bi mklă 9/12 adŭ mâo sơăi 3 hdruôm hră mtô bi hriăm. Phŭn bruă sang hră mtô bi hriăm srăng ngă kjăp Hdră mtrŭn mơ̆ng Bruă kƀĭn ala - Hdră mtrŭn 122. Kơ anăp srăng lŏ dơ̆ng bi mklă leh anăn ksiêm dlăng 3 hdruôm hră dơ̆ng - 3 hdruôm hră mtô bi hriăm adŭ knhal tuč gưl  jing 5, 9,12.

Klei bi kƀĭn tal 25 mơ̆ng Dhar Bruă kƀĭn ala dôk mkŏ mjing ti Hà Nội ksiêm dlăng akŏ “Bruă hlue ngă Hdră mtrŭn mrô 88 Bruă kƀĭn ala gưl 13 leh anăn Hdră mtrŭn mrô 51 Bruă kƀĭn ala gưl 14 kơ hdră mlih mrâo hdră, hdruôm hră mtô bi hriăm. Dhar bruă kƀĭn ala mtă kơ Phŭn bruă sang hră mtô bi hriăm brei čih mkra jing sa hdruôm hră mtô bi hriăm djăp ênŭm mơ̆ng adŭ 1 truh adŭ 12 mâo 137 hdruôm hră.

Mơ̆ng ksiêm dlăng brei ƀuh, hdră mtô bi hriăm thŭn 2018 dưi mkŏ mjing jăk, bi mlih mơ̆ng klei mtô mơ̆ng đưm jing tă hdră mđĭ kyar knuih jăk, klei thâo hđeh sang hră, bi mklă 5 mta jăk leh anăn 10 mta phŭn brei mđĭ kyar hŏng hđeh sang hră gưl 3. Boh phŭn hdruôm hră păn kjăp klei brei mâo mơ̆ng Hdră mtô bi hriăm mrâo. Bruă čih mkra hdruôm hră dưi iêô jak lu phung thơ̆ng kơ bruă, phung kreh knhâo, phung mâo klei thâo, mâo kơhưm.

Bruă mlih mrâo hdră mtô bi hriăm, hdruôm hră mtô bi hriăm jing bruă ngă yuôm bhăn, mâo lu klei mđing uêñ mơ̆ng phung bi ala kơ mnuih ƀuôn sang lehanăn yang ƀuôn. Hlue si phung bi ala, hdră mtô bi hriăm brei mâo klei bhiăn djŏ, ƀiădah hdră knŏng kčah jing jar klei thâo. Khădah snăn, boh phŭn klei thâo ăt jing yuôm bhăn snăk, brei mâo klei kriê dlăng kjăp mơ̆ng knŭk kna. Kyua anăn brei mâo klei akâo čiăng mâo klei mkra mlih čiăng kơ hdră ngă djŏ. Đỗ Văn Chiến - Khua Dhar bruă gưl dlông mặt trận čar kwar mtă:Bruă brei ngă mtam jing čiăng êdi brei mâo klei bhiăn ktuê dlăng kjăp mơ̆ng hdră čih mkra, kđăm mkra, ba čhĭ leh anăn drei bi hrŏ ênoh hdruôm hră mtô bi hriăm djŏ guôp hŏng prăk hrui wĭt mơ̆ng mnuih ƀuôn sang ară anei. Mnuih ƀuôn sang lŏ mtă hdruôm hră mtô bi hriăm anei brei knŭk kna kriê dlăng ênoh. Mkra mlih brei drei mđing truh. Kyua tơdah ya klei brei kơ phung dleh dlan snăn kâo mĭn jing brei boh hră jing kjăp hĭn. Klei akâo mơ̆ng Êpul ksiêm dlăng jing mâo tur knơ̆ng dưi hlue ngă amâodah hơăi snăn brei ksiêm dlăng êlam bi năng djŏ.

Khua Bruă kƀĭn ala mtă mjêč mâo hră mơar ktrâo lač kơ hdră bi mklă ênoh hdruôm hră mtô bi hriăm, kčah ênoh hdruôm hră, rơ̆ng ktuê dlăng kjăp prăk bi liê mkra ming, bi hrŏ prăk bi liê čiăng bi hrŏ ênoh hdruôm hră mtô bi hriăm. Khua Bruă kƀĭn ala mtă hlue ngă kjăp hlue si boh phŭn Hdră mtrŭn 88 Bruă kƀĭn ala kơ klei mlih mrâo hdră mtô bi hriăm:"Hdră mtrŭn 88 lač: Phŭn bruă sang hră mtô bi hriăm brei mkŏ mjing čih mkra jing sa kdrăp hdruôm hră djăp ênŭm mơ̆ng adŭ 1 truh adŭ 12 mâo 137 hdruôm hră. Dŭm êpul bruă, phung mkăn dưi mtrŭt mjhar hgŭm čih mkra sa amâodah dŭm êpul hdruôm hră hlue si klei dưi, amâo guôn brei čih mkra djăp ênŭm ôh. Hdră mtrŭn 88 jing snăn. Hdră mtrŭn 122 jing mblang kơ boh klei hlăk anăn jing dŭm hdruôm mâo leh phung kăp čhĭ bi mklă leh ƀiădah prăk ka djăp čiăng hlue ngă snăn ka čih mkra ôh hdruôm anăn. Hdră mtrŭn 122 amâo hngah leh anăn amâo hrô ôh kơ Hdră mtrŭn 88.  Kyua anăn boh klei ară anei hlăm êpul ktuê dlăng kâo ƀuh năng ksiêm dlăng, brei drei lŏ ksiêm dlăng dơ̆ng”.