Nao ti dŭm bĭt êlan ti ƀuôn prŏng Ƀuôn Ama Thuôt, čar Dak Lak msĕ si êlan: Phan Chu Trinh, Lê Thánh Tông, Y Jut… dŭm anôk čhĭ ƀêñ trung thu truh mơ̆ng dŭm anăn knăl hing ang dưi bi msiam, dlăng jăk ală êdi. Hluê si amai Bạch Thị Bích Phượng, sa čô čhĭ ƀêñ ti êlan Lê Thánh Tông, thŭn anei amai čhĭ hnưm hĭn mkrah mlan mkă hŏng êlâo ƀiădah tuê blei knŏng mâo ƀiă. “Thŭn anei arăng blei hnưm, amâo mâo blei sa blư̆. Ênoh čhĭ thŭn anei ăt mdê hĭn, mâo đa đa bêñ yuôm ăt êlưih ƀiă mơh, bi ƀêñ čhĭ hliê đĭ 2; 3 êbâo sa klŏ.”

Bi hluê si amai Bạch Thị Sách, pô mâo 10 thŭn čhĭ bêñ trung thu ti Ƀuôn Ama Thuôt, čiăng kơ mnơ̆ng dhơ̆ng amâo mâo êbeh lu đei, amai srăng čhĭ êjai, ktuê dlăng phung blei êjai čiăng nao mă ênoh ƀêñ wĭt čhĭ brei djŏ guôp hĭn. “Ară anei phung blei bêñ ka lu ôh, ăt sui thưt đuč. Dŭm čhĭ jih pô lŏ mă dŭm anăn yơh, pô kăn jhŏng mă lu lei kyua mdê thŭn ñu mdê. Pô čhĭ lu mă lu, čhĭ ƀiă mă ƀiă, amâo mâo pô blei si thâo mjing.”

Ƀêñ trung thu thŭn anei dưi ba čhĭ mâo lu jơr, lu mta mdê mdê. Êngao kơ 2 mta ƀêñ phŭn jing bêñ ăm leh anăn ƀêñ êdjin hŏng mnâo mnañ đưm lŏ mâo thiăm dŭm mta mnâo msĕ si mnâo ariêng, bào ngư, jambon xá xíu, mnâo mnŭ…êngao kơ anăn, lŏ mâo dŭm mta bêñ kơ phung hđeh leh anăn phung amâo mâo ƀơ̆ng kđeh čĭm, phung dôk kăm. Êngao kơ dưi ruah bêñ ti sang čhĭ mnia, ară anei phung blei ba yua lŏ mâo thiăm dŭm klei ruah blei hlăm anôk mnia mblei điện tử amâodah dŭm mbah yang ƀuôn. Amai Trần Thị Ngân, ti ƀuôn hgŭm Tân An, ƀuôn prŏng Ƀuôn Ama Thuôt brei thâo: “Ti anôk čhĭ mnia mâo lu mta bêñ, ƀiădah kâo dê srăng ruah blei bêñ doh êƀăt, siam leh anăn mâo anăn knăl.”

Kñăm răng mgang boh tŭ dưn leh anăn klei suaih pral phung blei ba yua, êpul êya djŏ tuôm dôk mđĭ hĭn bruă ksiêm dlăng, ktuê dlăng anôk čhĭ mnia ƀêñ trung thu čiăng gang mkhư̆ bruă mkra mjing, čhĭ mnia mnơ̆ng mgưt, mnơ̆ng tlĕ čhĭ, amâo mâo thâo bĭt phŭn agha, amâo mâo rơ̆ng kơ hnơ̆ng tŭ jăk, amâo mâo doh êbăt. Giao Thanh Tùng, K’iăng khua kiă kriê Anôk bruă ksiêm dlăng anôk mnia mblei čar Dak Lak brei thâo: “Anôk bruă kriê dlăng anôk mnia mblei tiŏ nao dŭm êpul kriê dlăng tal 1 jing kriê dlăng alŭ wăl, thâo klă dŭm anôk mkra mjing, mnia mblei hluê anăn mâo mă klei hưn ksiêm dlăng phŭn agha bêñ trung thu, anôk mkra mjing ăt msĕ hŏng mnơ̆ng hlăp lêñ kơ phung hđeh. Leh anăn ăt hâo hưn, pah mni dŭm anôk mkra mjing amâodah sang čhĭ mnia ngă jăk, djŏ hŏng klei čuăn hdră bhiăn lăn čar. Bi kơ dŭm anôk ngă amâo mâo djŏ srăng ƀuah mkra ktang phĭt hluê si klei čuăn mơ̆ng klei bhiăn lăn čar, ăt čiăng hưn klă mngač čiăng mtô mjuăt mnuih ƀuôn sang.”

Khua anôk bruă phung hđeh (Phŭn bruă mnuih mă bruă – kahan êka leh anăn yang ƀuôn) Đặng Hoa Nam mrâo mâo hră mtrŭn mñă kơ knơ̆ng bruă mnuih mă bruă, kahan êka leh anăn yang ƀuôn dŭm čar, ƀuôn prŏng gĭt gai, bi mguôp hŏng dŭm anôk bruă, êpul êya djŏ tuôm răng mgang klei êđăp ênang kơ phung hđeh hlăm wưng tết trung thu thŭn 2023. Hlăm anăn, mñă brei rơ̆ng kơ bruă gang mkhư̆ klei pui ƀơ̆ng, klei mtuh êjai phung hđeh yua dŭm mnơ̆ng hlăp trung thu mâo dŭm mta mnơ̆ng ênưih mtuh, ênưih pui ƀơ̆ng msĕ si (pui đĭng mtŭ, pui mơar mâo pui dian čuh, kpŭng đung mâo êwa ênưih pui ƀơ̆ng), bi hrŏ klei čuh pui, phao mơar hlăm mmông drông tết trung thu ti gŏ sang leh anăn dŭm alŭ wăl yang ƀuôn. Rơ̆ng kơ bruă gang mkhư̆ dŭm klei arưp aram kpĕ êka, djŏ mta ruă mơ̆ng dŭm mnơ̆ng hlăp lêñ. Rơ̆ng kơ klei doh êbăt mnơ̆ng ƀơ̆ng huă, gang mkhư̆ klei djŏ ƀơ̆ng mta ruă kơ phung hđeh kyua dŭm mta bêñ, kẹo, boh kroh, êa mnăm leh anăn dŭm mta mnơ̆ng ƀơ̆ng. Rơ̆ng kơ klei êđăp ênang dŭm mta êdeh êdâo hlăm êlan klông mâo lu phung hđeh leh anăn mnuih ƀuôn sang hlăm wưng tết trung thu.

Djŏ tuôm hŏng bruă klam mkŏ mjing tết trung thu kơ phung hđeh, k’iăng khua phŭn bruă mnuih mă bruă, kahan êka leh anăn yang ƀuôn Nguyễn Thị Hà ăt bi klă leh hră mtrŭn mñă kơ bruă sang čư êa dŭm kdriêk, ƀuôn prŏng gưl dlông gĭt gai dŭm knơ̆ng, dhar bruă leh anăn bruă sang čư êa dŭm gưl dăp ngăn prăk mơ̆ng ngăn prăk gưl dlông, iêo jak ai dưi mơ̆ng dŭm êpul êya, grăp čô čiăng nao čuă, mđup brei mnơ̆ng tết trung thu kơ phung hđeh. Hlăm anăn uêñ mĭn kơ phung hđeh mâo klei hdĭp dleh dlan, gŏ sang ƀun, giăm ƀun, hđeh krĭng mnuih djuê ƀiă, krĭng taih kbưi, knông lăn, plao ksĭ, hđeh êrĭt amĭ ama leh anăn hđeh tŭ klei hmăi mơ̆ng klei truh yan adiê, klei ruă tưp./.