Giăm 3 thŭn hŏng anei, Êpul hgŭm bruă mniê čar Hòa Bình pŏk ngă leh lu hdră hlăm bruă mtrŭt mđĭ klei mtăp mđơr êkei mniê, dŭm gưl êpul bruă mniê mđing mtô mblang čiăng mđĭ klei thâo săng kơ phung amai adei mniê mnuih djuê ƀiă bi mlih klei mĭn, hdră nga hlăm bruă tui hriăm, pla mjing, mjĕ mjuk lehanăn hdĭp mda. Kyua anăn, lu phung amai adei mniê dưi mjing leh klei hdĭp mrâo, gĭr ktưn kpưn đĭ tlaih kơ ƀun hơĭt kjăp. Gŏ sang amai Bùi Thị Vịnh, djuê ana Mường, ti să Định Cư, kdriêk Lạc Sơn, čar Hoà Bình êlâo dih jing gŏ sang ƀun, kƀah êwư grăp thŭn. Mơ̆ng leh mâo Êpul bruă mniê kdriêk mtô mblang kơ hdră mtrŭn mđing dlăng mơ̆ng Knŭk kna hlăm hdră đru prăk čan lehanăn klei thâo hlăm bruă pla mjing, amai Vịnh dưi thâo kơ lu hdră rông mnơng, ngă bruă duh mkra dliê, gŏ sang amai mâo leh hnư hrui wĭt hơĭt kjăp. Amai Vịnh brei thâo:

Grăp mlan hmei kreh bi kƀĭn jao bruă sa blư̆ ti să. Msĕ si amai anei dôk ung kbưi, amai adih ăt hlăm alŭ mơh. Grăp čô dôk kbưi mơh ƀiădah amai adei ăt jĕ giăm nanao, thâo bi kah mbha mbĭt. Ară anei, mtăp mđơr jih leh, pô dôk ti alŭ anei ăt mtô mblang lu mơh, bi di amai nao hriăm ăt thâo klei mâo, đru mtô mblang kơ phung amai adei mniê hlăm alŭ. Ară anei amâo lŏ bi kah mbha êkei mniê ôh. Ară anei đĭ kyar leh, mâo lu prăk kơ amai adei čan duh kơ bruă. Prăk čan đru kơ yang ƀuôn amâo dah đru hlăm bruă lŏ hma, ngă hră mơar arăng msir mghaih pral mơh. Pô mâo prăk duh kơ bruă mơh.

Bùi Thị Ngơi, Khua kiă kriê Êpul hgŭm bruă phung mniê kdriêk Lạc Sơn brei thâo: bruă hluê ngă klei mtăp mđơr êkei mniê hlăm krĭng mnuih ƀuôn sang djuê ƀiă dôk mâo dŭm gưl phung mniê mơ̆ng čar truh kơ nah gŭ pŏk ngă kjăp; dŭm gư bruă đảng, bruă sang čư̆ êa alŭ wăl ăt mđing dlăng, kñăm hrăm mbĭt hŏng mnuih ƀuôn sang hlăm ƀuôn hlăm hdră mđĭ kyar bruă duh mkra.

Hluê ngă kjăp hdră mtrŭn, bruă klam, hdră mă bruă mơ̆ng Êpul, snăn hmei mkŏ mjing leh lu hdră bruă. Boh nik mđing dlăng kơ bruă mđĭ hĭn klei thâo kơ phung amai adei mniê. Boh nik, đru kơ phung mniê mphŭn čô̆ kơ bruă, mđĭ klei thâo ngă bruă duh mkra kơ phung mniê. Anei jing sa hlăm dŭm mta kñăm ară anei hmei dôk ngă. Hmei dôk mâo mta kñăm mơ̆ng hdră mă bruă kơ mnuih ƀuôn sang djuê ƀiă lehanăn hdră đru kơ dŭm êpul hgŭm bruă lehanăn êpul gŏ sang mđĭ kyar bruă duh mkra.

Hlăm bruă mtô bi hriăm, čar Hòa Bình ăt mđing ngăn prăk čiăng đru, mjing klei găl kơ phung nai mtô, phung hđeh krĭng taih kbưi, krĭng dleh dlan. Mơ̆ng anăn, hnơ̆ng tŭ bruă mtô bi hriăm ti dŭm krĭng dleh dlan dưi mkra mđĭ. Knŏng ti kdriêk Cao Phong, ară anei jih jang čô anak mnuih djuê ƀiă hlăm gưl thŭn hriăm gưl 2,3 ti dŭm să krĭng dlông dưi nao hriăm ti sang hră ciêm rông hđeh mnuih djuê ƀiă. Adei Triệu Hương Giang, ti să Yên Lập, 6 thŭn hŏng anei dôk hriăm ti Sang hră čiêm rông phung hđeh mnuih djuê ƀiă Cao Phong brei thâo:

Dŭm hdră mtrŭn phung hđeh hmei dưi dưn kluôm ênŭm leh. Mâo sang hră, anôk hriăm ênŭm mnơ̆ng, prŏng siam. Kơ klei găl, hmai dưi mkăp mnơ̆ng yua hriăm hră, hdruôm hră mơar mâo mkăp jih. Hmei knŏng hriê hriăm hră đuič. Phung nai mtô hlăm sang hră msĕ si ama, amĭ dlăng kriê hlăm grăp mnĭt mmông wăt kơ klei huă ƀơ̆ng, pĭt đih kơ hmei.

Hluê si Knơ̆ng bruă Sang hră mơar mtô bi hriăm mơ̆ng čar Hoà Bình, phung hđeh ti gưl thŭn hriăm hră dưi nao hriăm ti alŭ wăl ară anei mâo êbeh 99%. Krĭng jăk găl hĭn msĕ si ƀuôn prŏng, wăl krah mâo leh 100%. Anôk bruă mtô bi hriăm čar Hòa Bình ăt mđing mđĭ hnơ̆ng tŭ êpul knuă druh, nai mtô dŭm gưl, mlih mrâo hdră mtô djŏ guôp hŏng grăp klei mâo mdê mdê kñăm mđĭ hnơ̆ng tŭ bruă mtô bi hriăm kơ jih jang phung hđeh mnuih djuê ƀiă.

          Dưn dŭm hdră mtrŭn, hdră bhiăn; bi mlih jăk hlăm klei mĭn, hdră ngă, bi mlih hlăm djăp mta ra bruă hlăm klei hdĭp, hriăm hră,mjĕ mjuk mơ̆ng mnuih ƀuôn sang djuê ƀiă ti Hòa Bình jing klei bi êdah klă kơ bruă rơ̆ng klei dưi êngiê anak mnuih mâo bi mklă leh hlăm Klei kuôl kă tar rŏng lăn kơ bruă lăm lui klei kah ana mbha djuê mâo Việt Nam jing ala čar hgŭm./.