Ti Knăm trŭn kơ bruă mkŏ mkra krĭng ƀuôn sang mrâo, lehanăn ƀuôn prŏng dhar kreh akŏ yan mnga Quý Mão 2023, 10 kdriêk, ƀuôn prŏng čar Kon Tum ngă mtam lu mta bruă mkŏ mkra krĭng ƀuôn sang mrâo, lehanăn ƀuôn prŏng dhar kreh, msĕ si: mkra êlan betong hlăm ƀuôn sang, mkŏ mjing êlan doh siam lehanăn mtah mda, ba yua klei kreh knhâo, êđai mjeh mnơ̆ng pla mnơ̆ng rông  jăk kơ phung ƀuôn sang mđĭ kyar klei hdĭp... Jing kdriêk dôk hlăm klei dleh dlan hlăm čar Kon Tum, Võ Trung Mạnh, khua knơ̆ng bruă sang čư̆ êa kdriêk Tu Mơ Rông brei thâo, kdriêk trŭn ngă djăp mta bruă ba klei tŭ dưn kơ phung ƀuôn sang lehanăn yang ƀuôn:

“Leh knăm mtrŭt mjhar trŭn kơ bruă akŏ thŭn, knơ̆ng bruă sang čư̆ êa kdriêk ngă mtam djăp mta bruă, hlăm anăn jing mđing kơ dŭm bruă ala čar kñăm. Pŏk klei rang mdah ana Sâm Ngọc Linh mguôp hŏng bruă hiu čhưn ênguê ba wĭt leh lu klei tŭ dưn jăk hŏng phung ƀuôn sang, hŏng phung duh mkra, lehanăn kơ kdriêk. Ngă bruă kuč mngač pui kmlă hlăm ƀuôn sang, čiăng bi mâo ƀuôn sang êđăp ênang, kreh dhar. Trun nao bi ksiêm jih jang mnơ̆ng čhĭ mnia mgưt, mnơ̆ng amâo mâo jăk, boh nik dŭm mta mnơ̆ng djŏ tuôm hŏng êa drao Sâm Ngọc Linh. Ngă djăp mta bruă hŏng klei kjăp, tŭ jing lehanăn êđăp ênang”.

        Hlăm dŭm hrue akŏ thŭn mrâo, Phung khua kiă kriê čar, khua kiă kriê bruă Đảng čar, knơ̆ng bruă sang čư̆ êa, Êpul gơ̆ng bruă ƀuôn sang, lehanăn Êpul bruă mặt trận čar Daklak mâo mkŏ mjing leh truh 4 êpul nao čuă lehanăn bi tuôm ƀô̆ mta hŏng mnuih ngă bruă ti dŭm knơ̆ng bruă, kñăm mđĭ ai jih jang êpul êya gĭr hgao klei dleh dlan, ba wĭt boh tŭ dưn hlăm thŭn 2023. Boh nik êpul nao čuă knơ̆ng bruă tă kčoh Lục Thiêm Daklak; knơ̆ng bruă kphê Ngon; knơ̆ng bruă mnia mblei hŏng ala tač êngao 2/9; Sang mkra mjing beer Sài Gòn Daklak lehanăn knơ̆ng bruă êa pơ̆ng Daklak.

            Ti sang mkra mjing Beer Sai Gon Daklak, Phạm Ngọc Nghị, k’iăng khua bruă Đảng čar, Khua knơ̆ng bruă sang čư̆ êa čar bi tuôm hŏng mnuih ngă bruă lehanăn phung khua kiă kriê knơ̆ng bruă anei. Hlăm thŭn 2022 Sang mkra mjing anei mâo mkra mjing leh êbeh 100 êklăk lit, ba jao ngăn prăk kơ knŭk kna giăm 900 êklai prăk, jing giăm 10% ênoh ngăn prăk car mâo hrui wĭt. Sang mkra mjing mâo kah leh giăm 1 êklai prăk đru kơ bruă hdĭp md âla ƀuôn hlăm čar.

Bi ala kơ phung khua kiă kriê čar, Phạm Ngọc Nghị bi mni lehanăn bi myuôm jih jang klei gĭr mơ̆ng sang mkra mjing beer Sai Gon Daklak hlăm thŭn 2022, lehanăn čang hmăng hŏng boh tŭ dưn leh mâo sang mkra mjing beer lŏ dơ̆ng mđĭ hĭn ai ktang pô, duh mkra mnia mblei mâo boh tŭ dưn hĭn hlăm wưng kơ anăp.

“Kâo čang hmăng kơ diih lŏ mđĭ hĭn boh tŭ dưn leh mâo hlăm thŭn 2022, lŏ dơ̆ng mâo klei bi mguôp sa ai tiê, mâo lu klei mlih mrâo, hŏng klei mĭn mrâo amâo mâo djŏ knŏng beer, ƀiădah mnơ̆ng mkăn êngao kơ beer. Drei ăt kruak ênoh čuăn, čiăng kpưn đĭ mâo mnia mblei hŏng ala tač êngao, čang hmăng srăng mđĭ ênoh mâo ba wĭt lu hĭn, mă bruă đĭ kyar hĭn. Bi ala kơ êpul ngă bruă hơêč hmưi kơ diih, lehanăn găp djuê sa thŭn mrâo mâo klei jăk jĭn, êđăp ênang lehanăn mdrŏng sah hĭn”.

    Kkuh mơak bi hdơr 93 thŭn hrue mkŏ mjing Đảng lehanăn anăp truh bi hdơr 15 thŭn hrue mkŏ mjing wăl krah Ƀuôn Hô, knơ̆ng bruă sang čư̆ êa wăl krah Ƀuôn Hô, čar Daklak mkŏ mjing bruă mphŭn trŭn rŭ mkra 4 mta bruă prŏng hlăm êlan klông hŏng ênoh bi liê jih jang hlăm brô 37 êklai prăk lehanăn mkă tĭng srăng bi leh hlăm 3 mlan gưl 2 lehanăn gưl 3 thŭn anei. Jih jang bruă anei jing lŏ mkra mđĭ êlan klông, pŏk phai klei êrô êbat kơ mnuih ƀuôn sang jăk hĭn. Mơ̆ng anăn, ƀrư̆ ƀrư̆rŭ mdơ̆ng wăl krah Ƀuôn Hô jing ƀuôn prŏng mta 3 hlăm thŭn 2025 tui si hdră mtrŭn mơ̆ng klei bi kƀĭn prŏng Đảng wăl krah Ƀuôn Hô tal 17.

        Đặng Gia Duẩn, Khua knơ̆ng bruă sang čư̆ êa wăl krah Ƀuôn Hô lač, hŏng klei trŭn kơ bruă hlăm dŭm hrue tal êlâo mtam hlăm akŏ thŭn, wăl krah srăng ngă bruă hŏng klei tŭ jing tui si klei dưi mơ̆ng knŭk kna. Lehanăn, mđĭ hĭn klei iêo jak ngăn prăk duh bi liê, ktưn dưi rŭ mdơ̆ng wăl krah Ƀuôn Hô jing anôk phŭn kơ klei duh mkra, dhar kreh, yang ƀuôn hlăm krĭng nah dưr čar Daklak, mâo bruă klam yuôm bhăn kơ klei mđĭ kyar hlăm krĭng:

“Hŏng sa klei gĭr jih hnơ̆ng hlăm bruă kđi čar snăn bruă Đảng, Êpul gơ̆ng bruă ƀuôn sang, knơ̆ng bruă sang čư̆ êa wăl krah hlăk gĭr nanao hlăm grăp hruê, lehanăn pai ngă mtam dŭm bruă knơ̆ng msĕ si pŏk phai êlan klông bi prŏng siam, mtah doh hĭn, ênuk mrâo hĭn bi năng hŏng klei jing wăl krah. Lehanăn hlăm wưng kơ anăp, lŏ dơ̆ng mghaih msir bi jih ya mta bruă dôk dleh kpăk, lehanăn lŏ iêo jak klei duh bi liê, lŏ mâo lu mta bruă yuôm bhăn dưi mgaih msir, mâo rŭ mkra, đru kwăl krah Ƀuôn Hô knư̆ hrue khrue knư̆ jing hing ang ênuk mrâo hĭn”./.