Khua gĭt gai Đảng Nguyễn Phú Trọng lač klă hdră êlan hŏng tač êngao prŏng hĭn mơ̆ng Việt Nam jing êngiê, čŏng pô, êđăp ênang, bi hgŭm, bi mguôp leh anăn mđĭ kyar, bi lu jơr, lu tĭng klei mjĕ giăm hŏng tač êngao. Khua gĭt gai Đảng Nguyễn Phú Trọng leh anăn Khua mil čhil Biden bi tŭ hlăm boh sĭt brei ƀuh leh dŭm mta yuôm bhăn mrô 1 hŏng klei đĭ kyar klei mjĕ giăm Việt Nam – Mi jing bruă mpŭ kluôm dhuôm kơ hdră bhiăn tă hdră kơ klei mjĕ giăm dua lăn čar. Khua gĭt gai Đảng mñă klă klei bi thâo săng hdơ̆ng pô, mpŭ kơ boh tŭ hnơ̆ng pô leh anăn amâo mâo mjhuak hlăm dŭm mta bruă mdê mdê jing mâo boh tŭ dưn yuôm bhăn.

Khua gĭt gai Đảng yap yuôm bhăn dŭm mta phŭn dưi mâo klei kuôl kă plah wah khua gĭt gai 2 lăn čar kơ klei bi klă mbĭt mđĭ hnơ̆ng klei mjĕ giăm Việt Nam – Mi jing ƀĭng hgŭm bi mguôp hdră êlan kluôm dhuôm  kyua klei êđăp ênang, bi mguôp leh anăn đĭ kyar kjăp. Hluê anăn, Khua gĭt gai Đảng Nguyễn Phú Trọng mñă ktang đa đa hdră êlan prŏng čiăng mtrŭt mđĭ klei mjĕ giăm Việt Nam – Mi. Hlăm anăn lŏ dơ̆ng mđĭ klei thâo săng hdơ̆ng pô, hluê ngă dŭm hdră tă, mkŏ mjing klei hơĭt sui, bi tuôm, bi mguôp gưl dlông, plah wah dŭm dhar bruă, dŭm gưl bruă, mjĕ êrô mnuih ƀuôn sang.