Tlam mbrue 27/2, ti Anôk bruă Phŭn bruă lĭng kahan (Hà Nội), Thượng tướng Hoàng Xuân Chiến, K’iăng khua phŭn bruă lĭng kahan, Khua êpul kiă kriê bruă mgaih bi jih boh bom min, lehanăn mta êa drao ruă leh klei bi blah ti Việt Nam (jing hlăm êpul kiă kriê mrô Ban 701) mă leh bruă hŏng êpul khua bi ala knŭk kna Mi ti Việt Nam Marc E.Knapper kơ bruă mgaih bi jih boh bom min leh klei bi blah ti Việt Nam.

Bi êdah ai tiê mơ̆ng Việt Nam hlăm klei hgŭm bi mdoh boh bom min anei mbĭt hŏng Mi, Thượng tướng Hoàng Xuân Chiến đăo knang hlăm wưng kơ anăp, klei bi mguôp anei srăng mâo ngă mtam, lehanăn čang hmăng tĭng kơ Mi lŏ dơ̆ng đru nanao kơ Việt Nam bi mdoh tơl jih bom min, mnơ̆ng mtuh mơ̆ng ênuk bi blah, čiăng dưi mâo krĭng lăn doh siam amâo mâo lŏ dôk ôh djah boh mtuh, ba wĭt klei êđăp ênang kơ mnuih ƀuôn sang duh ƀơ̆ng. Thượng tướng Hoàng Xuân Chiến mñă Việt Nam srăng lŏ dơ̆ng mjing djăp klei găl, bi mguôp kjăp hŏng Mi hlăm djăp mta bruă čiăng kơ klei hgŭm dua nah mâo klei tŭ dưn hĭn lehanăn bi leh mta kñăm čoh čuăn leh./.