Thâo klă bruă klam yuôm bhăn mơ̆ng krĭng Lăn Dăp Kngư, mơ̆ng thŭn 1993, Khua gĭt gai Sang mđung asăp blŭ Việt Nam bi klă mkŏ mjing anôk bruă jưh ti krĭng Lăn Dăp Kngư mâo anôk mă bruă ti ƀuôn prŏng Ƀuôn Ama Thuôt, hlăk anăn jing wăl krah mơ̆ng čar Dak Lak. Anei jing sa hdră êlan klă sĭt amâo mâo djŏ knŏng mâo knhuah čŏng pô hlăm bruă pŏk mlar klei đĭ kyar mơ̆ng Sang mđung asăp blŭ Việt Nam, ƀiădah lŏ mâo boh tŭ dưn kđi čar hlăm wưng krĭng Lăn Dăp Kngư dôk hrăm mbĭt đĭ kyar hŏng ala čar. Lê Đình Đạo, k’iăng khua kiă kriê hđăp Sang mđung asăp blŭ Việt Nam, jing khua kiă kriê tal êlâo mơ̆ng anôk bruă jưh ti krĭng Lăn Dăp Kngư lŏ wĭt hdơr:

          “Anôk bruă Sang mđung asăp blŭ Việt Nam jưh ti krĭng Lăn Dăp Kngư hlăk anăn mâo mă 2,3 čô knuă druh mơ̆ng Hà Nội. Hmei ngă klei blŭ hrăm leh anăn mkŏ mjing klei bi lông hrŏng mă phung hđeh leh jih hriăm ti Sang hră gưl prŏng Lăng Dap Kngư, nao truh ti ƀuôn sang čiăng tui duah phung mâo klei thâo mđung asăp blŭ hŏng klei blŭ mnuih djuê ƀiă. Bi kơ mnơ̆ng yua, kdrăp yua, kyua mâo klei đru mơ̆ng dŭm anôk bruă ti wăl krah Ƀuôn Ama Thuôt hlăk anăn, hmei dưi mưn sang mă bruă, mtih hŏng ƀrĭk, čuôr tôl jing anôk dôk leh anăn anôk mă bruă”.

Pô ngă bruă klei mrâo Y-Khem Niê jing sa čô hlăm phung mblang – mđung asăp blŭ klei Êđê tal êlâo mơ̆ng Anôk bruă Sang mđung asăp blŭ Việt Nam jưh ti krĭng Lăn Dăp Kngư. Găn leh 30 thŭn ngă bruă ƀiădah ăt hdơr nanao kơ mmông mđung asăp blŭ tal êlâo mơ̆ng VOV Lăn Dăp Kngư.

          “Mmông anăn amâo mâo măi tĭnh čiăng wĭt hmư̆ msĕ ară anei ôh. Wĭt kơ sang pŏk radiô hmư̆ asăp pô mđung. Pŏk đĭng mmuñ mâo aduôn, aê, mô̆ anak hmư̆ mbĭt. Hmư̆ asăp pô mđung, ƀuh myưng mơang êdi.”

30 thŭn leh êgao, phung ngă bruă klei mrâo VOV ti krĭng Lăn Dăp Kngư klă sĭt jing phung lĭng kahan ba anăp hlăm bruă dhar kreh, ngă jăk bruă klei mrâo cách mạng: jing pô hâo hưn hdră êlan, hdră mtrŭn mơ̆ng Đảng, hdră êlan leh anăn klei bhiăn lăn čar. Mâo klei kăp hưn hmar – djŏ. Mbĭt anăn ktrâo klă dŭm klei mĭn soh čhuai, bi rai hdră mnêč čiăng bi luč klei êđăp ênang, đru mguôp hlăm klei đĭ kyar krĭng Lăn Dăp Kngư. Dŭm pluh klei pah mni bruă klei mrâo ala čar hlăm dŭm thŭn êgao dưi mđup brei kơ phung ngă bruă klei mrâo VOV krĭng Lăn Dăp Kngư, jing klei bi klă, čih yap mơ̆ng Đảng leh anăn knŭk kna kơ dŭm klei gĭr phung čih klei mrâo mơ̆ng Anôk bruă Sang mđung asăp blŭ Việt Nam jưh ti krĭng Lăn Dăp Kngư.

Čih yap klei đru mguôp mơ̆ng Anôk bruă Sang mđung asăp blŭ Việt Nam jưh ti krĭng Lăn Dăp Kngư, Đảng, knŭk kna mâo leh lu klei pah mni msĕ si mêđai mă bruă mrô 3, mrô 2 leh anăn mrô 1 ti dŭm thŭn 2004, 2008 leh anăn thŭn 2015, Hla čhiăm gru lông bi ktưn knŭk kna thŭn 2018. Pô ngă bruă klei mrâo Vũ Hải Định, khua kiă kriê VOV Lăn Dăp Kngư brei thâo:

“Hmei kñăm kơ bruă mlih mrâo mta phŭn dŭm hdră mđung asăp blŭ mnuih djuê ƀiă hlăm klei mjĕ giăm hŏng mnuih ƀuôn sang dŭm djuê ana. Hmei kñăm kơ mta msĕ si klei čih, klei blŭ hrăm, boh nik jing klei čih hlăk mblang, wĭt lač êlam, mâo knhuah phung ktuê dlăng ktang. Phung ngă bruă klei mrâo mơ̆ng hmei amâo mâo uêñ nao truh ti dŭm krĭng dleh dlan, boh nik hlăm wưng klei ruă tưp Covid-19. Tal 2 jing hmei kñăm duh bi liê mđĭ kyar mnuih mă bruă hluê si hnơ̆ng čuăn bruă klei mrâo mrâo mrang. Hmei kñăm kơ klei mrâo mrang mrô, mđĭ hnơ̆ng tŭ jăk mơ̆ng bruă kriê dlăng truh kơ klei hiu čih klei mrâo mơ̆ng phung ngă bruă klei mrâo. Mâo lu hdră ksiêm duah, klei čih kreh knhâo, klei kčĕ mrâo mrang dưi dưn yua hlăm boh sĭt, rơ̆ng kơ hnơ̆ng tŭ jăk.”

Dŭm gưl khua kiă kriê, phung mă bruă anôk bruă Sang mđung asăp blŭ Việt Nam jưh ti krĭng Lăn Dăp Kngư ktưn hưn đru mguôp hlăm klei đĭ kyar ti krĭng Lăn Dăp Kngư. Đỗ Tiến Sĩ, khua hlăm bruă Đảng gưl dlông, khua knơ̆ng kiă kriê Sang mđung asăp blŭ Việt Nam brei thâo:

          “Anôk bruă Sang mđung asăp blŭ Việt Nam jưh ti krĭng Lăn Dăp Kngư lŏ dơ̆ng bi lar knhuah gru bi mguôp, mbruă, nao klă hŏng boh sĭt, hâo hưn pral. Mbĭt anăn lŏ pŏk ngă dŭm hdră êlan mlih mrâo čiăng drei dưi bi mlar, hluê ngă bruă klam hâo hưn, boh nik hâo hưn kơ dŭm hdră êlan mơ̆ng Đảng, knŭk kna ăt msĕ hŏng dŭm čar, ƀuôn prŏng ti alŭ wăl krĭng Lăn Dăp Kngư hŏng mnuih ƀuôn sang djăp djuê ana. Čiăng kơ hluê anăn dưi ƀuh klei uêñ mĭn mơ̆ng Đảng, knŭk kna, leh anăn klei gĭt bi mguôp sa ai mơ̆ng dŭm djuê ana Việt Nam dưi čih hưn klă sĭt ti krĭng Lăn Dăp Kngư. Hlăm wưng kơ anăp, kâo hmăng hmưi anôk bruă Sang mđung asăp blŭ Việt Nam jưh ti krĭng Lăn Dăp Kngư bi lar jăk ai tiê bi mguôp čiăng mđĭ klei trông mă bruă knuă čiăng kơ drei mkŏ mjing êpul phung ngă bruă klei mrâo lŏ tŭ jăk hĭn. Drei čiăng mâo êpul phung đru ngă bruă djŏ guôp čiăng mđĭ hĭn bruă hâo hưn truh kơ nah gŭ.”

Bi hdơr 30 thŭn hruê mkŏ mjing Anôk bruă Sang mđung asăp blŭ Việt Nam jưh ti krĭng Lăn Dăp Kngư. Mơ̆ng gru kruăk anei, êpul êya phung knuă druh, phung čih klei mrâo, phung mblang, phung čih mkra leh anăn mnuih mă bruă hlăm anôk bruă lŏ dơ̆ng čuê kơ phung ayŏng ama čiăng ñŭ kma mbĭt hŏng sang dôk mbĭt VOV ba Asăp blŭ Việt Nam nao kbưi hĭn./.