Dŭm hruê akŏ mlan 6, ti sang hră gưl 3 Ƀuôn Ama Thuô̆t, hđeh sang hră dôk hnêč ksiêm wĭt klei hriăm, lông ngă leh anăn hriăm klei bi lông. Adei Trần Quốc Trung, hriăm adŭ 12A14 brei thâo, ñu dôk ksiêm wĭt lu klei bi lông dŭm thŭn êlâo, dlăng klei bi lông lu sang hră mkăn čiăng mprăp kơ mta kñăm hrŏng ruah hriăm gưl prŏng. Ñu mâo leh hnưm hdră êlan hriăm klă klơ̆ng kơ grăp mta, čŏng pô ksiêm duah klei hưn leh anăn hdră hrŏng ruah mơ̆ng dŭm sang hră.

= “Kâo lŏ dlăng dŭm klei bi lông ti dŭm thŭn êlâo, ksiêm dlăng lu klei bi lông ti dŭm sang hră mdê mdê, mâo hdră êlan hriăm grăp mta leh anăn ksiêm duah lu klei hưn hlăm mạng mơ̆ng phung ayŏng amai gưl êlâo čiăng dưi mâo nao hriăm ti Sang hră gưl prŏng bruă duh mkra ƀuôn prŏng Hồ Chí Minh hŏng tlâo mta hriăm phŭn jing Toán, klei Anglei leh anăn Vật Lý.”

Nah tluôn dŭm mmông hriăm mjêč mơ̆ng hđeh sang hră jing klei hrăm mbĭt mơ̆ng phung nai leh anăn gŏ sang. Nai Nguyễn Thị Xuân Hương, khua kiă kriê sang hră gưl 3 Ƀuôn Ama Thuô̆t brei thâo, leh klei bi klă hnơ̆ng jăk hđeh sang hră hŏng dŭm gưl ksiêm dlăng, sang hră mkŏ mjing leh hdră êlan đru găl guôp hŏng grăp čô. Sang hră ăt bi mguôp hŏng phung amĭ ama leh anăn bruă mdrao mgŭn čiăng rơ̆ng klei suaih pral, ai mĭn kơ phung hđeh êlâo kơ gưl bi lông.

= “Bi hŏng phung hđeh amâo mâo jăk klei suaih pral, bi mguôp hŏng anôk mdrao mgŭn čiăng mtô kơ phung hđeh rơ̆ng mâo djăp klei suaih pral čiăng mŭt hlăm gưl bi lông bi ruê̆ klei hriăm. Bi hŏng phung hđeh klei hriăm ka kjăp čiăng jao kơ grăp čô nai, mtô kơ diñu amâo djŏ knŏng ti sang hră ƀiădah wăt êngao mmông hriăm, amâo mâo mă prăk hŏng diñu. Mbĭt anăn ăt gĭt gai phung nai kiă adŭ hriăm čŏng bi mguôp hŏng phung nai mtô, phung amĭ ama mbĭt hŏng klei gĭt gai mơ̆ng sang hră mđĭ čiăng mđĭ hnơ̆ng dưi hlăm klei bi lông mơ̆ng phung hđeh.”

Hluê si knơ̆ng bruă sang hră mơar čar Dak Lak, bruă ksiêm wĭt klei hriăm dưi ngă hluê si klei thâo hđeh sang hră, kñăm kơ êpul phung hđeh mâo klei arưp amâo mâo dưi hlăm klei bi lông. Mbĭt hŏng dŭm mta thơ̆ng kơ bruă, čar Dak Lak mjêč bi leh bruă mprăp kơ klei bi lông. Kluôm čar mâo 1 êpul gơ̆ng bi lông hŏng 64 anôk bi lông klă klơ̆ng leh anăn 55 anôk bi lông mkăp, hlăm brô 1.500 adŭ bi lông klă klơ̆ng leh anăn 40 adŭ dôk guôn. Hlăm brô 5 êbâo čô knuă druh, phung nai, phung mă bruă leh anăn dŭm êpul bruă djŏ tuôm srăng nao hgŭm đru kơ klei bi lông.

Lê Thị Thanh Xuân, Khua knơ̆ng bruă sang hră mơar čar Dak Lak brei thâo, gưl bi lông thŭn anei mâo hnơ̆ng prŏng hŏng ênoh phung lu lông lu, alŭ wăl prŏng kyuanăn mâo wăt bruă kđi čar, mñă kơ bruă bi mguôp čiăng mđĭ hĭn, kjăp hĭn, hrăm mbĭt hĭn.

= “Mkŏ mjing ksiêm dlăng kluôm leh anăn hmao gĭt gai dŭm anôk bi lông msir kơ adŭ hriăm, jhưng mdhô̆, camera, kdrăp yua, rơ̆ng kơ dŭm anôk dưi ruah mâo djăp klei găl mkŏ mjing gưl bi lông êđăp ênang. Kơ bruă mnuih mă bruă čŏng pô tĭo nao djăp ênoh knuă druh, phung nai leh anăn mprăp klei mtô kơ hdră bhiăn, klei ngă bruă kơ jih jang phung knuă druh. Dlăng kluôm, bruă mprăp, klei bi mguôp leh anăn hluê ngă bruă klam truh kơ wưng anei dưi rơ̆ng klei čŏng pô, kjăp leh anăn djŏ hdră kčah.”

Hŏng klei mprăp mơ̆ng hnưm mơ̆ng dŭm sang hră, klei hriăm mbĭt mơ̆ng phung nai leh anăn klei gĭr mơ̆ng dhar bruă sang hră mơar, čar Dak Lak dôk mŭt hlăm wưng knhal tuč êlâo kơ gưl bi lông hŏng mta kñăm rơ̆ng kơ gưl bi lông êđăp ênang, djŏ hdră bhiăn leh anăn mkŏ mjing djăp klei găl kơ phung hđeh sang hră, boh nik phung hđeh sang hră dleh dlan, mâo klei găl bi lar jăk hĭn klei thâo pô.