Êjai dôk răng kriê anak ruă ti sang êa drao khŏ čar Daklak, amai H’Loanh Niê ti să Čư̆ Dliê M'nông, kdriêk Čư̆ Mgar brei thâo, anak ñu mâo klei ruă amâo mâo jăk hlăm dlô mơ̆ng điêt leh, kyua mâo mnăm êa drao jêñ jêñ lehanăn mkă dlăng nanao, snăn klei ruă mdul hĭn mơh. Siămdah, hlăm dŭm hrue giăm anei, adiê mđiă hlơrr sui, ngă kơ klei ruă đuĕ nao kơ kjham hĭn, kreh bi hrut, lehanăn blŭ plă plia.

“Yăng đar lĕ mdei mnăm êa drao snăn klei ruă lŏ mâo. Gưl anei, mnăm êa drao nanao dưn mơh ăt ruă mơh, năng ai kbĭ hriê mơ̆ng adiê hlơr đei.  Hlăm sa hruê ƀuh 1 blư̆ ñu bi hrŭt, snăn brei mnăm êa drao, ăt kăn mdul rei, ƀuh lŏ bi hrŭt mơ̆ng 3-4 blư̆ mtam snăn ba đih kơ sang êa drao.”

Dôk đih mdrao mbĭt hŏng anak H’loanh anăn jing Nguyễn Đức Lĩnh, kkiêng thŭn 2000, ti să Trung Hòa, kdriêk Cư Kuin. Tui si Nguyễn Thị Quỳ, jing amĭ pô ruă yăl dliê, mâo hŏng anei 5 thŭn, kyua ktrŏ hŏng bruă knuă, Lĩnh mâo klei ruă bi kñhăk kŏ dlô, lehanăn ba hriê mdrao. Dŭm thŭn leh êgao, ñu hdĭp lehanăn mă bruă msĕ hŏng aguah tlam mơh. Ƀiădah mâo hŏng anei 2 mlan, ñu amâo lŏ mnăm êa drao djŏ hŏng klei nai aê mdrao ktrâo atăt ôh, lŏ thiăm adiê mđiă hlơr mơh, snăn klei ruă lŏ dơ̆ng bluh đĭ, tơl ba mdrao kơ sang êa drao:

“Adiê mđiă ktang hlơr đei, snăn truh kơ bi hrut, bi kñhăk, lĕ hlăm klei duah blŭ plă plia amâo mâo klei thâo săng. Atăt ba ñu kơ sang êa drao, ƀuh phung nai aê mdrao tlŏ êa drao gơ̆ pĭt hĕ sa wa, ƀiădah truh ară anei ka suaih mơh, dôk duah blŭ plă plia”.

Tui si klei ksiêm yap mơ̆ng anôk bruă mdrao mgŭn klei ruă khŏ sang êa drao khŏ čar Daklak, yap mơ̆ng mlan 3 truh kơ ară anei, kah knar hlăm grăp hrue, anôk bruă mdrao mgŭn anei mâo mkă dlăng mdrao mgŭn truh 100 gưl čô mnuih ruă, đĭ hlăm brô 20% mkă hŏng êlâo, ênoh mnuih ruă ba đih kơ sang êa drao lu hĭn mơh. Aê mdrao Nguyễn Thị Bé, Khua anôk bruă mkă dlăng mdrao mgŭn, sang êa drao khŏ čar Daklak lač, mnuih ruă lŏ mâo lu klei ruă hlăm wưng anei hlăm kŏ dlô, ngă truh klei bi kñhăk, bi huĭ, ngă mtŭk mtŭl ai tiê klei mĭn... Lu mnuih ruă. Mnuih ruă leh truh kơ sang êa drao lĕ hlăm klei huĭ hyưt, kdjăt kƀla, duah bi ƀuh klei amâo mâo jăk, prah prŭng ur huĭ...Mta phŭn truh kơ klei mnuih ruă đĭ lu, hlăm anăn sa kdrêč jing adiê bi mlih, mđiă ktang sui hrue mlan, ngă hmăi leh amâo mâo jăk hŏng kŏ dlô klei mĭn, hŏng klei suaih pral anak mnuih, boh nik, hŏng mnuih mă bruă hlăm anôk ktrŏ boh nik jing ktrŏ hlăm klei mĭn, mnuih khua asei mâo leh klei ruă êlâo, phung mniê mrâo leh kkiêng...

Čiăng bi hrŏ klei lŏ bluh đĭ klei ruă hŏng mnuih amâo mâo jăk kŏ asei, hlăm wưng anei, brei mâo nanao klei mđing uêñ mơ̆ng mnuih hlăm sang hŏng mnuih ruă. Tơdah ƀuh mnuih ruă mâo klei bi knăl amâo mâo jăk msĕ si, amâo mâo čiăng huă ƀơ̆ng, amâo mâo thâo pĭt, mbhĭt mprah hlăm ai tiê, amâo lŏ thâo răng kơ asei mlei pô, snăn mnuih hlăm sang bi nao băng kơ sang êa drao čiăng pral mâo hdră mdrao mgŭn bi jăk, čiăng kơ klei ruă amâo mâo đuĕ nao kơ kjham ôh, ênưih ba hriê klei amâo mâo jăk. Aê mdrao Nguyễn Thị Bé mâo klei mtă:

“Mơ̆ng klei adiê mđiă hlơrr ktang snei, snăn mâo klei čiăng mtă kơ mnuih ruă mnăm êa drao bi djăp ênŭm, djŏ hŏng klei phung nai aê mdrao mtă mtăn. Hlăm wưng anei jing hdơrr mnăm êa bi djăp ênŭm, đru bi kbiă mtă jhat hlăm êrah mơ̆ng êa drao. Bi hŏng mnuih ruă adôk dưi hiu ngă bruă snăn, răng dôk hlăm krah mđiă ktang, amâo mâo dôk hlăm anôk hlơr đei ôh”./.