Jing sa čô hlăm phung dưi grep boh ƀleh ti Sang êa drao gưl dlông 103 lĭng kahan Lào, Vanxay Lixayalath, 58 thŭn ti čar Savannakhet hơ̆k mơak leh klei bliah grep boh ƀleh tŭ jing kyua phung aê mdrao Việt Nam leh anăn Lao bi hgŭm hlue ngă. Vanxay brei thâo, 5 thŭn êlâo, ñu thâo pô mâo klei ruă boh ƀleh leh anăn knŏng leh 2 thŭn ñu kar êrah. Thŭn dih, ñu nao ti Sang êa drao gưl dlông 103 lĭng kahan Lao čih anăn ksiêm mkă leh anăn grep boh ƀleh.

Êlâo kơ bliah kâo ƀuh hlăm asei mlei pô êmăn êmiêk, ƀơ̆ng mnơ̆ng dleh lun leh anăn jơ̆ng kngan ruă, êgah, leh mâo phung aê mdrao tinei bliah kâo ƀuh jăk snăk.

 Ăt msĕ si Vanxay mơh, ayŏng Sangthong Keomonasi, 32 thŭn ti ƀuôn prŏng phŭn Vientiane mgei ai tiê tơdah yăl dliê kơ hdră lŏ duah klei hdĭp mơ̆ng pô hŏng lu klei myun. Ayŏng Sangthong yăl dliê: Sui hŏng anei hlăm brô 5 thŭn, ñu ƀuh êmăn êmiêk, kyua bi mĭn klei ruă aguah tlam anăn amâo nao ksiêm mkă ôh leh anăn čŏng blei êa drao mnăm čiăng kơ suaih hĭn. Leh ƀuh klei ruă amâo hrŏ ôh, ñu nao ksiêm mkă kơh thâo pô mâo klei ruă boh ƀleh wưng knhal tuč. Hlăk anăk ñu luč jih klei čang hmăng kyua djăp hdră mĭn tĭng leh anăn gŏ sang lui êjai pioh hruê mmông mdrao klei ruă. Leh anăn myun mơh leh ñu thâo klei hâo hưn sang êa drao gưl dlông hlue knhuah kahan 103 Lào dôk bi hgŭm hŏng Sang êa drao hlue knhuah kahan 103 Việt Nam grep boh ƀleh.

Êlâo kơ bliah snăn kâo kar êrah boh ƀleh 3 blư̆/ hruê kăm. Ară anei kâo ƀuh msĕ si mâo klei hdĭp mrâo.

Ară anei jih jang phung ruă leh grep boh ƀleh klei suaih pral dưi kơrŭ wĭt, boh tŭ ksiêm mkă leh anăn êa mơiêk dưi bi mlih, đa đa phung ruă lŏ wĭt leh hlăm klei hdĭp grăp hruê. Đại tá Savengxay Dalasath, Khua sang êa drao gưl dlông 103 lĭng kahan yang ƀuôn Lao brei thâo, bruă drep tŭ jing boh ƀleh mơ̆ng phung dôk hdĭp ti Lao amâo djŏ knŏng kruăk knăl klei đĭ kyar mơ̆ng sang êa drao ôh, ƀiădah lŏ jing knhuang yuôm bhăn hŏng bruă mdrao mgŭn Lào:

Bruă grep tŭ jing kơ phung ruă tal anei, tơdah amâo mâo klei đru mơ̆ng phung aê mdrao hlue knhuah kahan Việt Nam snăn klă sĭt hmei srăng amâo bi leh ôh bruă klam. Kâo čang hmăng hlăm wưng kơ anăp dua sang êa drao, dua êpul lĭng kahan srăng ƀrư̆ hruê mâo knhuang đĭ kyar ktang hĭn kơ hnơ̆ng jăk leh anăn ênoh.

 Hdră bruă bi hgŭm grep boh ƀleh mâo dua Sang êa drao lĭng kahan 103 dua ala čar pŏk ngă mơ̆ng thŭn 2018. Truh ară anei, dua tĭng bi hgŭm hlue ngă tŭ jing 9 čô grep ti Sang êa drao gưl dlông lĭng kahan 103 Lào. Tĭng Việt Nam mprăp mnuih, kdrăp mnơ̆ng, êa drao gŭn leh anăn kdrăp mnơ̆ng đru, bi sang êa drao Lao mprăp adŭ bliah, adŭ kăp mdrao, mkŏ mjing anôk bruă gĭt gai, dŭm anôk thơ̆ng kơ bruă, hriăm mjuăt hlue si hdră mâo Việt Nam trâo lač.

K’iăng nai prŏng, nai prĭn Vũ Nhất Định, K’iăng Khua sang êa drao hlue knhuah kahan 103 brei thâo, ti gŭ klei gĭt gai mơ̆ng phung thơ̆ng kơ bruă Việt Nam, phung aê mdrao Sang êa drao gưl dlông 103 Lào grăp knhuang thâo kơ hdră mnêč hlăm bruă grep boh ƀleh msĕ si hdră ktuê dlăng phung ruă leh grep leh anăn đăo tĭng dŭm klei tăm mâo.

Bruă đru pŏk ngă hdră mnêč grep boh bleh ti Lào jing sa bruă yuôm bhăn mđĭ thiăm klei bi hgŭm plah wah dua ala čar, dua lĭng kahan leh anăn dŭm djuê ana Lao. Leh anăn kâo lač, anei jing bruă lŏ čuê mơ̆ng dŭm gưl phung nao êlâo leh anăn mñă kơ ênuk êdei  čiăng lŏ kriê pioh klei bi hgŭm Việt – Lào, doh mngač, jăk siam.

 Hlue si hdră, hlăm thŭn anei, Sang êa drao hlue knhuah kahan 103 Việt Nam srăng lŏ dơ̆ng tiŏ nao phung thơ̆ng kơ bruă bi hgŭm đru kơ Sang êa drao hlue knhuah kahan gưl dlông Lao ngă mơ̆ng 10-20 čô grep boh ƀleh. Êngao anăn, Sang êa drao gưl dlông 103 lĭng kahan Lào kčah truh thŭn 2025 srăng dưi bi leh hdră mnêč grep boh ƀleh, mơ̆ng anăn đru mđĭ bruă kriê dlăng klei suaih pral bi knar hŏng dŭm ala čar hlăm krĭng wăl leh anăn dlông rŏng lăn./.