Hlăm mmông bi trông, Nay Phi La,  Khua Knơ̆ng bruă mdrao mgŭn čar Dak Lak brei thâo, hŏng klei gĭr mơ̆ng êpul khua gĭt gai, knuă druh, phung mă bruă knŭk kna hlăm thŭn êgao, bruă mdrao mgŭn Dak Lak mâo leh hdră kñăm, hnơ̆ng kčah dưi jao, đru rơ̆ng bruă kriê dlăng klei suaih pral mnuih ƀuôn sang ti alŭ wăl. Truh ară anei, 100% dŭm să, ƀuôn hgŭm, wăl krah mâo anôk bruă mdrao mgŭn; 97% anôk mdrao mgŭn mâo phung aê mdrao ngă bruă, 100% anôk mdrao mgŭn mâo măi tính mkŏ internet leh anăn ba yua dŭm kdrăp kriê dlăng mdrao mgŭn. Ênoh mâo hră ênua mdrao mgŭn 92%. 

Êngao anăn, bruă mdrao mgŭn čar Dak Lak ăt tuôm hŏng lu klei dleh dlan msĕ si bruă mkăp êa drao, kdrăp mnơ̆ng kơ phung ruă adôk kƀah, phung mă bruă ka djăp klei čiăng, boh nik kƀah phung aê mdrao mâo klei thâo lu leh anăn êlam.