Anei jing pô djiê tal 4 mơ̆ng klei ruă jơ̆ng, kngan, ƀăng êgei ti alŭ wăl čar mơ̆ng akŏ thŭn truh kơ ară anei. Pô ruă anei k’kiêng thŭn 2021, ti să Ia Lôp, kdriêk Ea Sup, čar Dak Lak. Hluê dsĭ gŏ sang pô ruă, hruê 11/11, ĕ mâo klei ênoh hlơr nao dơ̆ng, pĭt kreh kjăt, blĕ hlăm plă jơ̆ng, čuh hlăm ƀăng êgei. Gŏ sang ba ĕ nao mkă dlăng leh anăn mnăm êa drao hluê si hră.

Hruê 12/11, ĕ mâo klei bi knăl kjham hĭn kyuanăn gŏ sang ba nao mkă dlăng leh anăn đĭ mdrao ti Anôk bruă mdrao mgŭn kdriêk Ea Sup. Ăt hlăm hruê ĕ dưi ba nao mdrao ti Sang êa drao prŏng krĭng Lăn Dăp Kngư. Tinei ĕ dưi đăo knăl mâo klei ruă jơ̆ng kngan ƀăng êgei leh anăn toh hroh klei bi êwa hnơ̆ng 4, djŏ kman hlăm êrah, blĕ êrah hlăm êhŭng prôč leh anăn bŏk hlăm ksŏ. Truh kơ agauh mbruê 13/11, ĕ anei djiê.