Dŭm thŭn êgao, bruă mđĭ kyar phung nao hgŭm hră ênua mdrao mgŭn ti čar Dak Lak mâo dŭm gưl bruă, dhar bruă uêñ mĭn hluê ngă leh anăn dưi mâo đa đa boh tŭ dưn yuôm bhăn. Thŭn 2024, hnơ̆ng nao hgŭm hră ênua mdrao mgŭn mâo 93,5%. Yap truh jih mlan 3/2025, mâo 1 êklăk 690 êbâo 235 čô nao hgŭm hră ênua yang ƀuôn, đĭ 19.163 čô mkă hŏng wưng anei thŭn 2025. Ară anei ti alŭ wăl čar mâo 44 anôk bruă mdrao mgŭn kuôl kă mkă dlăng mdrao klei ruă hŏng hră ênua mdrao mgŭn hŏng dŭm anôk bruă ênua yang ƀuôn čar Dak Lak, hlăm anăn mâo 25 anôk bruă knŭk kna, 19 anôk bruă êngao knŭk kna. Ênoh dŭm anôk mdrao mgŭn hŏng hră ênua mdrao mgŭn đĭ ƀrư̆ ƀrư̆ hŏng grăp thŭn.

Hlăm wưng êgao, dŭm boh tŭ dưn mơ̆ng hră ênua mdrao mgŭn brei kơ phung ruă jing klei klă nik. Ƀiădah hlăm klei ngă bruă ăt dôk mâo klei ka djŏ, ngă truh klei dleh dlan kơ phung nao hgŭm. Hluê si hdră bhiăn hră ênua yang ƀuôn, phung ruă gưl nah gŭ čiăng nao mdrao kơ gưl nah dlông ( êngao kơ klei dŏng mdrao) srăng nao mdrao ti nah gŭ leh anăn mâo hră ba nao mdrao kơh dưi dưn jih hnơ̆ng boh tŭ hră ênua yang ƀuôn. Klei anei ngă truh klei dleh dlăn kơ pô ruă leh anăn gŏ sang kyua luč lu mmông leh anăn hruê ai čiăng ngă jih hră mơar knŭk kna.

Amai Lê Thị Hạnh, ti ƀuôn hgŭm Ea Tam, ƀuôn prŏng Ƀuôn Ama Thuôt, mâo amĭ djŏ klei ruă brŭ, mdrao ti Sang êa drao Ung bướu (ƀuôn prŏng Hồ Chí Minh) mâo hŏng anei lu thŭn. Ƀiădah kyua anôk bi klă mdrao klei ruă tal êlâo ti sang êa drao prŏng ƀuôn prŏng Ƀuôn Ama Thuôt, kyuanăn grăp blư̆ ñu nao ba amĭ mkă dlăng lŏ nao akâo hĕ hră nao mdrao. Amai Lê Thị Hạnh brei thâo:

 “Amĭ mâo mâo klei ruă brŭ lu thŭn hŏng anei. Grăp tuôr 2 – 3 mlan srăng nao ti ƀuôn prŏng Hồ Chí Minh čiăng mkă dlăng, mdrao klei ruă leh anăn jêñ jêñ akâo hră nao mdrao. Sang kbưi kyuanăn êrô êbat dleh dlan, luč mmông, luč prăk kăk. Êjai thâo hluê si klei čuăn mrâo mơ̆ng hdră bhiăn hră ênua mdrao mgŭn mkra mlih, klei ruă amĭ kâo dưi nao mdrao amâo mâo guôn hră ba mdrao, kâo ƀuh mơak êdi. Hơ̆k mơak êjai hdră bhiăn hră ênua mdrao mgŭn mâo klei mlih jăk hŏng phung ruă”.

Hdră bhiăn mkra mlih, bi mbŏ đa đa mta mơ̆ng hdră bhiăn hră ênua mdrao mgŭn bi klă: phung ruă duam klei ruă kjham dưi nao mdrao kpă truh anôk mdrao mgŭn êlam. Klei anei đru kơ mnuih ruă leh anăn gŏ sang mkiêt mkriêk hruê mông, hruê ai ngă hră akâo nao mdrao, hĭn kơnăn dưi rơ̆ng kơ mmông yuôm mdrao mgŭn.

Bruă mkra mlih hnơ̆ng tla prăk mkă dlăng, mdrao klei ruă, hră ênua mdrao mgŭn hmăng hmưi srăng bi djăp lu hĭn boh tŭ dưn kơ phung nao hgŭm, boh nik jing phung ƀun ƀin, hnư hrui wĭt ƀiă, đru bi hrŏ klei ktrŏ êjai mâo klei ruă. Hnơ̆ng tla prăk ară anei ti dŭm anôk bi klă mdrao mgŭn kčưm hlăm kluôm ala srăng đĭ 100%, êlâo dih jing 80%.

Đa đa boh klei mkăn mâo phung ruă uêñ mĭn ară anei jing klei kƀah êa drao, kdrăp yua mdrao mgŭn ti dŭm anôk mdrao mgŭn. Mâo klei anei kyua phung blei tuôm hŏng lu klei dleh dlan. Hlăm boh sĭt, hlăm wưng êgao, lu phung ruă nao hgŭm hră ênua mdrao mgŭn ƀiădah lŏ čŏng pô blei êa drao, kdrăp yua. Klei anei ngă kơ lu mnuih ruă čôñ ăl. Hdră bhiăn mkra mlih, bi mbŏ klei čuăn: tơdah êa drao hlăm hră anăn êa drao hlăm hră ênua mdrao mgŭn, ƀiădah mmông anăn sang êa drao amâo mâo êa drao, pô ruă srăng čŏng nao blei hră ênua mdrao mgŭn srăng ba wĭt prăk kơ pô ruă tơdah mâo ênŭm hră êa drao mơ̆ng aê mdrao leh anăn hră blei êa drao dôk hlăm hră anăn dŭm êa drao hlăm hră ênua mdrao mgŭn.

Êngao kơnăn, hdră bhiăn hră ênua mdrao mgŭn mkra mlih, bi mbŏ phung nao hgŭm hră ênua mdrao mgŭn mgô̆ jing phung mă bruă mdrao mgŭn alŭ ƀuôn, pô mă ƀuê hlăm ƀuôn, êpul nao hgŭm răng mgang klei êđăp ênang, phung mơ̆ng 75 thŭn kơ dlông dôk dưn ênoh đru grăp mlan…Dŭm klei mkra mlih, bi mbŏ anei jing găl guôp hŏng boh sĭt, mbĭt anăn rơ̆ng jih hnơ̆ng boh tŭ dưn kơ phung nao hgŭm hră ênua yang ƀuôn, mkŏ mjing klei đăo knang mơ̆ng phung ruă hŏng dŭm hdră êlan mơ̆ng Đảng, knŭk kna.

Trịnh Văn Hùng (69 thŭn, ti ƀuôn hgŭm Ea Tam, ƀuôn prŏng Ƀuôn Ama Thuôt) hơ̆k mơak êjai thâo hdră bhiăn Hră ênua mdrao mgŭn srăng uêñ mĭn lu hĭn bruă kriê dlăng klei suaih pral kơ phung khua thŭn: “Êlâo dih dưi nao mdrao mgŭn mâo hnơ̆ng jăk tuôm hŏng lu klei dleh dlan djŏ tuôm hŏng hră ênua yang ƀuôn. Ară anei hŏng hdră bhiăn mrâo, hmei mâo thiăm klei găl kriê dlăng klei suaih pral, boh nik anăp anei hră ênua mdrao mgŭn srăng tla prăk mdrao klei ruă ti sang. Phung khua thŭn msĕ hmei amâo guôn lŏ nao ti anôk mdrao mgŭn ƀiădah ăt dưi ksiêm dlăng klei suaih pral leh anăn mdrao mgŭn.”

Dŭm klei wĭt lač jăk mơ̆ng phung ruă hŏng klei hưn bi mbŏ, mkra mlih đa đa mta mơ̆ng hdră bhiăn hră ênua mdrao mgŭn dưi dưn mơ̆ng hruê 1/7/2025 brei ƀuh hdră êlan anei dôk djŏ ai mnuih ƀuôn sang, hmăng hmưi srăng mđĭ hnơ̆ng tŭ jăk klei hdĭp, mtrŭt mjhar klei mtăp mđơr hlăm bruă mdrao mgŭn leh anăn rơ̆ng kơ klei hơĭt yang ƀuôn./.

 Mjing klei găl kơ mnuih ƀuôn sang ksiêm mkă klei ruă hlue si Hră ênua mdrao mgŭn

Bruă mkra mlih Hdră bhiăn Ênua mdrao mgŭn thŭn 2024 srăng đru msir mghaih dŭm klei êdu kƀah, dleh kpăk, mđing truh kơ mta kñăm mjing klei jăk găl, rơ̆ng klei tŭ dưi lu hĭn kơ mnuih nao hgŭm blei Ênua mdrao mgŭn… Čiăng kơ mnuih ƀuôn sang thâo săng klă hĭn kơ dŭm klei kčah mtrŭn mrâo, klei tŭ dưi tơdah nao ksiêm mkă dlăng mâo hră ênua mdrao mgŭn mơ̆ng hruê 1/7/2025, Đàm Thị Thanh Quế, Kơiăng khua Anôk bruă Ênua yang ƀuôn čar Dak Lak srăng hưn klă kơ klei anei.

- Hdră bhiăn mkra mjing, mbŏ dŭm mta mơ̆ng Hdră bhiăn hră ênua mdrao mgŭn si ngă mđing mđĭ klei dưi kơ mnuih ƀuôn sang?

 Đàm Thị Thanh Quế: Hdră bhiăn Hră Ênua Mdrao Mgŭn mkra mlih, mbŏ thŭn 2024 mâo Bruă kƀĭn ala bi mklă hruê 27/11/2024 leh anăn dưn yua mơ̆ng hruê 01/7/2025 mâo lu klei bi mlih kñăm pŏk mlar klei dưi ăt msĕ mơh hnơ̆ng dưi răng mgang mơ̆ng keh Hră Ênua Mdrao Mgŭn hlăm kluôm ala. Hlăm anăn, dŭm boh phŭn mâo phung blei mđing snăk jing klei dưi ăt msĕ mơh hnơ̆ng dưi dưn tơdah nao ksiêm mkă hlue si Hră Ênua Mdrao Mgŭn .

Hdră Bhiăn Hră Ênua Mdrao Mgŭn mrâo pŏk anăn hdră bruă mdrao mgŭn mâo keh Hră Ênua Mdrao Mgŭn tla, đru kơ mnuih ruă dưi dưn hnơ̆ng jăk êlâo anăn ka mâo. Năng mđing jing hŏng phung mâo klei ruă hin amâodah mâo klei ruă dleh dlan dưi mdrao êlan hlăm dŭm sang êa drao gưl dlông amâo guôn hlue ngă hdră kčah kơ kơ klei ba mdrao ti anôk ti dlông hĭn. Klei anei đru bi hrŏ hruê mmông dưi yua klei mdrao mgŭn leh anăn mđĭ hnơ̆ng jăk kriê dlăng mdrao mgŭn. Êngao anăn, Hdră bhiăn mrâo ăt mbŏ dŭm klei dưi dưn mđing 100% ênoh bi liê ksiêm mkă ti dŭm anôk mdrao ksiêm tal êlâo hlăm kluôm ala. Tal dua jing tĭng tla 100% ênoh mdrao mgŭn ti dŭm anôki mdrao mgŭn bi siñê klei kuôl kă ksiêm mkă gưl nah gŭ hlăm kluôm ala. Dưi dưn jih jang ênoh tĭng tla hlue si klei dưi dưn ksiêm mkă klei ruă hlue si Hră Ênua Mdrao Mgŭn ti dŭm sang êa drao klă klơ̆ng leh anăn gưl thơ̆ng tơdah bi mklă êlâo hruê 01/01/2025 anôk bruă anei jing sang êa drao gưl kdriêk.

 Hŏng mnuih djuê ƀiă, gŏ êsei ƀun dôk hdĭp mda ti krĭng mâo klei găl bruă duh mkra ala ƀuôn dleh dlan amâodah dlehd lan êdi, mnuih ƀuôn sang ti krĭng să plao ksĭ srăng dưi tla jih jang ênoh bi liê ksiêm mkă mdrao mgŭn ti dŭm sang êa drao thơ̆ng.

Hjăn hŏng dŭm klei ruă amâo đei mâo, klei ruă knap mñai brei mdrao mgŭn, bliah snăn keh Hră Ênua Mdrao Mgŭn srăng tla jih jang ênoh bi liê hŏng hnơ̆ng hlue si klei kčah mtrŭn tơdah mdrao mgŭn ti sang êa drao gưl dlông. Mjing klei găl kơ mnuih ruă dưi mdrao mgŭn ti dŭm anôk mdrao mgŭnt thơ̆ng leh anăn amâo mâo ôh klei bi kgăn kơ ngăn prăk.

Hŏng Hdră bhiăn mrâo, sa klei năng mđing jing klei găl mdrao mgŭn hŏng khúc xạ ăt dưi ba mkra mlih. Êlâo dih, keh Hră Ênua Mdrao Mgŭn knŏng đru kơ phung hđeh ti gŭ 6 thŭn, truh ară anei mkra mlih pŏk mlar hĭng phung dưi dưn klei anei đru kơ lu mnuih dưi yua hdră bruă mdrao mgŭn čiăng êdi.

-  Hdră bhiăn mkra mlih, mbŏ dŭm mta mơ̆ng Hdră bhiăn Hră Ênua Mdrao Mgŭn mâo lu klei bi mlih, hlăm anăn mâo boh phŭn ksiêm mkă hlue si hră ênua mdrao mgŭn dưi bi ênưih, mnuih ƀuôn sang amâo guôn hưn mdah Hră Ênua Mdrao Mgŭn hŏng mơar ôh. Akâo kơ ih lŏ mblang klă hĭn kơ klei hâo hưn anei?

Đàm Thị Thanh Quế:  Čiăng đru hlue ngă jăk hĭn hdră ba yua ênoh mrô mnuih ƀuôn sang, bi klă anăn leh anăn bi mklă hlăm điện tử čiăng duh kơ bruă bi mlih mrô ala čar. Kñăm mđĭ mkra mlih hră mơar, bi ênưih hră mơar, bi hrŏ mmông leh anăn ênoh bi liê tơdah nao ksiêm mkă. Hlue ngă hdră êlan mbĭt mơ̆ng bruă hră ênua ala ƀuôn Việt Nam, Hră ênua ala ƀuôn čar Dak Lak srăng mdei bruă kđăm mkra Hră Ênua Mdrao Mgŭn  hŏng mơar yap mơ̆ng 1/6/2025. Phung blei Hră Ênua Mdrao Mgŭn tơdah nao ksiêm mkă mdrao klei ruă srăng lŏ dơ̆ng yua Hră Ênua Mdrao Mgŭn hŏng mơar êlâo anăn amâodah yua hră kak asei mnuih ƀuôn sang mâo chip amâodah yua rup Hră Ênua Mdrao Mgŭn  hlăm kdrăp Vssid (Hră ênua ala ƀuôn mrô) amâodah kdrăp Vneid hưn mdah tơdah ksiêm mkă mdrao klei ruă. Knŏng hlue ngă klei kđăm mkra  Hră Ênua Mdrao Mgŭn mơar hŏng phung amâo dưi mkŏ dưm kdrăp VssID amâodah VneID amâodah amâo mâo hră kak asei mnuih ƀuôn sang dưm chip.

 Hŏng phung dleh dlan, gun kpăk hlăm bruă dưm VssID (Hră ênua ala ƀuôn mrô) čiăng brei bi blŭ hriăm hŏng anôk bruă hră ênua ala ƀuôn giăm hĭn čiăng dưi đru hlue ngă.

-   Hlăm wưng kơ anăp, čiăng mjing klei găl ênưih ăt msĕ mơh rơ̆ng klei găl kơ mnuih ƀuôn sang blei Hră Ênua Mdrao Mgŭn,Anôk bruă hră ênua ala ƀuôn mâo ya hdră msir?

Đàm Thị Thanh Quế:  Hlăm wưng êgao, bruă mđĭ kyar Hră Ênua Mdrao Mgŭn ti čar Dak Lak mâo nanao klei mđing uêñ, gĭt gai mơ̆ng Hră ênua ala ƀuôn Việt Nam, mơ̆ng bruă Đảng čar, Êpul gơ̆ng bruă ƀuôn sang, Knơ̆ng bruă sang čư̆ êa čar Dak Lak leh anăn klei bi hgŭm kjăp mơ̆ng dŭm knơ̆ng, dhar bruă leh anăn anôk bruă klei mrâo. Hlăm wưng kơ anăp, čiăng mjing klei găl kơ phung hgŭm, bruă hră ênua ala ƀuôn čar Dak Lak ăt kčah dŭm hdră msir: anăn jing brei mâo klei ngă bruă mơ̆ng dŭm gưl bruă đảng leh anăn bruă sang čư̆ êa alŭ wăl, anei jing klei phŭn bi mklă truh kơ boh tŭ pŏk ngă hdră êlan hră ênua ala ƀuôn, hră ênua mdrao mgŭn ti alŭ wăl. Hlue anăn, anôk bruă hră ênua ala ƀuôn čar Dak Lak srăng mkŏ mjing lu êpul mă bruă hŏng dŭm alŭ wăl kñăm ksiêm dlăng bruă hrui mă, bi hrŏ nư leh anăn bruă mđĭ kyar phung leh anăn klei ksiêm dlăng kơ ya bruă dleh dlan, gun kpăk hlăm klei hlue ngă čiăng mơ̆ng anăn kčah hdră msir bi hmao kñăm bi leh bruă klam thŭn 2025. Leh anăn mđĭ bruă hâo hưn kơ klei dưi dưn hdră êlan hră ênua ala ƀuôn,  Hră Ênua Mdrao Mgŭn. Mđing kơ klei hâo hưn msĕ si mkŏ mjing klei bi kƀĭn hâo hưn, bi blŭ hrăm, mđing hưn hlăm kdrăp hâo hưn msĕ sii mbah hâo hưn hră ênua čar, hla pŏk web ala ƀuôn msĕ si fanpage facebook, zalo amâodah mrô đĭng blŭ đru mơ̆ng hră ênua ala ƀuôn čar.

 - Mni lač jăk kơ ih kơ klei mrâo hâo hưn!