Hlăm ênoh anăn mâo 4 čô hđeh djiê mngăt hlăm knăm kjuh, hruê 19/5 ti să Phú Hội, kdriêk Đức Trọng, čar Lâm Đồng.  4 čô hđeh mơ̆ng 6 truh kơ 10 thŭn, bi jak nao mnei hlăm ênao êa ti tluôn anôk bruă dăng kông să Phú Hội. Êjai dôk mnei, 1 hlăm 3 čô hđeh anei ksak jơ̆ng hlŏng mngăt hlăm êa.

2 čô gĭr dŏng mtlaih găp ƀiădah hlŏng mngăt mơh. Ăt hlăm tlam knăm kjuh, hruê 19/5, ti să Êa Tih, kdriêk Êa Hleo, čar Dak Lak, 2 čô hđeh mrâo 4 lehanăn 5 thŭn, mâo gŏ sang ƀuh djiê mngăt hlăm ênao êa ti alŭ 4, să Êa Tih. Klei mngăt hlăm êa tal 3 mâo ti să Êa Kao, ƀuôn prŏng Ƀuôn Ama Thuôt, čar Dak Lak, ngă 2 čô hđeh dôk ti ƀuôn H’Đơ̆k, să Êa Kao djiê. Mta phŭn mâo bi mklă kyua adiê mđiă hlơr, phung hđeh bi jak nao mnei ti dŭm ênao êa mâo mnuih ƀuôn sang klei hlăm pưk hma leh kơnăn hlŏng mngăt hlăm êa. Ară anei, mprăp mŭt hlăm yan mdei prŏng, anôk bruă djŏ tuôm mtă kơ phung amĭ ama mđing dlăng kriê anak čô bi jăk, kñăm bi hrŏ tuič hnơ̆ng klei truh, hlăm anăn mâo klei djiê mngăt hlăm êa./.