Leh ksiêm mkă leh anăn ktrâo lač kơ hdră kriê dlăng klei suaih pral ti jhưng ksiêm mkă, Y Juôn Niê (ama H’Bluin) ti ƀuôn Ea Nur, wăl krah Pơng Drang, kdriêk Krông Ƀuk lŏ dơ̆ng hmư̆ klei ktrâo lač nao mă êa drao amâo mă prăk. Y Juôn brei thâo: Sui hŏng anei ăt khăng êmăn êmiêk ƀiădah ƀuh ăt kăn hmăi lu mơh anăn amâo ksiêm mkă ôh leh anăn dưi kčĕ klă klơ̆ng kơ klei suaih pral ñu pô. Y-Juôn ƀuh phung aê mdrao čŏng ksiêm mkă jăk snăk leh anăn dŭm mta êa drao dưi yap ăt djăp ênŭm hŏng dŭm mta êa drao.
"Mkŏ mjing ksiêm mkă snei kơ phung ƀuôn sang jăk snăk, tơdah mâo hdră snei snăn phung ƀuôn sang mâo klei suaih pral amâo jăk hriê ksiêm mkă ti să, mnuih ƀuôn sang dưi kriê dlăng klei suaih pral, rơ̆ng klei suaih pral snăn grăp čô hơ̆k mơak leh anăn ai tiê jăk”

Klei ksiêm mkă mdrao mgŭn kơ mnuih ƀuôn sang ti wăl krah Pơ̆ng Drang hlăm hdră čŏng ngă bruă kyua êpul hgŭm phung aê mdrao mda asei čar Dak lak bi hgŭm hŏng bruă êdam êra čar pŏk ngă, hŏng giăm 20 čô aê mdrao hgŭm. Hlăm sa aguah, mâo leh giăm 5 êtuh čô mnuih ƀuôn sang nao ksiêm mkă leh anăn mă êa drao amâo liê prăk. Đa đa phung ruă mâo klei bi knăl kjham snăn phung aê mdrao kčĕ nao ksiêm mkă ti dŭm anôk mdrao mgŭn gưl dlông. Nao hlăm hdră, aê mdrao H Luốc Niê, dôk mă bruă ti Anôk bruă mdrao mgŭn kdriêk Krông Ƀŭk brei thâo:

"Mơak snăk leh anăn ktưn hưn dưi hrăm mbĭt hŏng êpul hgŭm kriê dlăng klei suaih pral kơ mnuih ƀuôn sang. Mkŏ mjing hdră snei snăn êngao kơ klei mĭn nao ksiêm mkă, kriê dlăng klei suaih pral kơ mnuih ƀuôn sang snăn lŏ đru kơ êpul aê mdrao mơ̆ng anôk mdrao mgŭn bi trông, tui hriăm ăt msĕ mơh mđĭ klei thâo ngă bruă mơ̆ng grăp čô mnuih”.

Hŏng 16 êpul hgŭm, giăm 1000 čô jing phung aê mdrao mda asei, hlăm wưng êgao, Êpul hgŭm phung aê mdrao čar Dak lak pŏk ngă leh lu bruă ngă đru kơ phung knap mñai, nao ksiêm mkă klei suaih pral kơ mnuih ƀuôn sang. Dŭm hdră msĕ si” Hdră klei khăp kyua klei suaih pral êpul êya”, “Yan mnga mơak tết Nguyên Đán hŏng mnuih ƀun”, hdră “Phung êdam êra ngă bruă yan mdei prŏng”, “Mlan phung êdam êra”… mâo êpul hgŭm jih ai tiê hlue ngă.

 Hlăm 5 thŭn êgao, Êpul hgŭm phung êdam êra čar Dak lak mkŏ mjing leh 120 gưl ksiêm mkă, kčĕ klei suaih pral, mbha êa drao amâo mă prăk kơ 86.000 gưl mnuih ƀuôn sang ti krĭng taih kbưi, krĭng mnuih djuê ƀiă hŏng ênoh prăk êbeh 4,2 êklai prăk. Hlăm dŭm gưl nao, Êpul hgŭm lŏ bi hgŭm hŏng phung đru mđup brei 2.400 hnư mnŏng jing mnơ̆ng ƀơ̆ng, čhum ao kơ mnuih ƀuôn sang mâo klei hdĭp dleh dlan; mđup brei dŭm êtuh hnư prăk hriăm hră, mnơ̆ng yua hriăm hră, êdeh wai jơ̆ng kơ hđeh sang hră ƀun, êrĭt amĭ ama, hđeh sang hră mnuih djuê ƀiă găn klei dleh dlan hriăm thâo. Mkŏ mjing hriăm mjuăt dŭm hdră dŏng mdrao kơ kơ dŭm êtuh čô nai mtô ti sang hră gưl hđeh, gưl sa; hâo hưn mtô mblang kơ hđeh êdam êra kơ klei ƀă kkiêng anak, gang mkhư̆ klei ruă tưp kơ dŭm êbâo čô hđeh sang hră, phung hriăm gưl prŏng…

Ayŏng Y Lê Pas Tơr, K’iăng Khua dlăng bruă Đảng čar, Khua Êpul hgŭm phung êdam êra Việt Nam čar Dak Lak brei thâo, bruă ngă mơ̆ng Êpul hgŭm phung aê mdrao đru bi lu jơr thiăm dŭm êpul ngă bruă kyua klei êđăp ênang ala ƀuôn, đru mđĭ ai hdĭp mda kyua êpul êya hlăm phung êdam êra Dak lak.

" Phung aê mdrao mda asei mđĭ lar ai tiê ngă bruă kyua klei hdĭp, kyia êpul êya leh anăn mđĭ lar klei thâo ngă bruă čiăng hgŭm hlăm hdră bruă mbĭt mơ̆ng phung mda asei ti čar, đru mđĭ klei suaih pral kơ mnuih ƀuôn sang ti dŭm alŭ wăl dleh dlan, krĭng taih kbưi, krĭng knông lăn”

Hlue si aê mdrao Phan Thành Trinh, Khua Êpul hgŭm phung aê mdrao mda asei Dak Lak, hŏng klei blŭ ngă bruă “Phung aê mdrao mda asei Dak lak hlue ngă asăp Awa, ngă bruă kyua klei suaih pral êpul êya”, phung hlăm êpul hgŭm gĭr hgŭm hlăm bruă ngă čiăng mbŏ thiăm klei thâo, mđĭ klei thâo bruă, mơ̆ng anăn đru kơ phung ruă ƀrư̆ hruê jăk hĭn.

"Êpul hgŭm phung aê mdrao lŏ dơ̆ng pŏk ngă hdră Phung aê mdrao mda asei hlue ngă asăp Awa Hồ, ngă bruă kyua êpul êya. Boh nik, grăp čô srăng mđĭ lar ai tiê ba anăp pô ti grăp alŭ wăl leh anăn ngă bruă kyua êpul êya.”

 Amâo uêñ kơ klei dleh dlan, êpul phung aê mdrao mda asei Dak Lak ba anăp ngă bruă ti dŭm ƀuôn sang krĭng taih kbưi čiăng ksiêm mkă, mdrao mgŭn kơ mnuih ƀuôn sang. Dŭm gưl nao anăn amâo djŏ knŏng đru digơ̆ gĭr hriăm mjuăt knuih hdĭp ôh, mđĭ klei thâo ƀiădah lŏ bi êdah bruă klam, mđĭ lar ai ktang mda asei, duh myơr kyua klei suaih pral êpul êya./.