Tui hăng tơlơi pơhing amăng mông Jơnum, Dak Lak hăng Bình Định hmâo laih hơdôm bruă gum hrom pơlar tuai čuă ngui mơng thun 2016 hluai tui jơlan hơdră kĭ pơkôl pơjing bruă pơlir hơbit pơđĭ kyar tuai čuă ngui 4 bôh tơring čar Bình Định - Phú Yên – Gia Lai –Dak Lak. Truh thun 2022, bruă pơlir hơbit anai dưi pơhrua nao dong 2 bôh tơring čar Quảng Ngãi hăng Kon Tum, pơjing bruă pơlir hơbit pơlar tuai čuă ngui 6 bôh tơring čar kual Tŏng Krah – Dăp Kơdư hăng anăn ñu Dăp Kơdư pơhrua hrom ia rơsĭ.

Amăng mông jơnum, khua gơnong bruă tuai čuă ngui 2 bôh tơring čar hmâo lăi pơthâo laih hơdôm anih anom tuai čuă ngui, jơnum ngui bôh thâo bơkơjăp drơi jăn hăng tuai čuă ngui amăng thun anai mơng dua tơring čar. Ƀing khua pơ ala ăt lăi pơthâo nao rai mơn, bơkơtuai kơ jơlan kơtưn gum hrom pơlar tuai čuă ngui pơlir hơbit, biă ñu amăng bơyan tuai čuă ngui amăng bơyan pơdơi prong thun 2023; kơtưn lăi pơhing, ngă pơhư̆č tuai čuă ngui pơ̆ Bình Định hăng kơđai glăi. Khua pơ ala kơ anom bơwih ƀong 2 bôh tơring čar ăt tơpă ară lăi pơthâo nao rai mơn, lăi tơbiă hơdôm tơlơi tơnap, tơlơi gun kiăng pơtlaih kăh hăng ba tơbiă hơdôm jơlan pơsir kiăng kơtưn gum hrom, pơtrut bruă tuai čuă ngui./.