Mơguah lơ 6/10, Gơnong bruă wai lăng tơlơi pơhing hăng pôr pơhing tơring čar Dak Lak gum hrŏm hăng Jơnum min mơnuih ƀôn sang tơring glông Čư̆ Kuiñ pok phun Pơdă prưng hyu “Hoàng Sa, Trường Sa mơ̆ng Việt Nam – Hơdôm gŏng jơlan gru grua hăng djơ̆ phiăn”.

Anai lĕ bruă pơdă prưng hyu tal 6 dưi pơphun ƀơi hơdôm anih anom amăng Dak Lak. Grŭp pơphun bruă pơdă prưng hmâo pơdă prưng hăng lăi pơthâo hơdôm mơta hră pơ-ar djă pioh yôm phăn yua Ding jum wai lăng tơlơi pơhinh hăng pôr pơhing brơi, hăng 6 anăn ñu, hơdôm rup, hră pơ-ar kual bul ia rơsĭ Hoàng Sa hlâo kơ thun 1975. Sa dua rŭp lăi nao kual bul ia rơsĭ Trường Sa ră anai hăng hơdôm bruă mă mơ̆ng mơnuih apăn bruă, mơnuih mă bruă gah ling tơhan ƀơi ia rơsĭ, mơnuih ƀôn sang ƀơi kual bul ia rơsĭ Trường Sa. Tal anai, rơbêh kơ 1.600 čô čơđai Sang hră gưl 3 Y Jut hăng lu mơnuih ƀôn sang ƀơi tơring glông Čư̆ Kuiñ hmâo nao čuă lăng, hơduah ĕp hăng thâo hluh rơđah hloh kơ pô bul ia rơsĭ, ia rơsĭ, biă ñu dua kual bul ia rơsĭ Hoàng Sa hăng Trường Sa gah Việt Nam./.