Amăng mông jơnum, ƀing khua mua hơmâo pơčrông sai hăng bơtŭ ư hrŏm hơdôm pok hră pơ-ar kơ tơhnal pơkă bruă mă, pơpha bruă mă tong ten brơi rĭm čô mơnuih hăng akŏ pơjing 4 grup, kiăng pơhlôm brơi bruă git gai, wai lăng na nao hăng tŭ yua amăng hơdôm hrơi prap lui tal ruah khua.

Yă Cao Thị Hòa An, Khua Jơnum min plĕ hră ruah khua mua tơring čar Dak Lak lăi rơđah, bruă rŭ pơdong glăi anŏ răm rai yua hơjan ia ling dăo glăk lu biă mă. Samơ̆, bruă kiăng ngă lơm prap lui tal plĕ hră ruah khua mua ăt lu mơn, bơdjơ̆ nao lu anih anom hăng ƀon lan. Yua anun, lơm dŏ kơnong rơbêh 3 blan, djop gưl, gơnong bruă kiăng đing nao kơtang hloh, gơgrong gum hrŏm kjăp phik, pok pơhai bruă jao djơ̆ hrơi mông, djơ̆ tơlơi pơkă amăng tơlơi phiăn.

Tlam lơ 26/11, Jơnum min ruah khua tơring čar Gia Lai jơnum lok 1. Jơnum anai pơčrông sai, pơsit hơdôm hră pơ-ar yom mơ̆ng Jơnum min ruah khua tơring čar, lăi pơthâo jao bruă kơ 37 čô ding kơna; pơgôp hiăp kơ mrô rơnoh, bruă dưm dăp, mơnuih mut amăng grup mơ̆ng Jơnum min ruah khua tơring čar; akŏ bruă pok pơhai ruah khua pơ ala mơnuih ƀôn sang dêh čar tal 16 hăng ƀing khua pơ ala mơnuih ƀôn sang djŏp gưl rơwang thun 2026-2031 ƀơi tơring čar Gia Lai.