Ƀơi kual giăm guai tơring čar Dak Lak, kơ-iăng Khua dêh čar ơi Mai Văn Chính hơmâo rơkâo pok pơhai man pơdong sang hră kơnuk kơna čem rông ba pơlir gưl I hăng gưl II ƀơi Ia Rvê. Sang hră hơmâo man pơdong đơ đam rơbêh 5 ektar, hăng abih tih prăk tuh pơ alin 185 klai prăk.

Să Ia Rvê lĕ să ha guai hăng dêh čar Kur, tơlơi hơdip kơ mơnuih ƀôn sang dŏ lu tơnap tap. Jơlan nao sang hră kơ ƀing čơđai kual giăm guai dŏ ataih, gơnam măi mok aka ƀu djop. Yua anun, ƀing čơđai lĕ ƀing mơnuih hok mơ-ak hloh lơm sang hră pơlir djop gưl hơmâo man pơdong. Amon Lang Thị Yến Vy, čơđai sang hră anih 7, sang hră gưl II Nguyễn Thị Định brơi thâo:

“Lơm thâo sang hră amra man pơdong phrâo, kâo hok mơ-ak biă mă, čang rơmang tañ sang hră phrâo kiăng hơmâo anih hră klă ƀiă”.

Bơ ơi Vi Xuân Thủy, dŏ amăng să Ia Rvê brơi thâo, neh met wa hok mơ-ak biă mă hăng hơđong pran jua brơi ană bă nao hrăm hră lơm hơmâo sang hră pơlir djop gưl, dưi hrăm hăng dŏ glăi yang hrơi dong:

“Abih bang ƀing amĭ ama hăng neh met wa amăng să lêng kơ hok mơ-ak. Ƀing gơmơi bơnĭ kơ kơnuk kơna hơmâo đing nao man pơdong sang hră phrâo, kiăng ƀing ană tơčô lêng kơ dưi hrăm hră klă ƀiă. Hơmâo sang hră prong rơhaih, ƀing gơmơi ăt hơđong pran jua brơi ană bă nao sang hră”.

Hrŏm hăng sang hră ƀơi să Ia Rvê, amăng tal anai tơring čar Dak Lak ăt man pơdong 2 boh sang hră kơnuk kơna čem rông ba pơlir djop gưl pơkŏn dong: anun lĕ sang hră pơlir djop gưl ƀơi să Ia Lốp hơmâo prăk tuh pơ alin lĕ 105 klai prăk, sang hră pơlir djop gưl să Buôn Đôn hơmâo tuh pơ alin rơbêh 158 klai prăk.

Ƀơi Gia Lai, kơ-iăng Khua dêh čar ơi Hồ Quốc Dũng hơmâo nao ngă lơphet man pơdong sang hră kơnuk kơna čem rông ba pơlir gưl I hăng gưl II ƀơi să giăm guai hơmâo: Ia Mơ, Ia Puch, Ia Pnôn, Ia Nan, Ia Dom, Ia Chia hăng Ia O, hăng abih tih prăk tuh pơ alin rơbêh 1.500 klai prăk. Hơdôm boh sang hră anai amra pơhlôm brơi bruă pơtô hrăm hơđong brơi 7.000 čô čơđai kual giăm guai Gia Lai, lu hloh lĕ ƀing čơđai djuai ania ƀiă.

Pơhiăp amăng mông ngă lơphet man pơdong, Kơ-iăng Khua dêh čar ơi Hồ Quốc Dũng lăi pơtong: sang hră anai yôm phăn biă mă hăng kual giăm guai, djru pơđĭ kyar mơnuih mă bruă, hơkrŭ pran gum pơgôp hăng wai pơgang rơnuk rơnua.

“Rơngiao kơ hơdră djru, gong gai ƀon lan, ƀing nai pơtô, ƀing amĭ ama ƀing čơđai amra juh alum pran jua ƀing čơđai nao sang hră brơi djop. Brơi ƀing čơđai hơđong pran jua hrăm amăng sang hră phrâo, anăm brơi ƀing čơđai lui sang hră. Anai ăt lĕ hơnong pơkă mơng Ding jum kơđi čar amăng tơlơi klah čun mrô 81, pơgôp pơtô hrăm mơnuih mă bruă ƀơi kual giăm guai dêh čar. Ƀing čơđai tơdơi anai thâo mă bruă amra pơwot glăi pơjing plơi pla, wai pơgang rơnuk rơnua kual giăm guai, hơđong tơlơi hơdip mơnuih mơnam”.

Tŭ mă tơlơi git gai mơng Kơ-iăng khua dêh čar, Kơ-iăng Khua git gai Ping gah tơring čar, Khua Jơnum min mơnuih ƀôn sang tơring čar Gia Lai Phạm Anh Tuấn ƀuăn pok pơhai akŏ bruă anai hăng pran gir run kơđi čar prong hloh hăng ngă bruă khut khăt, tŭ yua. Tơring čar ăt pơhlôm brơi djop nai pơtô, pơlir nao rai djop mơta, gơnam măi mok, pơgiong akŏ bruă anai djơ̆ hrơi blan.

“Khua mua hơdôm anom bruă bơdjơ̆ nao pơsit anai lĕ bruă mă yôm phăn, kiăng pok pơhai tui tơlơi pơsit: ječ ameč, kjăp phik, tŭ yua; prap lui djop tơlơi gal kơ nai pơtô, pơlir djop mơta hơmâo jơlan glông, ia yua hơdjă, apui lơtrik, glông hrĕ dăng kông…ječ ameč pơgiong hơdră djru brơi phara kơ ƀing nai pơtô, ƀing čơđai sang hră, kiăng djop sang hră lêng kơ djop tơlơi gal mă yua mơng akŏ thun hrăm 2026-2027”./.