Jơnum ruah khua apăn bruă ping gah đơ đam tơring čar Dak Lak tal I, rơwang bruă thun 2025-2030, pơphun mơ̆ng lơ 29/9 truh lơ 1/10 hơmâo 449 čô mơnuih pơ ala sit nik, pơ ala brơi 137.000 čô mơnuih ping gah amăng tơring čar. Hăng anăp lăi nao “Gum pơgôp-Mơnuih ƀôn sang ngă khua pô-mă bruă tơpă-Pơblih kơtang-Pơđĭ kyar”, tơring čar Dak Lak pơtong rơđah pă mơta bruă yom phun kah hăng: Pơđĭ kyar mơnuih apăn bruă, kơsem min boh thâo phrâo,ia rơgơi tơlơi pơhing, atur bruă hăng pơblih jơlan hơdră git gai.

Kơ-iăng khua git gai ping gah, Khua Jơnum min mơnuih ƀôn sang tơring čar, ơi Tạ Anh Tuấn brơi thâo, amăng čăl phrâo pơ anăp, tơring čar Dak Lak đing nao bruă pơblih kơtang hloh, hơmâo atur kơjăp hăng bang bơngač, biă mă ñu tuh pơ alin čuk pơkra jơlan glông. Tơring čar pơtum lu pran jua mă bruă, prăk kăk nao kơ bruă čuk jơlan phun rơdêh đuăi hmar Yŭ-Ngŏ, truh pơ tơdrun kom pan, tơdron rơdêh por hăng djop arăt jơlan rơdêh đuăi hmar hluh gah Dơnung -Kơdư dêh čar, jơlan mơ̆ng Ƀuôn Ma Thuôt-Vân Phong. Hrŏm hăng anun, tơring čar ăt pơtrut kơtang pơblih hơdră ngă hră pơar amăng kơnuk kơna, pơblih tơlơi pơmin hơdră git gai wai lăng kiăng ngă amuñ brơi djop bruă, pơsir tơlơi tơnap kơ sang bruă mơdrô, pơhưč tuh pơ alin, pơtrut rơnoh pơđĭ kyar hơđong kơjăp.