Mơ̆ng thun 2019 truh ră anai, tơring čar Dak Lak hmâo pơphun kĭ pơkôl pơlir hơbit, gum hrŏm bruă wai lăng tuai čuă ngui hăng lu tơring čar, ƀôn prong amăng đơ đam dêh čar, đing nao 4 bruă: pơtrut, lăi pơhưč tuai čuă lăng; lăi pơthâo nao rai tơlơi pơhing kơ pơđĭ kyar tuai čuă ngui, pơkă kual hăng iâo pơthưr tuh pơplai; pơđĭ kyar anih anom tuai čuă lăng; pơhrăm brơi, pơtô juăt kơ mơnuih mă bruă tuai čuă ngui.

Gum hrŏm hăng hơdôm bôh anih anom ngă tui hơdôm bruă jơnum ngui tuai čuă ngui jar kơmar rim thun; lăi pơthâo nao rai tơlơi pơhing, pơlir hơbit plăng pơhing điện tử tuai čuă ngui, hơdôm anăn mă bruă amăng măi; lăi pơthâo nao rai rim tal tơlơi ngă tui hơdôm bôh yôm gum hrŏm hmâo kĭ; gum hrŏm, tuh pơplai pơdŏng hăng mă yua hơdôm ară jơlan ba hyu tuai... Kơnang kơ anun, amăng 5 thun rơgao tơring čar hmâo čơkă laih rơbêh kơ 5,6 klăk wot čô tuai, pơhrui hmâo giăm truh 4.300 klai prăk. Amăng mông jơnum, khua pơ ala hmâo lăi pơthâo nao rai, lăi pơthâo bôh nik pok pơhai pơlir hơbit ƀut, gum hrŏm kơplah wah 2 tơring čar, 3 tơring čar, črâo tơbiă hơdôm bruă akă dưi ngă, dô̆ gun, mơ̆ng anun rơkâo đĭ hơdôm bruă pơsir kiăng pơđĭ dlông bôh tơhnal pơlir hơbit, gum hrŏm./.