VOV4.K’ho – Tàm ală nam do, broă lơh mpồl ơruh pơnu mờ srơh ơruh pơnu tàm kuang àng càr Kontum geh ală tam gơl niam ngan, ngai sơlơ gơ hòi uă ơruh pơnu nhap nhar tus bal mờ là dùl pơn rơ niam tàm srơh lam lài lơh broă dong kờl is tài rài kis mpồl bơtiàn bơh càr dê. Pa do, dùl broă lơh pa geh uă bơta kuơ geh sơnđan: Broă lơh ngan ngồn “ 24 jiơ jòi git ngan ngồn” bơh mpồl ơruh pơnu kuang àng càr mut lơh tus ală mpồl ơruh pơnu neh dờp geh bơta ringbal jơh nùs ngan bơh ơruh pơnu dê. Tus bal broă lơh jòi git ngan ngồn do, ală bơyô kơnòm să geh sa bal, ơm bal, lơh broă bal mờ dùl hìu nhă, bơh hơ\ sơlơ git mờ tam klac bal mờ làng bol:

Là hìu nhă geh mpồl ơruh pơnu bơt bơtàu mpồl kuang àng càr Kontum rơ wah mut lơh broă lơh ngan ngồn “ 24 jiơ jòi git ngan ngồn” pa do, bi ùr Y Blỡi ơm tàm bòn Kon Tu 1, ntum Đak Blà, [òn dờng Kontum ờ jai pồn bơta chờ hờp. Bi ùr đơs, ờ hềt tu\ lơi hìu nhă a` gal cau bè do, mờ bềng sap `o\ bơyô kơnòm să dê. Hìu nhă bi ùr Y Blỡi di hìu nhă rơbah, bơklau chơt tàm dùl dơ\ rềs àr, 2 nă kòn gơtìp kuet kơlte, rài kis neh kal ke tu\ do sơlơ kal ke rlau. Kòn dơ\ 2 bi ùr dê nam do neh 21 sơnam mơya rơgai ờ sô ngan, să jan pàl jơh mìng bic dùl bă, dềt bè oh dềt 5 sơnam. Bi ùr Y Blỡi kung neh uă dơ\ jòi anih sơm kòn in mơya ndrờm ờ bời. Priă jền ờ geh, pràn kơldang să jan kung ờ, lơh gut dar hìu nhơt hòn mờ sồ siă bềng tơn.

Bơh 24 jiơ jòi git ngan ngồn, ală bơyô bơh mpồl ơruh pơnu bơt bơtàu mpồl kuang àng càr Kontum neh dong hìu nhă bi ùr Y Blỡi lơh niam wàng ròng kơn rồ, jì wàs hìu ơm, tam biap tàm suơn, lơh wơl blàng hìu mờ rơkàng hìu neh sèt. Sền hìu ơm bè geh tai bơta pràn pa, bi ùr Y Blỡi chờ hờp đơs: “ Ngai do, mpồl ơruh pơnu bơt bơtàu bơh kuang àng càr dê go\ hìu nhă kal ke neh tus lơh niam wơl hìu a` in. A` kơp kờ` ngan geh uă broă lơh bè do nàng dong kờl làng bol in tờmu dimơ kal ke.”

Tus bal broă lơh “ 24 jiơ jòi git ngan ngồn”, ală ơruh pơnu ndrờm geh bal jơnau đơs, do là broă lơh geh uă bơta kuơ, dong khi tam klac mờ làng bol mờ geh tai bơta nàng ai go\ nùs nhơm lam lài, lơh broă dong kờl is tài rài kis mpồl bơtiàn. Trung uý Nguyễn Tuấn Linh, atbồ mpồl ơruh pơnu bơt bơtàu mpồl kuang àng càr Kontum pà git: “ Dơ\ sơn rờp tus bal broă lơh “ 24 jiơ jòi git ngan ngồn” a` go\ broă lơh do niam ngan mờ geh uă ngan bơta kuơ. Dong ơruh pơnu mpồl bol a` dê rềp mềl mờ làng bol uă rlau. Bơh broă lơh do bol a` git rài kis pah ngai làng bol kòn cau dê. Làng bol tàm do kal ke ngan, geh uă ngan jơnau kờ` dong kờl.”

Broă lơh “ 24 jiơ jòi git ngan ngồn” gam ngai sơlơ gơ hòi uă ơruh pơnu tàm ală mpồl di mpồl ơruh pơnu kuang àng càr Kontum tus bal. Bal mờ broă lơh do, ală broă lơh lam lài, lơh broă dong kờl is tài rài kis mpồl bơtiàn bơh mpồl ơruh pơnu kuang àng càr Kontum dê gam lơh niam rlau tai rùp să cau ling kuang àng tàm nùs nhơm làng bol [òn lơgar.

              Cau cih mờ yal tơnggit K’ Duẩn.