VOV4.K’ho – Bơh rlau 1 nam lam lơh jat gùng dà bơh Bộ Kuang àng dê bè broă ai kuang àng chính quy rê tàm kấp hơ đơm at ală gơnoar broă kuang àng xã, mpồl kuang àng xã tàm càr Dak Nông neh tơnguh gơnoar broă lơh tờm tàm broă lơh sền gàr lơngap lơngai, ring lơngai, ờ do ờ dă, rơcang sơndră cau tìs, sền gàr ring lơngai bơh tàm kấp hơ đơm. Bơh bồ nhai 12 do, Kuang àng càr Dak Nông pơn jat tai lam lơh broă rơndap lơh “A` lơh kuang àng xã”, lơh gơlik bơta tam gơl pràn kơldang, niam rlau tai tàm broă lơh bơt bơtàu mpồl kuang àng xã chính quy, gơtùi drơng ală jơnau kờ` kơnòl broă tàm tu\ tơngai.

Kuang àng kơnhòal Dak Mil là mpồl lam lài bơh càr Dak Nông dê lơh gơs broă ai kuang àng chính quy rê at ală gơnoar broă kuang àng tàm jơh 9 xã bơh nhai 7 nam 2019. Mpồl kuang àng chính quy rê tàm xã neh mhar tơnguh pràn jak mờng chài lơh broă, sền gàr niam lơngap lơngai, geh kấp ủy, gơnoar atbồ ală kấp cih dờp, làng bol pin dờn, kờ` gơboh.

Ồng Trần Xuân Toan, ơm tàm xã tiah nhàr dà lơgar Dak Lao, kơnhòal Dak Mil pà git: “Ală oh mi kuang àng chính quy rê den bơta lơngap lơngai ờ do ờ dă geh tơnguh loh làng ngan, geh broă lơi bol hi hòi điện thoại den ală oh geh tus mơ, bơsong di tu\ mơ. Bè broă 2, 3 nă cau sùm `ô sa, nhơl lềng làng den neh tam gơl loh làng ngan. Dơ\ 2 là bè bơsong ală sră nggal den ală oh mi hơ\ lơh niam ngan, bơsong mhar, lơh lơh pơhề pơhà tus mờ làng bol”.

Kuang àng xã tàm kơnhòal Dak Mil rềp mềr mờ làng bol, sền gàr tàm kàl pic kơphe

Jat ồng Thái Quang Cường, Chủ tịch Ủy ban Nhân dân xã Đức Mạnh, kơnhòal Dak Mil yal, bơta tam gơl ai tơnggo\ bơh mờng chài lơh broă, bơta chài boh bơr, broă bơsong broă gơlik geh… bơh mpồl kuang àng xã chính quy rê tàm xã dê neh lơh gơlik bơta pin dờn tàm làng bol: “Gơnoar broă bơh ală oh mi kuang àng chính quy dê geh ai rê tàm xã den broă lơh mờng chài geh tơnguh, lơh broă ngac ngar den tàng cồng nha sền gàr lơngap lơngai geh cồng nha rlau”.

Kuang àng chính quy rê tàm xã neh mhar ngan tơnguh cồng nha, jat Thượng tá Đinh Văn Hiếu, Phó Kuang atbồ Kuang àng kơnhòal Dak Mil pà git, mpồl đảng ủy mờ kuang đơng lam bồ kuang àng neh kơ lôi sơ nơng nền nòn ngan tơl bă tiah kung bè pràn jak, mờng chài lơh broă bơh tơl nă kuang bàng dê nàng ai rê drơng broă tàm xã gơ in dipal. 1 nam do, kuang àng xã neh lơh niam gơnoar broă lơh tờm tàm broă sền gàr lơngap lơngai, ờ do ờ dă bơh tàm kấp hơ đơm, pơgồp bơnah lam lơh ală tơngume bơh gah kuang àng dê geh cồng nha niam. Mùl màl là khà broă lơh tìs hình sự tàm Dak Mil gơmù mờr 10% pơn drờm mờ nam lài, làng bol jàu is rlau 100 ngkơr phàu ală bơta: “Lam lơh rơndap broă do den bol hi go\, mìng is bè broă lơh rơcang sơndră cau tìs den bol he neh gơtùi rơcang lài, tàm 1 nam do geh cồng nha ngan, geh làng bol kờ`, dong kờl mpồl kuang àng. Kươmàng là kơnhòal Dak Mil geh 2 xã tiah nhàr dà lơgar bal mờ rlau 45 kơi sồ gùng nhàr lơgar, den bơta pơgồp bal mờ mpồl ling sền gàr tiah nhàr dà lơgar mờ mpồl kuang àng xã kung bè geh bơta đơng lam bơh kuang àng kơnhòal dê den neh tơnguh cồng nha tàm tiah nhàr dà lơgar, sền go\ loh làng ngan rlau jơh là tàm dơ\ rơcang sơndră kòp Covid-19 pa do”.

1 nam do, kuang àng Dak Nông neh hòi jà làng bol jàu git nđờ ngkơr phàu ală bơta

Tàm 1 nam do, Kuang àng Dak Nông neh ai kuang bàng, kuang àng rê at ală gơnoar broă kuang àng xã tàm jơh 60 xã tàm càr. Jat hơ\, tơl xã geh ai êt ngan rlau jơh là 6 nă kuang àng chính quy, ală xã sùm gơlik geh ală broă gơ rềng tus lơngap lơngai den digơlan ai tus 10 nă kuang àng rê lơh broă. Bulah gam geh ală kal ke bè phan bơna, rơndeh rơndồ, ù tiah lơh broă, mpồl kuang àng xã chính quy neh lam lơh geh cồng nha broă lơh rơcang sơndră cau tìs tàm kấp hơ đơm, sền gàr rài kis ring lơngai, geh ală kấp, ală gah broă lơh đơs niam ngan, làng bol pin dờn, kờ` gơboh.

Bơh bồ nhai 12 nam 2020, kuang àng càr Dak Nông neh lam lơh broă rơndap lơh ai kuang bàng, kuang àng gơ wèt ală mpồl lơh broă mờng chài tàm kấp càr rê lơh kơnòl broă tàm kuang àng xã (hòi lơyah là broă rơndap lơh “A` lơh kuang àng xã”). Do là broă rơndap lơh is bơh Kuang àng càr Dak Nông dê nàng kờ` lơh gơlik bơta tam gơl pràn kơldang, niam rlau tai gơ wèt tus mờ jơnau sồr kơnòl broă bơt bơtàu mpồl kuang àng xã chính quy.

Đại tá Hồ Văn Mười, Kuang atbồ Kuang àng càr Dak Nông đơs tàm dơ\ ai cau lam lơh broă rơndap lơh “A` lơh kuang àng xã”

Đại tá Hồ Văn Mười, Kuang atbồ Kuang àng càr Dak Nông pà git, broă rơndap lơh geh lam lơh ua\ dơ\, tơl dơ\ geh mờr 100 nă kuangbàng lơh kơnòl broă kuang àng xã tàm tơngai bơh 15 tus 30 ngai. Bơta do kờ` tơnguh jơnau git wă bè gơnoar broă bơh kuang àng xã dê, sơlơ pơlam, dong kờl mờng chài lơh broă, lơhbroă tàm bơta geh ngan ai ală kuang bàng kuang àng in.

Đại tá Hồ Văn Mười yal loh rlau tai: “Ngan ngồn lam lơh broă rơndap lơh “A` lơh kuang àng xã” den lài hơ\ Mpồl kuang atbồ Kuang àng càr neh lơh nền tơrgùm mờ sồr 12 nă oh mi rê lơh kuang àng xã, tềng đap mat là tơrgùm dong kờl ai kuang àng xã in bè rơndap broă tơrgùm dữ liệu làng bol ơm kis dà lơgar mờ thẻ căn cước làng bol. Bol hi neh sền sơ wì, ai mờng chài den broă do ngan ngồn geh cồng nha. Den tàng tu\ do bol hi gam ai mờr 100 nă oh mi tai rê lơh kuang àng xã. Mờ tơ nơ\ pah dơ\ den bol hi sền sơ wì, ai jơnau mờng chài ală broă lơi neh gơtùi lơh mờ broă lơi ờ hềt gơtùi, ală broă lơi gam ờ niam nàng bơsong, lơh bè lơi nàng broă rơndap lơh do ngan ngồn gơ mut tàm rài kis”.

Ală tam gơl niam bè lơngap lơngai tàm tiah [òn lơgar bơh càr Dak Nông dê ai go\, broă ai kuang àng chính quy rê at ală gơnoar broă kuang àng xã là gùng dà di ngan mờ di tu\, tơnguh tơl làm ală gah broă lơh, sền gàr lơngap lơngai, ờ do ờ dă bơh tàm kấp hơ đơm. Mpồl kuang àng xã chính quy mờ nùs chính trị kơ\ kơljap, mờng chài lơh broă ngac ngar, jơh nùs geh kơnòl mờ broă lơh neh gơtùi drơng  ală jơnau sồr kơnòl broă tàm tu\ tơngai pa, ngan ngồn là anih kơldìng pin dờn bơh kấp ủy, gơnoar atbồ mờ làng bol càr Dak Nông dê.

Cau mblàng K’Duẩn