VOV4.K’ho – Mho òr, 16/12, anih lơh broă jơnau đơs Việt Nam mờ Ủy ban nhân dân càr Lâm Đồng bơyai lơh pơrjum tơn jơh 3 nam sền sơ wì cồng nha mut lơh broă tam klac mblàng yal đah 2 mpồl, mơkung cribơyai broă chồl pràn pơgồp bal, mblàng yal geh cồng nha rlau tàm tơngai tus.

3 nam do, broă lơh tam klac mblàng yal bơh 2 mpồl dê neh pơgồp bơnah kuơ màng tàm broă mblàng yal ală gùng dà, broă lơh bơh Đảng, kơrnuat boh lam bơh dà lơgar dê tus mờ làng bol tiah sar lơgar ngài, tiah làng bol kòn cau bơh càr Lâm Đồng dê. Ală jơnau tơnggit bè càr Lâm Đồng geh pờ tơlik tàm jơh 4 bơta mblàng yal bơh anih lơh broă jơnau đơs Việt Nam dê mờ khà, bơta niam ngai sơlơ jơnhua mờ geh bơta gơ rềng dờng ngan. Tơngume đơs tus tơr gùm tàm jơh ală gah, sền gròi ngan rlau jơh là broă bơt bơtàu Đảng, bơtàu tơnguh lơh sa - mpồl bơtiàn, lơh sa suơn sre công nghệ pa, nhơl chờ, broă gàr tơl niam rài kis mpồl bơtiàn… Ală rùp să, bơta pràn bơh càr Lâm Đồng dê, ală anih tus niam ngan, ală phan bơna nhơl chờ geh bơta niam uă bơh Dà Làc dê kung geh anih lơh broă jơnau đơs Việt Nam chồl pràn mblàng yal, yal tơnggit loh làng tus mờ tơl bă tiah tàm lơgar mờ dunia, pơgồp bơnah tàm bơtàu tơnguh lơh sa mpồl bơtìan bal bơh càr dê.

            Cau cih mờ yal tơnggit K’Duẩn