VOV4.K’ho - Drim òr (25/6), anih lơh broă kơlôi sơnơng prăp gàr mờ tơnguh bơta chài rơgơi kòn cau Việt Nam, gơwèt mpồl tam klăc ală mpồl Khoa học kỹ thuật Việt Nam bơyai lơh tơnkah 15 nam ngai crơng gơs (01/6/2000-01/6/2015). 15 nam do, anih lơh broă kơlôi sơnơng prăp gàr mờ tơnguh bơta chài rơgơi kòn cau Việt Nam neh lơh jăt uă broă kơlôi sơnơng, bơyai lơh uă broă prăp gàr mờ tơnguh bơta chài rơgơi kòn cau. Anih lơh broă do neh tơnguh wơl ờ uă bơta niam chài ờs mờng gam gơtìp roh rui bè: jơnau đơs Bài chòi, đơs Xẩm Hà Thành, bơta chài rơgơi Thăng Long mờ Tây Sơn-Nguyễn Huệ; pơgồp bal lơh jăt rơndăp broă lơh lèo tàm hìu bơsram. Ờ mìng yal, prăp gàr bơta chài rơgơi kòn cau tàm lơgar, anih lơh broă do gam yal bè bơta chài rơgơi kòn cau tàm ờ uă lơgar bè Mỹ, Nhờk, Đức. Tus bal tơnkah, ồng Nguyễn Xuân Phúc, kuang jăt jơng gơs gơnăp gơnoar atbồ hờ đang rơlao jơh dà lơgar neh đơs tòm: tàm tơngai tus, ală kal ke tàm broă kơlôi sơnơng, prăp gàr, tơnguh wơl bơta chài rơgơi kòn cau là uă ngan. Anih lơh broă do pal pơn jăt tai tam gơl pa tàm broă prăp gàr, tơnguh bơta chài rơgơi kòn cau Việt Nam dê.

Cau mblàng Ndong Brawl