VOV4.K’ho – Tàm dơ\ pơrjum dờng màng mpồl ASEAN dơ\ 36, dơ\ sơn rờp, Việt Nam bơyai lơh pơrjum kươmàng bơh ală kuang đơng lam bồ mpồl ASEAN dê bè tơnguh gơnoar broă ai cau ùr in tàm rài công nghệ số.

Do là jơnau bơceh bơh lơgar Việt Nam dê nàng kờ` đơs nền jơnau hơ pơrgon bơh ală kuang đơng lam bồ mpồl ASEAN dê tàm broă chồl pràn ring bal cau klau cau ùr, tơnguh gơnoar broă bơh cau ùr dê tàm broă bơt bơtàu mpồl bơtìan, bơtàu tơnguh lơh sa – mpồl bơtìan tàm mpồl ASEAN.

Gơtùi đơs, bơta do pơn jat tai lơh gơlik dùl tềl niam tai bơh lơgar Việt Nam dê tàm nam Chủ tịch ASEAN 2020. Nac jà bơh pơrjum kơmàng do dê geh Chủ tịch Quốc hội, mò Nguyễn Thị Kim Ngân, Thủ tướng lơgar New Zealand, mò Jacinda Arden, Tổng Thư ký ASEAN Lim Jock Hoi, Thư ký đơng lam Ủy ban lơh sa mpồl bơtìan châu Á – Thái Bình Dương bơh Liên hợp quốc dê Armida Salsiah Alisjahbana.

Cau mblàng K’Duẩn