VOV4.K’ho – Mờr 2 tơmàn priă là khà priă mờ Bảo hiểm tă tơm ai ală cau gơtìp aniai tàm dơ\ rềs àr gùng lòt ngòt rơngơt tàm gùng Hồ Chí Minh, gơl lòt gan kơnhoàl Chư Sê, càr Gialai gơlik geh tàm ngai (07/5) pa do.

Kờp jơh hoàc huơr gơbàn tàm dơ\ rềs àr do là mờr 3 tơmàn priă

Jat Công ty Bảo hiểm Bảo Việt Gia Lai, mpồl geh jơng bơh Bảo hiểm Bảo Việt dê, jơh 2 nơm rơndeh nac mờ rơndeh pơn diang phan tàm dơ\ rềs àr gùng lòt ngòt rơngơt tàm gùng Hồ Chí Minh, gơl lòt gan kơnhoàl Chư Sê, càr Gia Lai ngai 07 nhai 5 ndrờm blơi bảo hiểm Bảo Việt. Tơnơ\ dơ\ rềs àr, mpồl neh sồr cau ala mat tus tơn hìu sơnơm dờng càr Gia Lai nàng lùp còp, git bơta gơlik geh mờ tă priă lài ai ală hìu nhă cau gơtìp aniai in. Bơh sơnrờp, mpồl tă tơm ing 10 tơlak priă tus mờ cau chơt, 5 tơlak priă tàm tơl nă cau sồt să jroă mờ 3 tơlak priă ai cau gơtìp sồt să ờ jroă in. Kờp du\, kờp jơh khà priă mờ bảo hiểm pal tơm bơh Bảo Việt dê ai ală cau gơtìp aniai tàm dơ\ rềs àr là mờr 2 tơmàn priă.