Là cau geh bơngă pin dờn tàm thôn Hiệp Đoàn, sàh Ea Mdroh, càr Dăk Lăk, ồng Bàn Tôn Nhất ờ mìng geh làng bol sền ngềr tài broă lam lài tàm rài kis, mờ gam tài ală broă lơh pơgồp bal sùm tàm broă hòi jà làng bol. Bơh broă mblàng yal gùng dà broă bơh Đảng, adăt boh lam bơh Dà lơgar dê tus mờ broă lam sồr Làng bol sền gàr bơta lơngăp lơngai, sơbì bơhiàn ờ niam, bơ̆t bơtàu rài kis gơguh jăk, tàm tiah lơi geh broă gơtìp kal ke, tàm hơ̆ geh tề jơng ồng tus.

Đơs bè kơnòl bơh să tờm dê, ồng Nhất pà git: Broă lơh bơh cau geh bơngă pin dờn là đơs nàng làng bol wă, lơh nàng làng bol pin dờn, nàng làng bol tus bal tam klăc, lơh broă sa, gàr ƀòn lơgar lơngăp lơngai. “Bal mờ mpồl sền gàr bơta lơngăp lơngai, mpồl atbồ ƀòn mờ Ci ƀộ añ lam làng bol lơh jăt ală adăt boh lam mờ gàr lơngăp lơngai tàm thôn, ƀòn. Añ sùm lam làng bol là jơi bơtiàn ờ gal cau tàm tiah do ờ dờn jơnau cau ờ niam đơs. Tàm broă lơh, añ lam làng bol tàm do 100% hìu là lơh jăt bal, dùl nùs bal jăt Đảng”.

Mùl màl pà gŏ, tàm ală ƀòn geh cau geh bơngă pin dờn lơh broă pràn, broă làng bol sùm bơtàu tơnguh kơl jăp. Cau geh bơngă pin dờn ờ mìng pơgồp bal tàm broă lơh geh uă ală gùng dà broă lơh dờng bơh Đảng mờ Dà lơgar dê tus mờ tơl hìu làng bol, mờ gam dong kờl kấp ủy, gơnoar atbồ di tŭ git nùs nhơm, jơnau kơ̆p kờñ bơh Làng bol dê. Bơh tŭ hơ̆, broă lơh niam wơl gùng dà broă lơh jơnau sồr rơ̆p di pal mờ mùl màl rơlao, ai geh nùs nhơm ring bal tàm mpồl bơtiàn tơn bơh ƀòn lơgar. Ồng Lê Văn Chiến, Kwang atbồ thôn Hiệp Hoà, sàh Ea Mdroh, càr Dăk Lăk pà git: “Cau geh bơngă pin dờn tàm thôn geh gơnoar là kwơ màng ngan. Pah tŭ geh ală dơ̆ pơrjum, dơ̆ tìp mờ cau tĕ khà bơh Mpồl duh broă Làng bol càr, Mpồl duh broă Làng bol sàh dê mờ tam thôn geh ală broă lơi kwơ màng den jơnau đơs, bơngă pin dờn bơh ală cau do dê geh dong kờl añ uă ngan. Dong kờl añ lơh gơs kơnòl broă, gơnoar broă bơh dùl nă cau atbồ ƀòn”.

Jăt mò Nguyễn Thị Thu Hồng, Củ tịc Anih duh broă Làng bol sàh Ea Mdroh, càr Dăk Lăk pà git, gùt sàh tŭ do geh 19 nă cau geh bơngă pin dờn. Ală cau do là ală cau tơrbŏ bal broă lơh bơh gơnoar atbồ dê tàm broă lam làng bol, gàr niam lơngăp lơngai mờ lơh pràn broă bơtàu tơnguh lơh sa mpồl bơtiàn tàm sàh. Cau geh bơngă pin dờn tàm sàh Ea Mdroh neh tơnguh niam gơnoar ai jơnau tơngit, bơsram nàng git adăt boh lam, gùng dà broă lơh tus mờ broă lơh tơl ală broă dong kờl di mờ jơnau geh ai. Tàm tơngai tus, sàh pơn jăt tai tơnguh gơnoar bơh cau geh bơngă pin dờn mờ ală broă bơtàu tơnguh lơh sa, tơrmù rơƀah kơl jăp, sền gàr brê, bơ̆t bơtàu ƀòn lơgar pa mờ gàr kơl jăp dà lơgar – lơngăp lơngai tàm sàh. Mò Nguyễn Thị Thu Hồng pà git: “Tàm tơngai tus, mờ gơnoar broă kwơ màng ngan bơh mpồl cau geh bơngă pin dờn dê, Anih duh broă Làng bol sàh rơ̆p pờ ală ơdŭ bơto, bơtơl nàng tơnguh uă jơnau git wă kung bè bơto tai ală jơnau pa, ală jơnau pal jăt pa nàng ală cau do bơto wơl làng bol in. Dơ̆ bàr tai là rơ̆p pơn jăt tai sền gròi rơlao, rơ̆p yal ală cau geh bơngă pin dờn nàng bơh tŭ hơ̆ den làng bol gơtùi bơsram mờ lơh jăt”.

Bơh ală broă lơh loh làng, mùl màl tàm thôn, ƀòn dê, ală cau geh bơngă pin dờn là ală “anih kơl dìng niam” tàm mpồl bơtiàn ală jơi bơtiàn ờ gal cau tàm càr Dăk Lăk dê gam pơgồp bal tàm broă gàr kơ̆ “bơta niam nùs nhơm làng bol”, do là bơta tờm kwơ màng ai broă bơtàu tơnguh kơl jăp càr dê. Kung bơh broă lơh jơh nùs, geh kơnòl mờ geh bơngă pin dờn hơ̆, mpồl tam klăc gùt jơi bơtiàn geh bơtơl kơ̆ kơl jăp, bơta lơngăp lơngai tàm ƀòn lơgar geh gàr kơ̆ sùm, ai geh bơta tờm nàng tiah làng bol jơi bơtiàn ờ gal cau càr Dăk Lăk pơn jăt tai brồ guh tàm tơngai pa.