Ồng Phạm Quốc Lựu, 70 sơnam, tàm ƀòn Đăk Tô 5, sàh Đăk Tô tus Anih tờm lơh sră pơ-àr gơnoar atbồ dà lơgar sàh nàng lơh sră dờp broă dong kờl bơh mpồl bơtiàn ai mè in. Do là dơ̆ sơnrờp ồng Lựu tus lơh broă nggal tàm mpồl lơh broă dùl mpồng. “Tus tàm do den kwang bàng dong kờl lơh jơh ală broă, kờñ broă lơi den geh bơto pơlam nền nòn. Kwang bàng tŭ do geh uă ngan cau gam kơnòm, geh săc rơwah, lơh broă niam. Añ kơ̆p kờñ mpồl cau do tơnơ̆ do gơs cau tờm tàm mpồl lơh broă kwang bàng sàh Đăk Tô dê”.

Lơh jăt broă lơh tơrlòng lài gơnoar atbồ bàr kấp, sàh Đăk Tô neh pồ tơl mpồl lơh, tam pà loh kơnòl broă ai kwang bàng, kông cứk in mờ lam lơh jơh ală tơngu me broă lơh tàm ală broă. Kwang bàng sàh neh rơcang lài lùp ală sờh, gah lơh broă càr dê nàng geh bơto pơlam, den tàng broă lơh sền bal geh niam sùm. Bè broă tam gơl sồ, tơnơ̆ tŭ tơmŭt bal, ală măy mŏk yal tơnggĭt yau ờ gam ngui tai, kwang bàng pal lơh broă mờ phần mềm pa, den tàng bơh sơnrờp gam kwi kwơ ờ hềt mờng. Bŭlah ờ hềt geh kông cứk mìng lơh broă tàm gah do, mpồl kwang bàng tàm Anih tờm Sră pơ-àr gơnoar atbồ dà lơgar sàh dê neh bơsram is, lơh niam broă lơh mờ dờp sră nggal tàm internet niam. Tŭ do, 100% sră nggal tàm sàh neh geh bơsong di tŭ. Ồng Mai Huy Hưng, Phó Củ tịc Anih duh broă Làng bol sàh Đăk Tô pà git, kwang bàng sùm lơh ngan sơrlèt mờ kal ke, uă tŭ lơh broă tus nggùl bơnang nàng lơh gơs di mờ tơngai geh ai: “Lơh broă gơlơh bè ờ geh ngai dơ̆ poh, ngai rơlô. Oh mi uă tŭ tus 10 jơ mang kung gam lơh broă mờ kơlôi sơnơng mờ lùp lăp gơnoar atbồ nàng geh bơto sồr pơlam tai. Ală kơnòl broă geh lơh niam, mơya đah gah broă bơto gam ờ tơl. Geh ờ uă gah broă bè tam gơl sồ tài lơh pơgồp bal, mơya kwang bàng kung bơsram is, lơh tơl ală tơngu me jăt jơnau sồr lơh”.

Tơnơ̆ 4 nhai mŭt lơh broă, sàh Đăk Rve, càr Quảng Ngãi neh dờp lơh bơnah broă lơh pa geh uă ngan, tàm tŭ bơta pràn jak lơh broă bơh mpồl kwang bàng, kông cứk ờ hềt ndrờm. Bơh tàm mùl màl do, sàh neh geh sră nggal dan mờ càr dong kờl, ai tai cau lơh broă tàm ală gah broă pal geh broă lơh nền nòn bè măi mok pa, lơh sơnơm, bơto bơtê… Tŭ do, kwang bàng sàh Đăk Rve sùm dan mờ ală sờh, gah lơh broă tàm càr nàng geh dong kờl lơh broă. Kơnờm mờ hơ̆, uă gah broă lài do ờ tơl cau lơh broă tŭ do neh geh tơl, ờ gam geh bơta “lơyài broă” ha là sơrbì kơnòl broă.

Ồng Huỳnh Ngọc Phong, Củ tịc Anih duh broă Làng bol sàh Đăk Rve, càr Quảng Ngãi pà git, mpồl phan lơh broă, phan bơna măi mok tàm uă thôn ờ hềt geh bơcri priă ndrờm bal, den tàng broă pơgồp bal, tam gơl bal gam lơyài. Nàng bơsong bơta mùl màl do, sàh lam geh broă bơsram is, kơlôi sơnơng is, tơnguh uă bơta ngăc ngar broă lơh tàm mpồl kwang bàng, kông cứk: “Lơh pràn broă ngui măi mok yal tơnggĭt tàm broă lơh, git ală bơta tàm thôn mhar, pơgồp bal mờ gơnoar broă bơh ală kwang bàng atbồ ƀòn. Kwơ màng là lam sồr jơh ală kwang bàng, kông cứk geh nùs nhơm lơh is, lơh jăt nền nòn gơnoar broă, lơh jăt kơnòl broă tàm nùs nhơm tài làng bol drơng broă. Añ sồr oh mi tàm mpồl đơng lam bồ Anih duh broă Làng bol sàh, ală cau lam bồ anih lơh broă pal geh nùs nhơm “5 loh”, nàng sền gròi, jăt sền mờ pơlam broă lơh”.

Jăt tơrgùm kờp tàm Ală anih yal tơngit bơsong sră nggal bơh càr Quảng Ngãi dê, tàm tơngai do, khà sră nggal tàm ală sàh, sơnah ƀòn, tiah krơi is neh bơsong lài mờ tơngai mờ di tơngai geh mờr 99%. Mpồl lơh kơnòl broă sùm Tỉñ ủy càr sồr ală sờh, gah lơh broă pơn jăt tai ai kwang bàng tus dong kờl broă lơh, tàm hơ̆ uă ngan là ală gah broă ù tiah, phan geh is, tiah kis, priă jền tàm ală sàh geh rơndăp broă lơh tờm bè gùng rơndeh ồs lòt mhar, gùng rơndeh lòt mhar Quảng Ngãi - Bờ Y, gơl gùng jăt gah dà lềng Dung Quất - Sa Huỳnh…; mờ tơnguh broă bơto, pơlam tàm internet mờ bơto tơn ai kấp sàh in. Ồng Nguyễn Hoàng Giang, Củ tịc Anih duh broă Làng bol càr Quảng Ngãi đơs nền, kwang bàng càr pơn jăt lơh broă bal, dong kờl ală sàh tàm broă tam gơl sồ nàng drơng broă làng bol in niam rơlao: “Bol añ jăt sền nền nòn broă lơh gơnoar atbồ bàr kấp, di tŭ bơsong kal ke, tă bơsong gơkòl. Tơl Mpồl lơh kơnòl broă sùm drơng kơnòl bàr pe Kwang bàng Tỉñ ủy, tơl nă kwang bàng Tỉñ ủy drơng kơnòl dùl ha là 2 sàh, yal tơl ală bơta mờ kâp hơđăng in. Gàr niam gơnoar atbồ bàr kấp lơh broă sùm, sùm sùm, tàm hơ̆ uă ngan tàm drơng broă sa priă dà lơgar lơh tơn tàm internet, pơgồp bal mờ làng bol bal mờ mpồl lơh sa kă bro”.