Bă sre Ia Rbol, càr Gia Lai ơnàng rơlao 30 lồ, kàl lơh sa do bè dùl pang ồs tơlir niam tềng đăp mờ càl khồm bơh kàl prang tiah Tây Nguyên dê. Dà rơbòng bơh bơtơ̆t dơng dà Ayun Hạ tus, lơh mrềt niam bơta duh tàm tiah do dê. Mò Nay H’ Wer, mờng hòi là mò Bíp tàm ƀòn Rưng Ama Nin, sàh Ia Rbol rơcang lòt còp sre nàng ai dà bă sre lơh kòilài mờ satềp nam pa nam Ơseh 2026 in. Mò pà git, tàm bă sre do, hìu nhă mò lơh mờr 1 lồ nggùl, kàl pa do tơnhào geh di pơgăp 12 tấn kòi. Là cau lơh sa suơn sre jăk càr Gia Lai dê, mò Nay H’ Wer tam pà bal broă lơh mờng chài tàm broă lơh kòi sre bè dùl nă cau jăk chài ngan: kàl do, mò ngui sơntìl OM468, tài ờ hoan gơtìp tu kòp lơh aniai, cồng nha uă mờ gar phe sa bơkah. Broă lơh kòi đềt mềr mờ tiah kis, sih phơng hữu kơ, ờ ngui uă ir sơnơm sền gàr phan tam bal mờ phơng hoá họk.

Ala mờ broă ƀồm sơnơm ñhơ̆t, mò lòt còp sùm sre, ờ lời sre gơtìp soăt dà, bè hơ̆ den tàng ñhơ̆t ờ hoan hòn. Kơnờm mờ broă mìng lơh kòi sre, mò neh ròng 5 nă kòn bơsram tus gùng tus dà, geh broă lơh niam là cau pơgru, kwang àng, cau lơh sơnơm. Mò Nay H’ Wer yal: “Bơklao añ neh chơ̆t pơgăp mờ do 26 nam, dùl nă añ lơh ngan ròng ală kòn. Añ lơh ngan tàm broă lơh sa suơn sre nàng ròng ală kòn lòt bơsram. Bơtoah ngan ală kòn añ ndrờm gơlòng sồr, tơriang bơsram sră den tàng añ kung iang nùs lơh sa. Tus tŭ do, ală kòn ndrờm neh geh broă lơh, neh bao, neh lik ơm is. Tŭ do añ kis mờ ùr gơklao kòn ùr pŭt, sền gŏ oh kòn kơl jăp tàm rài kis, añ chờ hờp ngan”.

Bŭ lah oh kòn neh dờng pràn, mò Nay H’ Wer kung gam lơh ngan bơtàu tơnguh lơh sa, mờ pơgồp bal bơta pràn bơ̆t bơtàu ƀòn lơgar. Mò neh ai git nđờ jơ̆t thơ̆k ù rềp tơn tềng gùng, kơl uă ngan tờm chi sa plai, ai geh bơta niam nàng lơh gùng lòt. Uă nam tơn, mò Nay H’ Wer geh khà jờng cau lơh sa jăk kấp càr. Mò kung geh pồ lơh cau ala măt Mpồl duh broă Làng bol sàh, mờ là Cau tàm mpồl Anih duh broă Mặt trận Dà lơgar Việt Nam ƀòn drà Ayun Pa (lài do).

Mò Nay H’ Wer neh gơs “cau tơrbŏ bal” đah Đảng mờ Làng bol: “Làng bol tàm do geh Đảng mờ Dà lơgar sền gròi ngan, dong kờl mùl màl ngan; dong kờl phan sa, sơntìl phan tam, phan ròng bè kơnrồ, be nàng bơtàu tơnguh lơh sa, tus mờ broă dong kờl lơh wơl hìu ơm ai ală hìu gơtìp kal ke in. Dà lơgar kung sền gròi bơcri priă bơ̆t bơtàu phan bơna, dong kờl lơh gùng lòt, gùng rơbòng dà nàng drơng tàm broă lơh sa. Lài do tàm ƀòn ờ hềt geh gùng dă mờ bê tông, broă lòt rê gơtìp glar bòl ngan, mơya tŭ do gùng tàm ƀòn, geh tŭ là gùng tus tàm ƀlàng sre kung neh geh dă mờ bê tông sơl, ưn ngài Đảng mờ Dà lơgar neh sền gròi, drơng gàr tus rài kis làng bol kòn cau Jrai in”.

Ồng Nay Pol, Phó Kwang lam bồ cơl dŭ lơh broă Niam chài mpồl bơtiàn sàh Ia Rbol, càr Gia Lai pà git, bơta kwơ màng ngan tàm mò Nay H’ Wer dê là nùs nhơm lơh is, sơrlèt mờ kal ke. Ờ kơ̆p tàm broă dong kờl bơh Dà lơgar dê, mờ sơlơ̆u wơl, mò gam tus bal mờ broă lơh mpồl bơtiàn, pơgồp bal mờ kấp ủy, gơnoar atbồ sàh lơh geh cồng nha gùng dà broă lơh bơh Đảng, adăt boh lam bơh Dà lơgar dê nàng bơ̆t bơtàu ƀòn lơgar pas gơs.

Ồng Nay Pol pà git: “Bơklao chơ̆t gờñ, dùl nă să ròng siam is kòn, mơya mò sùm lơh ngan sơrlèt mờ kal ke, tơriang tàm broă lơh, bơtàu tơnguh lơh sa, drơng oh kòn in lòt bơsram tus gùng tus dà. Mò mùl màl là cau lam lài nàng làng bol ƀòn lơgar bơsram mờ đòm jăt bal, geh ală cau sền ngềr tài nùs nhơm tơriang, ờ ngòt glar bòl, sùm lơh ngan tàm ală broă”. 

Nam pa gam tus tàm ƀlàng sre Ia Rbol, mờ ñhòng dà Ayun Pa mrềt niam ròng ală bă sre lơh kòi hờm ram. Tàm bơta niam bơnĕ do, cau ùr kòn cau Jrai tơriang tơriồng tàm broă lơh sa bè mò Nay H’ Wer ờ mìng lơh geh kàl lơh sa, mờ gam lơh geh bơta niam tàm ƀòn lơgar dê bè nùs nhơm pin dờn bè broă lơh sa, bơsram sră tus gùng tus dà mờ kis niam mờ mpồl bơtiàn.