Nam 2007 bi Lê Văn Thuận, ơm tàm thôn 7, sàh Hàm Thuận, càr Lâm Đồng, tam sơntìl 100 tờm lơ u tơlir. Gŏ tờm lơ u hòn gơs niam tàm tiah ù bơrlŭ bràs, tus nam 2010 bi pờ ơnàng tam tus 400 tờm, tàm bă ù ơnàng rlau 1 lồ 7 sào. Tơnơ̆ 2 nam tờm lơ u gơlik bơkào, tơ̆t plai mờ tus nam dơ̆ 3 geh plai sùm. Nam 2015, sền gŏ suơn ha pah, ờ hoan geh nhơ̆t, di pal ngan ai broă ròng iar ada, bi Thuận blơi srĭ B40 rê pơng gàr gùt dar, lơh wàng ròng, mơkung blơi sơntìl kòn iar ròng tềng hơđơm mƀur tờm lơ u.

Tơngai bơh chờm bi mìng ròng pah dơ̆ bàr pe rơhiang kòn lơm. Bơh uă dơ̆ ròng gŏ geh cồng nha lơh sa, bi blơi tai măi krơm tăp lơh geh kòn sơntìl is. Jat hơ̆, khà mpồl iar gơguh pah nam, tus nam 2018 den gàr sùm khà ròng rlau 3 rơbô 700 nơm kòn tus tŭ do. Bi Lê Văn Thuận pà gĭt, kơnờm sền gàr niam, broă lơh tam phan pơgồp bal mờ ròng phan bơh bi dê mhar ngan cèng wơl cồng nha: “Bơh sơn rờp hìu bơnhă kung sền gĭt broă tam tờm lơ u pơgồp bal mờ ròng iar là nàng bơtàu tơnguh lơh sa lơh geh priă jền ai hìu bơnhă in. Den tàng bè hơ̆ hìu bơnhă lơh nền ròng iar mờ khà uă nàng tăc ai drà kă bro in sùm, bơdìh mờ broă ròng iar poăc, hìu bơnhă gam krơm tăp nàng lơh geh kòn iar sơntìl ai he in mờ tăc kòn iar sơntìl ai làng bol geh jơnau kờñ in”.

Bi Thuận pà gĭt, nàng rcang lài kơryan kòp ai mpồl iar in, cau ròng kờñ pal sền gàr di broă lơh mờ jat sền mpồl iar niam ngan. Broă cĭt vaccine rcang kòp pah dơ̆ ai mpồl iar in sồr pal lơh jat niam ngan, dilah iar geh tềl tơngŏ gơtìp kòp den pal mhar ngan blơi sơnơm phan ròng nàng sơm kòp. Bơdìh mờ tăc iar poăc, bi Thuận gam lơh gơlik kòn iar sơn tìl nàng tăc ai drà kă bro in mờ giă 17 rơbô đồng dùl nơm, pah nhai bi tac bơh 2 rơbô 700 nơm tus 3 rơbô nơm kòn iar sơntìl. Kờp jơh priă lơh geh bơh ròng iar bơh hìu bơnhă bi dê pah nam lơh geh 1 tơmàn 500 tơlak đong, kờp jơh priă bơcri gam geh priă cồng rlau 450 tơlak đong.

Ồng Nguyễn Quốc Tuấn, ala mat Mpồl cau lơh broă sa sàh Hàm Thuận, càr Lâm Đồng pà gĭt, cau lơh broă sa Lê Văn Thuận khin cha kơlôi, gĭt lơh, bi neh lơh jat niam bơta ƀuơn bơta pràn tiah ù bơrlŭ bràs ƀòn lơgar dê:“Bơh tiah ù bơrlŭ bràs ro kơnrañ, ùr bơklau bi Thuận kung lơh ngan kong bòl glar lơh broă sa nàng lơh geh priă jền ai hìu bơnhă in. Tàm ală nam do, broă lơh tam tờm lơ u pơgồp bal mờ ròng iar bơh hìu bơnhă bi Thuận dê neh ai geh cồng nha lơh sa uă. Do là dùl tàm ală broă lơh pơn rơ jak bơh tiah do dê mờ rơ̆p rề ơnàng tàm tơngai tus, pơgồp bơnah tơnguh uă priă lơh geh ai làng bol cau lơh broă sa tàm tiah do dê”.

 Mờ cồng nha lơh sa uă, tŭ do broă lơh tam tờm lơ u pơgồp bal mờ ròng iar bơh bi Thuận dê gam geh uă cau lùp bơsram, lơh jat. Bi Lê Văn Thuận kung là dùl tàm ală hìu bơnhă lam lài glòm tơlir tờm sơntìl tờm lơ u ờs mờng tàm tiah bơrlŭ bràs tàm thôn 7, sàh Hàm Thuận, càr Lâm Đồng, pờ geh gùng lòt bơtàu tơnguh lơh sa kơnhăp kơ̆, pơgồp bơnah lơh pas ai hìu bơnhă mờ mpồl bơtiàn in.