Ồng K’ Bé là dùl tàm ală Cau geh bơngă pin dờn pơnrơ ngan tàm sàh tiah bơnơm Phan Sơn dê. Nam do ồng neh rơlao 60 sơnam, neh sơrlèt rơlao mờ uă gơnoar broă lơh tàm ƀòn lơgar, tàm gơnoar broă lơi, ồng kung geh làng bol kòn cau K’Ho, Rơglai tàm do pin dờn mờ gơboh kờñ ngan. Tơnơ̆ mờ tŭ neh jơh sơnam lơh broă, ồng geh làng bol pin dờn mờ pồ rơwah là Cau geh bơngă pin dờn. Ồng K’ Bé neh bal tus bal mờ Mpồl đơng lam bồ thôn nàng mblàng yal làng bol in git bè gùng dà broă lơh bơh Đảng, adăt boh lam bơh Dà lơgar dê.

Is ồn ngan là mblàng yal làng bol in git mờ tus bal broă bơ̆t bơtàu ƀòn lơgar pa, bơtàu tơnguh lơh sa, bơ̆t bơtàu nùs nhơm tam klăc bal, gàr niam lơngăp lơngai tàm ƀòn lơgar mờ tus bal prăp gàr ală bơta kwơ niam chài jơi bơtiàn dê. “Añ gŏ kơnòl bơh să tờm añ dê ngai sơlơ uă rơlao gơwèt mờ mpồl bơtiàn, gơwèt mờ làng bol ƀòn lơgar. Den tàng, tàm tơngai do, añ bal mờ làng bol ƀòn lơgar geh ală gùng dà broă lơh, nàng lơh bè lơi rài kis làng bol ngai sơlơ gơguh uă. Geh bè hơ̆, nùs nhơm pin dờn bơh làng bol dê gơwèt mờ Đảng, Dà lơgar sơlơ gơguh rơlao. Mùl màl bơh ală gùng dà broă lơh hơ̆, tàm tơngai do, neh pơgồp bal tơnguh uă rài kis làng bol jơi bơtiàn ờ gal cau tàm sàh Phan Sơn do”.

Tơnguh nùs nhơm lam lài, ồng K’ Bé ờ mìng lơh jăt niam ală gùng dà broă lơh  jăt ală gùng dà broă lơh bơh Đảng mờ adăt boh lam bơh Dà lơgar dê mờ gam là cau tờm tàm broă bơtàu tơnguh lơh sa hìu nhă, lam lài oh kòn bal mờ làng bol đờm jăt bal. Ờ mìng git tàm broă lơh pas hìu nhă tờm, ồng K’ Bé gam lam cau tàm jơi nòi, làng bol ƀòn lơgar tam gơl phan tam, phan rồng, khin càn priă bơh anih priă jền nàng lơh sa. Bơdìh hơ̆ tai, ồng gam lam làng bol sơbì ală bơhiàn ờ niam, tàm hơ̆ uă ngan là broă bao gờñ. Ồng K’ Vi Ang, kis tàm sàh Phan Sơn, càr Lâm Đồng pà git, lài do tàm ƀòn gam uă cau bao gờñ, geh kòn ùr bao tŭ mìng rơ̆p bơh 13 tus 14 sơnam.

Tơnơ̆ mờ tŭ geh ồng K’ Bé mblàng yal bè ală bơta ờ niam bơh broă bao gờñ neh dong kờl làng bol in wă bè bơta ờ niam bơh broă bao gờñ. Tàm ală nam do, bơta bao gờñ do neh gơmù uă ngan. “Wa K’ Bé geh gơnoar dờng màng ngan tus mờ broă bơtàu tơnguh lơh sa kung bè ală broă lơh tàm ƀòn lơgar dê. Mùl màl lam làng bol in ai ù nàng lơh ală broă lơh gùng lòt, bơtơ̆t rơbòng dà. Bơdìh hơ̆ tai, wa K’ Bé kung lam làng bol gàr niam bơta niam chài jơi bơtiàn dê, mờ lam làng bol lơh jăt niam broă lơngăp lơngai tàm sàh Phan Sơn dê”.

Kơnờm mờ ală broă lơh ngan bơh mpồl cau geh bơngă pin dờn dê, tus tŭ do sàh Phan Sơn càr Lâm Đồng neh geh ală cồng nha niam tàm ală gah broă bè: ală gơl gùng lòt tàm ƀòn neh geh dă mờ bê tông jơh, ală hìu làng bol ngui ồs đèng dà lơgar; ală thôn ndrờm geh hìu pơrjum ƀòn, khà hìu rơƀah neh gơmù jăt nam… Bơta niam chài jơi bơtiàn geh prăp gàr niam, tơnguh niam; bơta lơngăp lơngai cíñ trị, mpồl bơtiàn geh gàr niam, mpồl tam klăc jơi bơtiàn geh tơnguh. Ồng Bùi Ngọc Sơn, Phó Kwang lam bồ Sờh Jơi bơtiàn mờ Jăt yàng càr Lâm Đồng pà git, nàng tơnguh rơlao tai gơnoar bơh Cau geh bơngă pin dờn, tus tŭ do Sờh neh bơyai lơh pờ 4 ơdŭ bơto bơtơl bè jơnau git wă bal mờ tơnguh jơnau chài niam ai mpồl Cau geh bơngă pin dờn tàm gùt càr in, nàng Cau geh gơngă pin dờn git loh mờ bơto bơtê geh cồng nha rơlao ai làng bol in. Mờ bơngă pin dờn bơh să tờm dê, ồng K’ Bé ờ mìng tơnguh niam gơnoar tơrbŏ bal mờ gam pơgồp bal tàm broă lơh geh uă gùng dà broă lơh bal mờ lơh pràn broă bơtàu tơnguh tiah làng bol jơi bơtiàn ờ gal cau tàm sàh tiah bơnơm Phan Sơn, càr Lâm Đồng dê.