Tàm sàh Tà Hine - do là tiah kờp dŭ lài rơndap tap sèng bơh 24 thôn gơmù gam 12 thôn. Jat broă rơndap lơh, pe thôn Đà Thành, Đà Phước mờ Đà An rơp tơrgùm dùl gơ gơs thôn Đà An. Tơnơ̆ rơndap tap sèng, thôn pa geh 775 hìu bơnhă bal mờ rlau 3 rbô 300 nă cau, gơ gơs là thôn geh bă ù ơnàng ngan rlau jơh sàh dê. Ồng Hồ Đấu - Bí thư chi ƀộ thôn Đà Phước, sàh Tà Hine, càr Lâm Đồng pà git:

“Rơndap tap sèng wơl mpồl lơh broă sră pơ àr gơnoar atbồ nàng dipal rlau mờ geh cồng nha rlau den să tờm añ gŏ là broă do di ngan. Añ hòi jà làng bol, hòi jà hìu bơnhă lơh jat niam jơnau lơh nền dà lơgar dê bè broă rơndap tap sèng thôn”.

Bal mờ Tà Hine, sàh Bảo Lâm 1 kung gam lam lơh broă rơndap tap sèng thôn jat gùng dà tơrmù dipal, geh cồng nha. Tơnơ̆ rơndap tap sèng, sàh tơrmù 19 mpồl atbồ tàm kâp hơ đơm mờ gơmù 57 nă cau lơh broă ờ drơng mìng dùl kơnòl, pơgồp bơnah tơrmù tă ngui kes priă, tơnguh cồng nha lơh broă bơh anih lơh broă chính trị tàm tiah làng bol ơm kis dê.

Jat ồng Nguyễn Đức Thanh - Phó Chủ tịch Anih duh broă Làng bol sàh Bảo Lâm 1, broă bơt bơtàu broă rơndap lơh tơrgùm dùl geh lam lơh bơh bơta sền swì nền ală bơta bè làng bol ơm kis, ơnàng ù tiah, bă ù, nhàr ù tiah, kah yau mờ niam chài nàng kờñ lơh gơlik bơta ring bal uă ngan rlau jơh tàm làng bol:

“Bol hi sền gròi tus ală bơta bè làng bol ơm kis, bè ơnàng ù tiah, bè bă ù, hơ̆ sồng nhàr ù tiah, bơta kah yau mờ bơta niam chài nàng bol hi tơrgùm dùl thôn. Lơh bè lơi lơh gơlik bơta ring bal ngan rlau jơh bơh làng bol dê tàm broă tơrgùm dùl thôn, nàng bơt bơtàu, bơtàu tơnguh lơh sa mpồl bơtiàn bơh sàh dê”.

Jat sền nền wơl bơh càr Lâm Đồng, tŭ do gùt càr geh 2 rbô 773 thôn, jơnum làng bol tiah drà. Lơh jat jơnau sồr lơh bơh Tỉnh ủy, ală tiah gam lơh sir broă rơndap lơh nàng tơrmù bơh 50% khà thôn, jơnum làng bol tiah drà rlau hơđang tơnơ̆ rơndap tap sèng. Bơh bơta ring bal làng bol dê mờ bơta lơh ngan bơh gơnoar atbồ ƀòn lơgar dê, broă rơndap tap sèng thôn, jơnum làng bol tiah drà gam rơhời lơh gơlik bơnàng jă tơnguh cồng nha atbồ, drơng làng bol in niam rlau, drơng jơnau kờñ bơtàu tơnguh tàm tŭ tơngai pa.