Rơndăp broă lơh săp sèng tiah lơh broă, tiah ơm kis pa tơrgùm ai tiah trồ tiah lơh aniai tàm sàh Ia Hiao, càr Gia Lai, geh lơh tàm thôn Điểm 9, tàm ù tiah ơnàng rlau 15 lồ, kờp jơh priă bơcri lơh rlau 120 tơmàn đong. Rơndăp broă lơh ai ù ơm ai rlau 180 hìu bơnhă làng bol in. Tŭ do, ală mpồl lơh broă gam mhar lơh sir ală gùng lòt rê tàm dơlam is, gùng che ồs đèng hạ thế, ală broă lơh bơt bơtàu kờñ pal geh bè dà ngui sa pah ngai, hìu niam chài mpồl bơtiàn, hìu bơsram mầm non.

Ồng Ksor Tin là dùl tàm ală cau lam lài tàm ƀòn Chư Plah Jai, sàh Ia Hiao, tus dờp bơnah ù pa nàng lơh hìu ơm, pà gĭt:

“Bol añ tus sền ù tiah tàm tiah do, niam ngan. Tàm do rềp hìu bơsram, geh ƀlàng coh plai tơl làm. Ù ơm tàm tiah jơnhoa, tàm chàr nơnơm niam ngan, ơm lơngăp lơngai rlau ai oh kòn mờ làng bol in; ờ duh pal ntoăt dô dà tih dà lìu bè nam lài do tai; tiah do niam ngan pơndrờm mờ lài do. Geh Dà lơgar dong kờl, gơnoar atbồ càr lơh ù tiah ơm kis pa ai làng bol in, añ ờ gĭt đơs bơta lơi rlau, ưn ngài uă ngan”.

Nàng làng bol ring bal lik bơh tiah ơm kis mờng kwèng bulah sùm kong mờ trồ tiah lơh aniai nàng ntrờn tus tiah ơm pa, gơnoar atbồ ƀòn lơgar neh lam lơh uă dơ̆ tìp mat, iăt kơno nùs nhơm bơta kơ̆p kờñ mờ hơ tơl làm ală bơta gam ờ hềt loh bơh làng bol dê. Làng bol geh sền rùp hin geh ngan ală tiah sùm gơtìp dà tih dà lìu, jat sền tŭ tơngai mut lơh tiah ơm kis pa, jòi gĭt broă lơh dong kờl. Ală hìu bơnhă geh rơ wah is rùp hìu, ai is tiah bơnah ù mờ tus sền tơn tiah ơm kis pa. Hìu bơnhă bi Nay Chúc ơm tàm ƀòn Sô Ma Lơng, là dùl tàm 67 hìu bơnhă sơn rờp tus tàm tiah ơm kis, chờ hờp tài bơh neh ai geh sră tiah ơm “niam rlau mờ bơta kơ̆p gơn”.

 “Hìu bơnhă añ lài do kis rềp dà dờng tơn, rơngòt ngan gơtìp tơrlah ù. Añ bơtoah ngan ai geh sồ 63, tiah rềp mờ hìu bơsram mẫu giáo, di tŭ kòn añ nam do kung mut tàm sơnam ơdŭ mầm, ơdŭ lá”.

Lài mờ tŭ lơh dơ̆ dong làng bol ntrờn tus tiah ơm pa, sàh bơyai lơh dơ̆ ai cau lik lòt “Bơceh lơh hìu ơm pa- Ù tiah tơlir” tàm Tiah ơm kis. Tàm do, đơng lam bồ sàh, ală mpồl cau bal mờ Làng bol tam 250 nơm tờm ƀàng Đài Loan jat kềng gah gơl gùng làng bol ơm kis. Dơ̆ ai cau lik lòt tơngŏ nùs nhơm jơh nùs lơh ngan bơh jơh bal ală anih lơh broă chính trị mờ bơta dùl nùs bal bơh làng bol dê tàm broă lơh geh tiah ơm kis pa lơngăp lơngai mờ kơ̆ kơnhăp. Ồng R’Ô Thí – Phó Kwang lam bồ Cơldŭ lơh broă Lơh sa sàh Ia Hiao pà gĭt, rơndăp broă lơh gam lơh sir ală bơta nàng gơtùi wă jơh ală pơgăp 180 hìu bơnhă làng bol rê ơm kis tàm bàr pe nhai tus.

“Tơngai pa do, sàh Ia Hiao neh lơh niam broă lơh mblàngy yal, hòi jà ală hìu bơnhă làng bol gơtìp gơrềng tài bơh trồ tiah lơh aniai, tàm tiah pơhìn ngơr bam dà tus tiah ơm kis pa, tus tŭ do neh geh 100 hìu bơnhă. Kờp dŭ tàm nhai 8, nhai 9 pơn jat tai hòi jà jơh ală hìu bơnhă gam wơl mut tàm tiah ơm kis pa, nàng gàr niam lơngăp lơngai màng kis mờ phan bơna ai làng bol in”.

Bal mờ broă lơh dong kờl bơh dà lơgar dê, tàm tơngai pa do, ală mpồl lơh broă ling klàng lơh pôs đồng tàm tiah do dê neh lòt sền, lơh jat broă lơh dong làng bol ntrờn hìu đam mờ phan bơna tus tiah ơm kis pa tàm Ia Hiao. Rlau 50 nă kwang bàng, cau ling Đại đội bộ binh 1, Mpồl đơng lam Rcang gàr lài tiah 3- Thống Nhất (Gah đơng lam Mpồl ling klàng càr Gia Lai) neh tus sàh Ia Hiao nàng dong kờl làng bol tă sờr hìu đam, ntrờn phan bơna mờ bơt wơl hìu ơm tàm tiah ơm kis pa.

Dùl tiah ơm kis pa gam rơhời geh lơh tàm ù tiah Điểm 9 dê. Bơh ală tiah sùm gơtìp dà tih dà lìu pơhìn, làng bol sàh Ia Hiao chờ hờp tus ơm tàm tiah tơrgùm bal, geh tơl phan bơna bơt bơtàu, mờ rlau jơh ngan là geh rài kis lơngăp lơngai, kơ̆ kơl jăp.